ဇန်နဝါရီ-၁၈၊၂၀၂၆။ကလင်ကာ/People’s Spring
စစ်ကိုင်းတိုင်း၊ ရွှေဘိုမြို့နယ်၊ ဆိပ်ခွန်ကျေးရွာက အသက်(၆၀)ကျော်အရွယ် အမျိုးသားတစ်ဦးဟာ ရွှေဘိုမြို့အဝင် မင်းကုန်းကျေးရွာမှာရှိတဲ့ စစ်တပ် စစ်ဆေးရေးဂိတ်အနီးကဖြတ်သွားချိန် မိုင်းနင်းမိပြီး သေဆုံးသွားခဲ့တယ်လို့ စုံစမ်းသိရပါတယ်။
ဇန်နဝါရီ ၁၇ ရက်ညနေ ၆ နာရီကျော်မှာ ရွှေဘိုမြို့ကနေ ဆိပ်ခွန်ရွာပြန်လာစဥ် စစ်တပ်ဂိတ်အနီးက ဖြတ်သွားစဥ် မိုင်းနင်းမိကာ ဦးခေါင်းမိုင်းစထိမှန် သေဆုံးသွားတာလို့ သိရပါတယ်။
“ရွှေဘိုကနေ သူ့ရွာကိုပြန်တာ၊စစ်တပ်ဂိတ် အနောက်ဘက်၊မင်းကုန်းနဲ့အိုးဘိုကြား တံတားအနီးမှာ မိုင်းနင်းမိတာ၊ပေါက်ကွဲသံတော့ ကြားလိုက်တယ်၊မင်းကုန်းဂိတ်က လက်နက်ကြီးပစ်တာမှတ်နေတာ၊သွားလည်မကြည့်ရဲဘူး။ ၁နာရီလောက်ကြာ လူတယောက်မိုင်းနင်းမိတာကို သိတာ။ ဒဏ်ရာကပြင်းတော့ပွဲချင်းပြီးသေသွားတယ်”လို့ ရွှေဘိုဒေသခံတစ်ဦးက ပြောပါတယ်။
Public Service Announcement
၂၀၂၅ အတွင်းကလည် မင်းကုန်းရွာစစ်တပ်ဂိတ်အနီးရှိ မင်းကုန်းရွာနဲ့အိုးဘိုရွာကြားမှာ ညပိုင်းဖြတ်သွားသူအမျိုးသားတစ်ဦး မိုင်းနင်းမိလို့ သေဆုံးမှုဖြစ်ခဲ့ပြီး ဒဏ်ရာရသူတွေလည်း ရှိခဲ့ပါတယ်။
၂၀၂၄ကလည် မင်းကုန်းရွာ စစ်တပ်အထိုင်စခန်းက လက်နက်ကြီး၊လက်နက်ငယ်တွေနဲ့ ရမ်းသမ်းပစ်ခတ်မှုကြောင့် ခရီးသွားပြည်သူ ၅ဦးသေဆုံးခဲ့တယ်လို့ သိရပါတယ်။
အဲဒီဖြစ်စဥ်တွေ ဖြစ်ပွားပြီးနောက် ရွှေဘို-မင်းကုန်း-ဆိပ်ခွန်သွားလမ်းပိုင်း အသုံးပြုသူခရီးသွားတွေဟာ ညပိုင်းအချိန်တွေ ဖြတ်သန်းသွားလာမှု မလုပ်ရဲတော့ဘူးလို့ သိရပါတယ်။
