ဧပြီ – ၁၄ ၊၂၀၂၆ ၊ နိုင်ပကောင်း/People’s Spring
ကရင်ပြည်နယ်၊ မယ်သဝေါ ဒေသက စစ်ကောင်စီတပ်ရဲ့ ကြယ်ပြောင်ခြေကုတ်စခန်းကုန်းသိမ်းတိုက်ပွဲမှာ KNU ၊ PDF ပူးပေါင်းတပ်ဖွဲ့တွေနဲ့အတူပါဝင်တိုက်ခိုက်ခဲ့တယ်လို့ ကျောင်းသားတပ်မတော်(ABSDF)က ဒီနေ့ (ဧပြီ ၁၄ ရက်မှာ) အသိပေးထုတ်ပြန်ပါတယ်။
ထိုင်း – မြန်မာနယ်စပ်မျဉ်းအနီးက ကြယ်ပြောင် စခန်းကို မနေ့ (ဧပြီ ၁၃ ရက်) မနက်ပိုင်းက KNU တပ်မဟာ (၇) နဲ့ပူးပေါင်းတပ်ဖွဲ့တွေက အပြီးသတ်သိမ်းယူခဲ့တာပါ။
အဲဒီစခန်းသိမ်းတိုက်ပွဲမှာ ABSDF ဗဟိုဌာနချုပ် ၊ ဒေါင်းတမန်စခန်းက တပ်ဖွဲ့ဝင်တွေပါဝင်တိုက်ခိုက်ခဲ့တယ်လို့ သတင်းထုတ်ပြန်ချက်မှာဖော်ပြပါတယ်။
Public Service Announcement
စခန်းသိမ်းတိုက်ပွဲမှ လက်နက်ကြီး ။လက်နက်ငယ်တွေ၊ မိုင်းတွေ၊ ခဲယမ်းကျည်ဆံ ဗုံးသီးအများအပြားနဲ့ စစ်သုံးပစ္စည်းတွေ သိမ်းဆည်းရမိခဲ့တယ်လို့ ABSDF က ထုတ်ပြန်ထားတဲ့ မှတ်တမ်းဓာတ်ပုံမှာ ဖော်ပြပါတယ်။
တိုက်ပွဲအတွင်း နှစ်ဖက်ကျဆုံးမှုကိုတော့ မဖော်ပြထားပါဘူး။
ကြယ်ပြောင်ကုန်းစခန်းဟာ လှိုင်းဘွဲမြို့နယ်၊ မြိုင်ကြီးငူ-မယ်သဝေါကားလမ်းအနီးက ပွိုင့်-၉၆၂ စခန်းရဲ့ ကာကင်းစခန်းတစ်ခုပါ။
အရှေ့တောင်တိုင်းစစ်ဌာနချုပ်(ရတခ)လက်အောက်ခံ လှိုင်းဘွဲမြို့နယ်အခြေစိုက် ခလရ(၂၈)တပ်ရင်းရဲ့ ရှေ့တန်းစခန်းတစ်ခုလည်း ဖြစ်ပါတယ်။
မနေ့က စခန်းသိမ်းတိုက်ပွဲမှာ စစ်ကောင်စီတပ်က လေယာဉ်နဲ့ လာရောက်ဗုံးကြဲခဲ့သေးတယ်လို့ KNU စစ်ရေးသတင်းရင်းမြစ်က ပြောပါတယ်။
ဓာတ်ပုံ – ABSDF
