မတ် – ၈ ၊ ၂၀၂၆ ၊ နိုင်ပကောင်း/People’s Spring
လိုင်စင်မဲ့ယာဉ်အများစု အသုံးပြုနေကြတဲ့ ကရင်ပြည်နယ်မြို့တော် ဘားအံမြို့မှာမတ်လ ၇ ရက်စတင်ပြီး စက်သုံးဆီဆိုင်တွေက လိုင်စင်မဲ့ယာဉ်တွေကို ဆီမရောင်းပေးတော့သလို ဆီလာဖြည့်နေတဲ့ လိုင်စင်မဲ့ယာဉ်တွေကိုပါ စစ်ကောင်စီအဖွဲ့က ဖမ်းဆီးနေတာကြောင့် ဒေသခံတွေအတွက် အခက်များစွာကြုံနေရတယ်လို့ မြို့ခံသတင်းရင်းမြစ်က ပြောပါတယ်။
ဘားအံမြို့က စက်သုံးဆီဆိုင်ကြီးတွေဟာ လိုင်စင်မဲ့ယာဉ်တွေကို ပြီးခဲ့တဲ့ ရက်ပိုင်း မတ်လ ၇ရက်ကစတင်ပြီး စက်သုံးဆီ လုံး၀ရောင်းချပေးတော့မှာ မဟုတ်သလို လိုင်စင်မဲ့ကား၊ ဆိုင်ကယ်တွေကို စစ်ဆေးတွေ့ရှိရင် အရေးယူဆောင်ရွက်သွားမှာဖြစ်ကြောင်း နဲ့ လိုင်စင်ရှိမော်တော်ယာဉ်တွေအနေနဲ့ ဝှီးတက် (Wheel Tax ) ပြပြီး စက်သုံးဆီဝယ်ယူနိုင်တယ်ဆိုတာကို ဆီဆိုင်တွေ့ရှေ့မှာ ဆိုင်းဘုတ်ချပြီး ကြေညာ ထားပါတယ်။
ဒီလို လိုင်စင်မဲ့ကား၊ ဆိုင်ကယ်တွေကို စက်သုံးဆီဆိုင်တွေက ဆီရောင်းချခွင့်မပေးတော့တာကြောင့် လိုင်စင်မဲ့ယာဉ်အဓိကထားအသုံးပြုနေကြတဲ့ ဘားအံမြို့က ဒေသခံတွေအများစုဟာ သွားရေးလာရေး အခက်အခဲများစွာကြုံတွေ့နေရပြီး စက်သုံးဆီရရှိရေးအတွက် ပြင်ပဆီဆိုင်အသေးစားတွေနဲ့ ရပ်ကွက်ဆိုင်တွေမှာ စျေးကြီးပေးပြီး ဝယ်သုံးနေရတယ်လို့ မြို့ခံသတင်းရင်းမြစ်တွေက ပြောပါတယ်။
Public Service Announcement
“အပြင်ဆိုင်မှာ တစ်လီတာကို ၁၂,၀၀၀(ကျပ်) အထိပေါက်နေပြီ” လို့ မြို့ခံတစ်ဦးက ပြောပါတယ်။
ဘားအံမြို့က ဆီဆိုင်အသေးတွေနဲ့ ရပ်ကွက် ဆိုင်တွေမှာ စက်သုံးဆီစျေးဟာ အရင်က တစ်လီတာကို ၅,၀၀၀ အထိသာ ရှိခဲ့ရာကနေ အခုလက်ရှိ ဆီအခက်အခဲဖြစ်ပေါ်နေတဲ့ အချိန်မှာတော့ တစ်လီတာ ကျပ် ၁၂,၀၀၀ အထိ စျေးတက်သွားတာပါ။
မတ်လ ၇ရက် မနက်ကစပြီး စက်သုံးဆီဆိုင်ကြီးတွေမှာ စစ်ကောင်စီတပ်ဖွဲ့၊ ယာဉ်ထိန်းရဲ၊ ရဲနဲ့ ပြည်သူ့စစ်အဖွဲ့တွေ လာရောက်ပြီး စုံ၊ မ စနစ်အတိုင်း ဆီလာရောက်ဖြည့်နေတဲ့ ယာဉ်တွေကို လိုက်လံစစ်ဆေးတာတွေ လုပ်ဆောင်နေသလို ဆီလာဖြည့်နေတဲ့ လိုင်စင်မဲ့ယာဉ်တွေကိုလည်း ဖမ်းဆီးနေတာကြောင့် ဒေသခံအများစုဟာ အပြင်မထွက်ရဲကြတော့ဘူးလို့ မြို့ခံတစ်ဦးက ပြောပါတယ်။
“ဆီလာထည့်နေတဲ့ ကားဝှစ်သောက်(လိုင်စင်မဲ့)တွေကို ဖမ်းတယ်၊ မြို့ထဲမှာ ဘာမှမရှိတော့ဘူး ကားတွေက၊ဘယ်သူမှထွက်မရဲ ၊ဖမ်းမှာလည်းကြောက်လို့ ရှင်းသွားတယ်ပေါ့” လို့ အဲဒီမြို့ခံကပြောပါတယ်။
ဓာတ်ပုံ – ရိုက်တာ
