ဇန်နဝါရီ-၂၈၊၂၀၂၆။ဇော်ရမ်း/People’s Spring
စစ်ကောင်စီထိန်းချုပ်ထားတဲ့ရှမ်းပြည်နယ်မြောက်ပိုင်း၊ လားရှိုးမြို့မှာ လူတစ်စုက ဘုန်းကြီးကျောင်းဝင်းအတွင်းဝင်လာပြီး သံဃာတစ်ပါး သတ်ဖြတ်သွားပါတယ်။
ဒီကနေ့( ဇန်နဝါရီ ၂၈ရက်) မနက်မှာ လားရှိုးမြို့ ရပ်ကွက်(၄)မှာရှိတဲ့ မဟာဗောဓရုံကျောင်းတိုက်က သံဃာတစ်ပါး သတ်ဖြတ်ခံရတာဖြစ်ပါတယ်။
“ဘုန်းကြီးက ဒီကျောင်းမှာ အနေကြာနေပါပြီ။ ဒီနေ့မနက်အစောပိုင်းမှာ အုပ်စုဖွဲ့ပြီး သတ်သွားကြတာပါ။ ဒဏ်ရာတွေ အများကြီးနဲ့ ပျံတော်မူတာပါ”လို့ မြို့ခံတစ်ဦးက ပြောပါတယ်။
Public Service Announcement
လက်ရှိသတင်းရေးသားချိန်အထိ တရားခံတွေကို ဖမ်းမိခြင်းမရှိသေးဘဲ အခင်းဖြစ်ရာနေရာကို စစ်ကောင်စီတပ်ဖွဲ့ဝင်တွေ လာစစ်နေတယ်လို့ သိရပါတယ်။
လားရှိုးမြို့ဟာ ၁၀၂၇ စစ်ဆင်ရေးနဲ့အတူ ၂၀၂၄ သြဂုတ်လဆန်းမှာ ကိုးကန့်တပ်မတော်(MNDAA) နဲ့မဟာမိတ်တပ်တွေက သိမ်းပိုက်ထိန်းချုပ်ခဲ့တဲ့မြို့ဖြစ်ပါတယ်။ဒါပေမယ့် တရုတ်အစိုးရရဲ့ ဖိအားပေးမှုကြောင့် ပြီးခဲ့တဲ့ ၂၀၂၅ ဧပြီမှာ MNDAAက စစ်ကောင်စီထံပြန်လွှဲပေးခဲ့လို့ လက်ရှိမှာ စစ်ကောင်စီကထိန်းချုပ်ထားပါတယ်။
စစ်ကောင်စီကပြန်လည်ထိန်းချုပ်ပြီးတဲ့နောက်ပိုင်း လားရှိုးမြို့မှာ လုယက်မှုတွေ၊ ဓားပြမှုတွေ၊ ပြန်ပေးဆွဲမှုတွေနဲ့ ခိုးမှုတွေ မကြာခဏဖြစ်နေပါတယ်။
ပြီးခဲ့တဲ့ ၂၀၂၅ စက်တင်ဘာ ၄ရက်ညက လားရှိုးမြို့မှာ နေအိမ်အတွင်း ဝင်ရောက်လာတဲ့ သူခိုးကို ဒေသခံတွေက ဝိုင်းဖမ်းခဲ့စဉ် ဓားနဲ့ ပြန်အခုတ်ခံရပြီး အမျိုးသားနှစ်ဦးဒဏ်ရာရခဲ့ပါတယ်။အောက်တိုဘာလကလည်း မူးယစ်ဆေးကြောင်နေသူတစ်ယောက် မောင်းနှင်လာတဲ့ကားက တိုက်မိလို့ လူသုံးသေဆုံးခဲ့ပါတယ်။
အောက်တိုဘာ ၁၃ရက်နဲ့ သြဂုတ် ၂၁ရက်နေ့ကလည်း လားရှိုးမြို့ ရပ်ကွက်(၇)နဲ့ ရပ်ကွက်(၅)မှာ အမျိုးသမီးတစ်ဦးမောင်းနှင်လာတဲ့ ကားကိုလူတစ်စုက လူမြင်ကွင်းမှာ လုယက်မောင်းနှင်ထွက်ပြေးသွားခဲ့ပါတယ်။ မြို့မှာဖြစ်နေတဲ့အမှုတွေကို စစ်ကောင်စီကအရေးယူခြင်းမရှိသလို လားရှိုးမြို့ မှာ တရားဥပဒေစိုးမိုးမှုမရှိကြောင်း လူမှုကွန်ရက်ပေါ်ဝေဖန်ခဲ့တဲ့ စစ်ဘေးရှောင်အမျိုးသားတစ်ဦးကိုဖမ်းဆီးပြီး ရွေးကောက်ပွဲပျက်ပြားအောင် လှုံ့ဆော်တယ်ဆိုပြီး ထောင်ဒဏ် ၇နှစ်ချမှတ်ခဲ့ပါတယ်။
