မတ်-၂၅၊၂၀၂၆။ရှိန်း/ People Spring’s
မန္တလေးတိုင်း၊ မိုးကုတ်မြို့နယ်မှာ တိုက်ပွဲဝင်နေတဲ့ တော်လှန်ရေးတပ်တွေအားလုံး စစ်ရေးအခြေအနေအရ ဆုတ်ခွာခဲ့တယ်လို့ သတင်းရရှိပါတယ်။
သပိတ်ကျင်းမြို့နယ်၊ တွင်းငယ်ကျေးရွာကနေ မိုးကုတ်- မိုးမိတ်လမ်းကို စစ်တပ်က လမ်းပွင့်သွားပြီး မိုးမိတ်မြို့ဘက်ကစစ်ကြောင်းတွေပါ ထပ်တိုးလာတာ၊ တကောင်းမြို့ကိုစစ်တပ်ကထိန်းချုပ်သွားနိုင်တာ စတာတွေကြောင့် မိုးကုတ်မြို့နယ်မှာတိုက်ပွဲဝင်နေတဲ့ တော်လှန်ရေးတပ်တွေဟာမတ်လ၂၂ရက်ကစပြီး ပြန်ဆုတ်လိုက်ရတာလို့ တော်လှန်ရေးရဲဘော်အချို့က ပြောပါတယ်။
ထောက်ပို့လမ်းကြောင်းတွေ အဆင်မပြေတာရယ်၊ခဲယမ်းမလုံလောက်မှုတွေကြောင့် ပြန်ဆုတ်လိုက်ရတယ်လို့ ဆိုပါတယ်။
Public Service Announcement
“မိုးမိတ်-မိုးကုတ်လမ်းကပိတ်မိသလိုဖြစ်သွားတာ။ စကစက စီးမိသွားတာ။ တွင်းငယ်-မိုးမိတ်ကလည်း လမ်းပွင့်သွားပြီ စကစစီးမိသွားပြီ။ နောက်ဆုတ်ပေးလိုက်ရ”လို့ တော်လှန်ရေးရဲဘော်တဦးက ပြောပါတယ်။
စစ်ရေးအရ အရေးပါတဲ့ တကောင်းမြို့ပြန်ပါသွားတဲ့အတွက် တော်လှန်ရေးတပ်တွေပိတ်မိသွားတာမျိုးဖြစ်တာဖြစ်နိုင်တာကြောင့်ဆုတ်ခွာပေးလိုက်ရတာလို့ သိရပါတယ်။
“အဓိကထောက်ပို့လမ်းကြောင်းပျက်သွားတာ”လို့ အထက်ပါ ရဲဘော်က ပြောပါတယ်။
ဒေသခံတစ်ဦးက ” PDFလေးတွေ သူတို့ ဆုတ်ခွာသွားပြီလို့ လိုင်းပေါ်မှာတင်ထားတယ်။တိုက်ပွဲတွေကအဖြေမပေါ်ဘဲ ဖြစ်နေတာဆိုတော့မကောင်းဘူးလေ။ဘေးကင်းဖို့ လိုတယ်” လို့ ပြောပါတယ်။
လက်ရှိမှာ စစ်တပ်က သပိတ်ကျင်းမြို့နယ်ဘက်က နေထိုးလာတဲ့ စစ်ကြောင်းဟာ တွင်းငယ်ရွာကနေတဆင့် ကျောက်မော်ကျေးရွာအနီးရောက်နေသလို မိုးမိတ်မြို့ဘက်ကနေလည်း စစ်ကြောင်းထိုးလာတယ်လို့ သိရပါတယ်။ မိုးမိတ်နဲ့ မိုးကုတ်မြို့မှာ မိုင်၂ဝကျော် ကွာဝေးပါတယ်။
တရုတ်အစိုးရရဲ့ကြားဝင်မှုနဲ့ TNLA နဲ့ စစ်တပ်တို့တွေ့ဆုံဆွေးနွေးပြီး မိုးကုတ်နဲ့မိုးမိတ်မြို့ကို စစ်ကောင်စီထံ ၂၀၂၅ အောက်တိုဘာမှာပြန်လွှဲပေးခဲ့တာပါ ။TNLA က မိုးကုတ် ၊မိုးမိတ် မြို့ကိုစစ်တပ်ထံလွှဲပြောင်းပေးပေမယ့် PDF ၊ပကဖ နဲ့မဟာမိတ်တပ်တွေက မိုးကုတ်မြို့အပြင်မှာ စစ်တပ်ကို ခုခံတိုက်ခိုက်နေတာပါ။
ဒါကြောင့် လေးလကျော်ကြာမိုးကုတ်မြို့အနီးမှာတိုက်ပွဲတွေ ဖြစ်ခဲ့ပါတယ်။အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD) စစ်ရုံးချုပ်က မိုးကုတ် – မိုးမိတ်ဒေသ စစ်ဆင်ရေးစစ်ဦးစီးအဖွဲ့ကို နိုဝင်ဘာ ၉ရက်နေ့မှာ စတင်ဖွဲ့စည်းခဲ့ပြီး စစ်ကောင်စီစစ်ကြောင်းတွေကိုနိုဝင်ဘာ ၃၀ရက်ကစပြီး တိုက်ခိုက်ခဲ့ပါတယ်။
NUG ကာကွယ်ရေးဝန်ကြီးဌာန က မိုးကုတ်-မိုးမိတ် စစ်ဆင်ရေးအခြေအနေကို ဖေဖော်ဝါရီ ၂၈ ရက်က ထုတ်ပြန်ရာမှာ ၂၀၂၆ ဇန်နဝါရီအတွင်း တိုက်ပွဲကြီး (၇) ကြိမ်၊ဖေဖော်ဝါရီအတွင်း တိုက်ပွဲကြီးငယ်(၁၀) ကြိမ် ဖြစ်ပွားခဲ့တယ်လို့ဆိုပါတယ်။
အဲဒီတိုက်ပွဲတွေမှာ စစ်ကောင်စီတပ်ဖွဲ့ဝင် ၂၁ ဦး သေဆုံးပြီး ဒဏ်ရာရသူတွေလည်းရှိတယ်လို့ဖော်ပြထားပါတယ်။
ဖမ်းမိထားတဲ့ စစ်သုံ့ပန်း တွေကိုလည်း လိုအပ်တဲ့ ဆေးဝါးကုသမှုတွေနဲ့အတူ စနစ်တကျထိန်းသိမ်းထားတယ်လို့အသိပေးထားပါတယ်။နောက်ဆက်တွဲသတင်းတွေ မထုတ်ပြန်သေးသလို မိုးကုတ်မြို့ကနေ တော်လှန်ရေးတပ်အားလုံး ဆုတ်ခွာထားတယ်ဆိုတဲ့သတင်းနဲ့ပတ်သက်လို့လည်း မေးမြန်းနေဆဲဖြစ်ပါတယ်။
ပြည်သူ့ကာကွယ်ရေးတပ်မတော်(မိုးကုတ်ဗျူဟာ)နဲ့ပြည်သူ့လွတ်မြောက်ရေးတပ်မတော်(PLA)တို့ကတော့ မိုးကုတ်၊ မိုးမိတ် စစ်ဆင်ရေးမှာ မဟာမိတ်တွေနဲ့အတူပူးပေါင်းတိုက်ပွဲဝင်ခဲ့ကြောင်းမတ်လ၂၄ ရက်မှာ သတင်းထုတ်ပြန်ထားပါတယ်။
၂၀၂၅ နိုဝင်ဘာလကုန်ပိုင်းက စတင်ပြီး မိုးကုတ်၊ မိုးမိတ်မြို့ကို ဝင်ရောက်လာတဲ့ စစ်ကောင်စီတပ်တွေကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနရဲ့ တိုက်ရိုက် ကွပ်ကဲမှုအောက်ကနေ Myingyan Black Tiger ၊ ဧရာဝတီမြစ်ဝကျွန်းပေါ် တပ်ဖွဲ့၊ မိုးကုတ်၊ မိုးမိတ် စစ်ဦးစီးအဖွဲ့တို့နဲ့အတူ တိုက်ခိုက်ခဲ့တယ်လို့ မိုးကုတ်ဗျူဟာကထုတ်ပြန်ထားပါတယ်။
စစ်ဆင်ရေးမှာ ရဲဘော်တချို့ကျဆုံးခဲ့ပြီး တော်လှန်ရေး ရဲဘော်၊ရဲဘက်အားလုံးရဲ့ အဓိက ရည်မှန်းချက်ဖြစ်တဲ့ ဖက်ဒရယ်ဒီမိုကရေစီစနစ် အကောင်အထည် ဖော်နိုင်တဲ့အထိ ဆက်လက် တိုက်ပွဲဝင်သွားမယ်လို့ ထုတ်ပြန်ထားပါတယ်။
PLAကလည်း ပြည်သူ့ကာကွယ်ရေးတပ်မတော် အမှတ်(၅၁၃) PDF တပ်ရင်း၊ Red Wolves of Mogok တပ်ရင်း၊ မိုးကုတ်ဗျူဟာ၊ Ruby Land PDF (Tri) ဗျူဟာ ရင်း ၄၊ မိုးကုတ်မြို့နယ် ပကဖ၊စစ်ကိုင်း PDF တို့နဲ့ပူးပေါင်းပြီး လနဲ့ချီပြီးတိုက်ပွဲဝင်ခဲ့တယ်လို့ ထုတ်ပြန်ထားပါတယ်။
နွေဦးတော်လှန်ရေးပန်းတိုင်သို့ ဂုဏ်သိက္ခာရှိစွာလျှောက်လှမ်းနေတဲ့ နိုင်ငံတစ်ဝန်းရှိတပ်ရင်း၊တပ်ဖွဲ့တွေက မြင့်မြတ်စွာကျဆုံးခဲ့တဲ့ တော်လှန်ရေးရဲဘော် ၊ရဲဘက် အားလုံးရဲ့ အဓိကရည်မှန်းချက်ဖြစ်တဲ့ ဖက်ဒရယ်ဒီမိုကရေစီ စနစ်အကောင်အထည်ဖော်နိုင်တယ်အထိ မိုးကုတ်ဗျူဟာက ဆက်လက်တိုက်ပွဲဝင်သွားမယ်လို ကတိသစ္စာပြုထားပါတယ် ။အဲဒီလိုတိုက်ပွဲဝင်တဲ့အခါ မိုးကုတ်ဗျူဟာအနေနဲ့ ညီနောင်အဖွဲ့အစည်းတွေနဲ့ အတူလက်တွဲညီညီဆောင်ရွက်သွားမယ်လို့ဖော်ပြထားပါတယ် ။ ကျဆုံးခဲ့တဲ့ အာဇာနည်ရဲဘော်အပေါင်းတို့အား ဦးညွတ်ဂုဏ်ပြုအလေးပြုကြောင်းဆက်လက်ဖော်ပြထားပါတယ် ။
