ဇွန်-၁၇၊၂၀၂၆။ခိုင်မြတ်/People’s Spring
ရခိုင်ပြည်နယ်၊ဂွမြို့နယ်၊ကျိန္တလီမြို့၊ရမ္မာကျွန်းလူနေကျေးရွာကို အာဏာသိမ်းစစ်တပ်က ဂျက်ဖိုက်တာနဲ့ ပေါင်ငါး ရာ ဗုံး ၃ လုံး ကြဲချခဲ့တာကြောင့် ဒေသခံပြည်သူ ၂ ဦး သေဆုံးပြီး ကလေး ငယ်တွေအပါအဝင် ၈ ဦးထက်မနည်း ဒဏ်ရာရခဲ့တယ်လို့ ဒေသခံတွေက ပြောကြပါတယ်။
ဇွန်လ ၁၅ ရက်နေ့ ညနေပိုင်းမှာ ဗုံးလာကြဲတာဖြစ်ပြီး သေသုံးသွားသူတွေကတော့ အသက် ၅၀ အရွယ် ဦး ဝေလင်းနဲ့ သူ့ရဲ့အိမ်နီးချင်း ၃၈ နှစ်အရွယ် ဒေါ်သူဇာမိုးတို့ဖြစ်ကြပါတယ်။
“ကျွန်မတို့အိမ်နားတဝိုက်မှာကျတာ။ အိမ်နားက ဦးလေးတယောက်သေတယ်။သူ့မိန်းမမှာဆိုရင်ပေါင်ပြတ်သွားတယ်။ တခြားလူတွေလည်း ဒဏ်ရာအရမ်းများတယ်။ သုံးလုံးစလုံး ရွာထဲတည်တည့်ကို ကျတာ။ အရပ်သားတွေ၊ နေတဲ့ရွာ သိရက်နဲ့ တမင်ကြဲတာပါ” လို့ ဗုံးကြဲခံရတဲ့ ရမ္မာကျွန်းကျေးရွာမှ အမျိုးသမီးတဦးက ပြောပါတယ်။
Public Service Announcement
စစ်တပ်ဗုံးကြဲမှုကြောင့်အသက် ၁၁ နှစ်အရွယ် မယွန်းအိစံ၊အသက် ၁၂ နှစ်အရွယ် မအေးမြမွန်၊ အသက် ၄၀ အရွယ် ဒေါ်အေးသန္တာ၊ အသက် ၅၂ နှစ်အရွယ် ဒေါ်ခင်ဖြူ၊ အသက်၄၂ နှစ်အရွယ် ဒေါ်ဆုမြတ်ဝေ(သေဆုံးသွားတဲ့ ဦးဝေ လင်းရဲ့ ဇနီး)၊ အသက် ၇၀ အရွယ် ဒေါ်ခင်ဥ၊အသက် ၂၆ နှစ်အရွယ် ကိုအောင်သူရဝင်းနဲ့ အသက်၅၃ နှစ်အရွယ် ဦးကျော်ညွှန့်ဌေးတို့ ဒဏ်ရာရခဲ့ကြပါတယ်။
ရမ္မာကျွန်းကျေးရွာမှာကျိန္တလီမြို့နဲ့ တစ်မိုင်ကျော်အကွာ ဘင်္ဂလားပင်လယ်ကမ်းခြေ ရေလယ်ကျွန်းပေါ်တည်ရှိတဲ့ ကျေးရွာဖြစ်ပြီး ရေလုပ်ငန်းနဲ့အဓိကသက်မွေးကြတဲ့ ကျေးရွာတခုဖြစ်ပါတယ်။
အာဏာသိမ်းစစ်တပ်ဟာ ပြီးခဲ့တဲ့ဇွန်လ ၁၄ ရက်နေ့ကလည်း ဂွမြို့နယ် ကျောက်ချွန်ရွာကို ဂျက်ဖိုက်တာနဲ့ နှစ်ကြိမ်တိုင် ဗုံးကြဲခဲ့တာကြောင့်အဲဒီရွာစာသင်ကျောင်းထိခိုက်ပျက်စီးသွားခဲ့ပါတယ်။ဒါ့အပြင်အခုရက်ပိုင်းအ တွင်းမှာပင်လယ်ပြင်အတွင်း ရပ်နားထားတဲ့ စစ်ရေယာဉ်(Navy)တွေကနေလည်း လက်နက်ကြီးတွေနဲ့ လူနေ ကျေးရွာတွေ၊ တောင်တန်းတွေကို ပစ်ခတ်တာတွေ ဆက်တိုက်ရှိနေတယ်လို့ဒေသခံအချို့ကပြောပါတယ်။
“ဂွမြို့နယ်မှာ တိုက်ပွဲပြီးတော့ စစ်ရှောင်တွေတချို့ ပြန်ရောက်နေကြပြီ။ အခု စစ်တပ်က ဒီလိုဗုံးတွေကြဲ၊ Navy တွေက ပစ်နေတော့ ထပ်ပြီးတော့ ရှောင်ကြရတယ်။ ဒီကောင်တွေက လူနေတွေကို တမင်နေလို့မရအောင် လုပ်နေ တာ” လို့ ဂွမြို့နယ်မှ လူမှုကူညီရေးလုပ်နေသူတဦးက ပြောပါတယ်။
အာဏာသိမ်းစစ်တပ်ဟာသူတို့လက်လွှတ်ထားရတဲ့ ရခိုင်ပြည်နယ်တောင်ပိုင်အစွန်ဆုံး၊ ဧရာ၀တီတိုင်းနဲ့ အစပ်မြို့ နယ်တွေဖြစ်တဲ့ ဂွ၊ သံတွဲမြို့နယ်တို့အတွင်း ပင်လယ်ပြင်မှာ စစ်ရေယာဉ် ငါးစီးထက်မနည်း အချိန်ပြည့်နေရာ ယူ ထားပြီး ပင်လယ်ကမ်းစပ်ကျေးရွာတွေကို အဓိကပစ်မှတ်ထားတာ လက်နက်ကြီးတွေနဲ့ ခြိမ်းခြောက်ပစ်ခတ်နေ တယ်လို့ ဒေသခံတွေက ပြောကြပါတယ်။
“စစ်တပ်ကကမ်းတက်ဖို့ကြိုးစားနေတဲ့ပုံစံ၊အဲဒါကြောင့်လည်းကမ်းခြေကရွာတွေကို တမင်လိုက်ဖျက်စီးနေတာ၊ လူတွေ နေလို့မရတော့ရင် သူတို့တက်ဖို့လုပ်တာထထင်တယ်။ ဒါပေမယ့် ရခိုင်က မြို့တွေကိုတော့ တန်ပြန် ထိုးစစ် ဆင်ဖို့ဆိုတာ ကျွန်တော့်အမြင် မလွယ်တော့ဘူး” လို့ စစ်ရေးနဲ့ နီးစပ်တဲ့ သံတွဲဒေသခံတဦးက ပြောပါတယ်။
စစ်တပ်ဟာ ဂျက်တိုက်လေယာဉ် သုံးစီးသုံးစီးအထက်နဲ့ ကင်းထောက်လေယာဉ်တွေတပြိုင်တည်းသုံးပြီး လေ ကြောင်းတိုက်ခိုက်မှုတွေ အရင်ကထက် ပြင်းပြင်းထန်ထန် လုပ်လာတာကြောင့် လေကြောင်းအန္တရာယ်ကို အထူး သတိထားကြဖို့ AA က အသိပေးထားပါတယ်။
