မတ်-၁၄၊ ၂၀၂၆။ဟာနာဆန်/People’s Spring
မကွေးတိုင်း၊ ရေစကြိုမြို့နယ်မှာ တော်လှန်ရေးတပ်ဖွဲ့ စခန်း ၂ခု စီးနင်းခံရပြီး ရဲဘော် ၃ဦး ကျဆုံးခဲ့ရကြောင်း ဒေသတွင်းရဲဘော်အချို့က ပြောပါတယ်။
မတ်လ ၁၂ရက် မနက်ပိုင်းမှာ စစ်တပ်က ရေစကြိုမြို့နယ်၊ အနောက်တောင်ဘက်မှာရှိတဲ့ စဥ့်ကိုင်ကျေးရွာအနီးက တော်လှန်ရေးအဖွဲ့တစ်ဖွဲ့ရဲ့ စခန်းကို ဝင်ရောက်စီးနင်းပြီး ရဲဘော် ၃ ဦးကို သတ်ဖြတ်သွားကြောင်း ဒေသတွင်း ရဲဘော်အချို့က ပြောပါတယ်။
ယင်းနောက် ကံသစ်ကျေးရွာအနီးက ပခုက္ကူခရိုင် တပ်ရင်း (၃)စခန်းကိုလည်း ဝင်ရောက်စီးနင်းခဲ့ပြီး ရဲဘော် ၃ဦးကို ဖမ်းဆီးခေါ်ဆောင်သွားကြောင်း ရေစကြိုဒေသတွင်းရဲဘော်အချို့က ပြောပါတယ်။
Public Service Announcement
“ပါသွားတဲ့ရဲဘော်တွေက အရှင်ပါသွားတာလို့သိရတယ်။ စစ်ကြောင်းလာတာမသိပဲအိပ်ပျော်နေတာ။ စစ်ကြောင်းက ဖမ်းခေါ်သွားတာလို့သိရတယ်”လို့ ရဲဘော်တစ်ဦးက ပြောပါတယ်။
စစ်ကောင်စီရဲ့ ဝါဒဖြန့်တယ်လီဂရန်ချန်နယ်တွေမှာတော့ ရဲဘော် ၆ ဦးလုံး သတ်ဖြတ်ခံလိုက်ရတဲ့ပုံတွေနဲ့ ဖြန့်ဝေနေပြီး အတည်ပြုနိုင်ခြင်း မရှိသေးပါဘူး။
အဲဒီစစ်ကြောင်းနဲ့ ရေစကြိုပကဖအဖွဲ့တို့ မိနစ် ၂၀ခန့်တိုက်ပွဲဖြစ်ပွားခဲ့ပြီး ရဲဘော်တစ်ဦး ဒဏ်ရာတွေနဲ့ ပိတ်မိခဲ့လို့ ကယ်ထုတ်ခဲ့ရကြောင်း ရေစကြိုပကဖအဖွဲ့က ပြန်ကြားရေးတာဝန်ခံက ပြောပါတယ်။
“ကျနော်တိုရဲဘော်တွေနဲ့တော့ထိတွေမှုမိနစ်၂၀လောက်ဖြစ်တယ်ဗျ။ ကျနော်တို့ ရဲဘော်တစ်ဦးက ဒဏ်ရာရပြီး ၃ နာရီလောက်ပိတ်မိနေတာ။”လို့ အထက်ပါ ပြန်ကြားရေး တာဝန်ခံက ပြောပါတယ်။
အဲဒီစစ်ကြောင်းဟာ ဒီကနေ့ညနေပိုင်းမှာ မြိုင်မြို့နယ်၊ ထနောင်းခလှကျေးရွာတောင်ဘက်ကိုရောက်ရှိနေကြောင်း ဒေသခံတွေက ပြောပါတယ်။
အဲဒီစစ်ကြောင်းဟာ တပ်မ (၉၉)က စစ်ကြောင်းဖြစ်ပြီး ယခုနှစ် နှစ်စပိုင်းကတည်းက ရေစကြိုနယ်အတွင်း စစ်ကြောင်းထိုးနေကာ ကျေးရွာတွေကိုပါ မီးရှို့ဖျက်ဆီးနေတာကြောင့် ကျေးရွာတွေက ပြည်သူထောင်ချီ ထွက်ပြေးတိမ်းရှောင်နေရပါတယ်။
