မေ-၅၊၂၀၂၆၊ရှိန်း/People’s Spring
မန္တလေးတိုင်း၊ တောင်သာမြို့နယ်က သံဘိုရွာမကျေးရွာ လုံခြုံရေးယူဖို့သွားတဲ့ကာကင်း ရဲဘော်တွေရဲ့ကား တိုက်ခိုက်ခံရပြီး ရဲဘော် ၁၁ဦး ကျဆုံးခဲ့တယ်လို့ ဖြစ်စဉ်ကိုသိထားသူတွေက ပြောပါတယ်။
မေလ ၄ရက် မနက် ၉နာရီမှာ သံဘိုရွာမကျေးရွာကို အင်အား ၁၅ဦးခန့် လိုက်ပါလာတဲ့ ကားနဲ့ တော်လှန်ရေး ရဲဘော်တွေသွားရောက်စဉ် စစ်တပ်ကင်းပုံးနဲ့တွေ့ပြီး ပစ်ခတ်ခံခဲ့ရတာလို့ သိရပါတယ်။
မေလ ၄ရက် ညနေပိုင်းအထိ တော်လှန်ရေးရဲဘော် ၁၁ဦးကျဆုံးပြီး ပျောက်ဆုံးရဲဘော်တချို့လည်း ရှိတယ်လို့ သိရပါတယ်။
Public Service Announcement
“ကိုယ့်ဘက်က ကာကင်းအတွက်လုံခြုံရေးသွားတဲ့အချိန် စကစဘက်ကလည်း ကာကင်းကြိုရောက်နေတာ။နှစ်ဖက်လုံး ကာကင်းထုတ်ထားပြီး စောင့်ပစ်ခံရသလိုဖြစ်သွားတာ”လို့ ဖြစ်စဉ်ကို သိရှိထားသူတစ်ဦးက ပြောပါတယ်။
အဲဒီကားပေါ်မှာ မြင်းခြံခရိုင် တပ်ရင်း-၃(တောင်သာ)က ရဲဘော်တွေအများဆုံးပါဝင်ပြီး တိုက်နယ်ပကဖ ကရဲဘော်တွေလည်း ပါဝင်တယ်လို့ သိရပါတယ်။
တောင်သာတပ်ရင်း(၃)ကို လူထုနွေဦးက ဆက်သွယ်နေပေမယ့် ဖုန်းလက်ခံဖြေကြားခြင်းမရှိသေးပါဘူး။
စစ်တပ်ကတော့ သံဘိုကျေးရွာမအနီး မောင်းဝင်လာတဲ့ တော်လှန်ရေးတပ်ဖွဲ့ဝင်တွေကားကို ကြိုတင် စောင့်ကာတိုက်ခိုက်ခဲ့ပြီး ရုပ်အလောင်း ၁၀လောင်း၊ MA-1 (၃)လက်၊ MA-3(၁)လက်၊ Type -81 (၁) လက်၊ BA-63 (၁)လက်၊ BA-100 (၁)လက်၊ ၆၀ မမ(BA-100)ဗုံးသီး (၅)လုံး၊ လက်ပစ်ဗုံး (၃)လုံး၊ ကျည်ကာဦးထုပ် (၉)လုံး၊ ကျည်ကာ အင်္ကျီ (၇)ထည်၊ ကျည်ဘောက်မျိုးစုံ (၈) ဘောက်၊ 4 Wheel Extra cub မော်တော်ယာဥ်တစ်စီးတို့သိမ်းရတယ်လို့ ထုတ်ပြန်ထားပါတယ်။
