ဇွန် ၁၉၊ ၂၀၂၆။ ထားမြတ်/People’s Spring
မြန်မာ့နိုင်ငံရေးပြဿနာများ ငြိမ်းချမ်းစွာပြေလည်စေရေးအတွက် အထူးဦးစားပေးလုပ်ငန်းစဉ်အဖြစ် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများအားလုံး ခြွင်းချက်မရှိ လွတ်မြောက်ရေး အဓိကထား ကြိုးပမ်း ဆောင်ရွက်ပေးကြဖို့ မိတ်ဆွေနိုင်ငံတွကို မေတ္တာရပ်ခံတိုက်တွန်းကြောင်း အမျိုးသားဒီမိုကရေစီအဖွဲ့ချုပ်(NLD)နဲ့ ပြည်နယ်၊ တိုင်းလွှတ်တော်၊ အစိုးရတွေက ဒီကနေ့မှာ ပူးပေါင်း ထုတ်ပြန်လိုက်ပါတယ်။
ဒေါ်အောင်ဆန်းစုကြည်ရဲ့ (၈၁) နှစ်မြောက်မွေးနေ့ မှာ အခုလို စုပေါင်းပြီး သတင်းထုတ်ပြန်ခဲ့တာပါ။
အာဏာသိမ်းစစ်တပ်က ၂၀၂၁ ဖေဖော်ဝါရီ ၁ရက် ကတည်းက ဒေါ်အောင်ဆန်းစုကြည်ကို ဥပဒေမဲ့ ထိန်းသိမ်းထားရာ ရက်ပေါင်း ၁၉၆၅ ရက် ရှိပြီဖြစ်ကာ ဘယ်နေရာမှာ ချုပ်နှောင်ထားတယ်၊ သက်ရှိထင်ရှား ရှိမရှိ မသိရလို့ သားဖြစ်သူ ကိုထိန်လင်း အပါအဝင် မြန်မာပြည်သူ တရပ်လုံးက အထူးစိုးရိမ်ပူပန်နေကြောင်း ဖော်ပြထားပါတယ်။
Public Service Announcement
တဖက်မှာ စစ်အုပ်စုဟာ နေ့စဉ်နဲ့အမျှ ပြည်သူကို ပစ်မှတ်ထား တိုက်ခိုက်ဖမ်းဆီးသတ်ဖြတ်မှုတွေ လုပ်ဆောင်နေကြောင်း၊ မတရားဖမ်းဆီးခံထားရသူ ထောင်ပေါင်းများစွာ ရှိနေကြောင်း အသိပေးပါတယ်။
ဒီလို အခြေအနေမျိုးမှာ မြန်မာနိုင်ငံရဲ့ အနေအထားဟာ စစ်မှန် လွတ်လပ်တဲ့ ဒီမိုကရေစီ အသွင်ကူးပြောင်းရေးကို ဦးတည်နေတယ်လို့ ယူဆဖို့ အလှမ်းကွာ နေကြောင်းလည်း ဖော်ပြထားပါတယ်။
“ အာဆီယံအပါအဝင် နိုင်ငံတကာအသိုင်းအဝိုင်းအနေဖြင့် အတုအယောင် အစိုးရအား ဆောလျင်စွာ အသိအမှတ်ပြုထိတွေ့ဆက်ဆံမှုများ ပြုလုပ်ခြင်းဖြင့် မြန်မာနိုင်ငံကို ပိုမိုရှည်လျားသော နက်ရှိုင်းသည့် ပဋိပက္ခနွံတွင်းသို့ တွန်းပို့သည့် ဖန်တီးမှုမျိုးများ မပြုမိစေရန် ရှောင်ရှားသင့်ပါကြောင်း အကြံပြုပါသည်” လို့ ပူးတွဲ ကြေညာချက်မှာ ဖော်ပြပါတယ်။
အခု ကြေညာချက် ထုတ်ပြန်မှုမှာပါဝင်တဲ့ အဖွဲ့အစည်းတွေကတေ့ NLD၊ ကချင်ပြည်နယ်လွှတ်တော်ကိုယ်စားပြုကော်မတီ၊ ကယားပြည်နယ်လွှတ်တော်သုံး ရပ်ကိုယ်စားပြုကော်မတီ၊ ကရင်ပြည်နယ်လွှတ်တော်ကိုယ်စားပြုကော်မတီ၊ ချင်းပြည်(Chinland) လွှတ်တော်၊ ချင်းပြည် (Chinland) အစိုးရ၊ စစ်ကိုင်းဖက်ဒရယ်ယူနစ်လွှတ်တော်၊ စစ်ကိုင်းဖက်ဒရယ်ယူနစ်ကြားကာလအစိုးရ၊ တနင်္သာရီတိုင်းလွှတ်တော်၊ ပဲခူးဖက်ဒရယ်ယူနစ်လွှတ်တော်၊ မကွေးဖက်ဒရယ်ယူနစ်လွှတ်တော်၊ ကြားကာလမကွေးဖက်ဒရယ်ယူနစ်အစိုးရ၊ မန္တလေးဒေသလွှတ်တော်၊ မန္တလေးဒေသကြားကာလအုပ်ချုပ်ရေးကောင်စီ၊ မွန်ပြည်နယ်လွှတ်တော်ကိုယ်စားပြုကော်မတီ၊ ရှမ်းပြည်နယ်လွှတ်တော်ကိုယ်စားပြုကော်မတီ ၊ ရန်ကုန်ဖက်ဒရယ်ယူနစ်လွှတ်တော်၊ ဧရာဝတီဖက်ဒရယ်ယူနစ်လွှတ်တော် တို့ ဖြစ်ပါတယ်။
