ဧပြီ ၁၄၊၂၀၂၆။ သုည/People’s Spring
စစ်ကိုင်းနဲ့ မကွေးတိုင်းက သပိတ်အဖွဲ့တွေ၊ ဒေသခံတော်လှန်ပြည်သူတွေဟာ စစ်အာဏာရှင်ဆန့်ကျင်ရေးနဲ့ နိုင်ငံရေးအကျဥ်းသားတွေအားလုံးလွတ်မြောက်ရေး လှုပ်ရှားမှုတွေကို ဒီကနေ့ (ဧပြီ ၁၄)မှာ ပြုလုပ်ခဲ့ပါတယ်။
စစ်ကိုင်းတိုင်း ဆားလင်းကြီးမြို့နယ်အတွင်းမှာ ၅/ဆလက လူထုသပိတ်စစ်ကြောင်းက ဦးဆောင်ပြီး တော်လှန်ပြည်သူတွေနဲ့အတူ နိုင်ငံရေးအကျဉ်းသား အားလုံးလွတ်မြောက်ရေး ဆန္ဒပြတောင်းဆိုခဲ့ကြပါတယ်။
ဆန္ဒပြတော်လှန်ပြည်သူတွေက “ နိုင်ငံရေးအကျဉ်းသား အားလုံးလွှတ် Free All Political Prisoners” ဆိုတဲ့ စာသားတွေ ကိုင်ဆွဲပြီး စစ်အာဏာရှင် ကျရှုံးရေးနဲ့ နိုင်ကျဉ်းတွေ လွှတ်ပေးရေးအတွက် တောင်းဆိုခဲ့ကြတာပါ။
Public Service Announcement
မကွေးတိုင်း ငဖဲမြို့နယ် မြစ်ဖျားကျေးရွာမှာလည်း “ စစ်အာဏာရှင် အကြမ်းဖက် ဟန်ပြန်သမ္မတ ပုန်ကန်ကြ” ဆိုတဲ့ စာသားအပါအဝင် စစ်အာဏာရှင်ကို ဆန့်ကျင်တဲ့ စာသားတွေကို လိုက်လံကပ်ခဲ့တယ်လို့ Chin Defence Force Asho က ထုတ်ပြန်ခဲ့ပါတယ်။
အကြမ်းဖက်စစ်ကောင်စီ လက်အောက်ခံ ကျေးရွာအုပ်စု အုပ်ချုပ်ရေးမှူးရုံး နဲ့ အနီးဝန်းကျင်မှာ အဆိုပါ စာတွေ လိုက်လံကပ်ခဲ့ကြောင်း Chin Defence Force Asho က ဖော်ပြခဲ့ပါတယ်။
“ စစ်အာဏာရှင် အကြမ်းဖက် ဟန်ပြသမ္မတ ပုန်ကန်ကြ” ၊ “ မတရား ဖမ်းဆီးခံရသူများ မလွတ်မြောက်သေးဘူး” ၊ “ ကိုယ့်အသိုက်ပြိုမှ ဝမ်းနည်းရမှာမဟုတ်ဘူး တစ်နိုင်ငံလုံးက ငှက်အသိုက်တွေ ပြိုနေတာကို စာနာပေးပါ” ၊ “ ပေါ်တာဆွဲတာကို ငွေ (၃) သောင်း ပေးပြီး ရှောင်နေရတဲ့ ခေတ်ကို မမေ့သွားကြေး” အစရှိတဲ့ စာသားတွေကို လိုက်လံ ကပ်ခဲ့တာပါ။
ဓာတ်ပုံ – ၅/ဆလက လူထုသပိတ်၊ Chin Defence Force Asho
