ဩဂုတ်-၁၊၂၀၂၆။ထားမြတ်/People’s Spring
အာရက္ခတပ်တော်(AA) ထိန်းချုပ်ထားတဲ့ အာရက္ခပြည်၊ သံတွဲမြို့ရှိ အပြစ်မဲ့အရပ်သားပြည်သူတွေနေထိုင်ရာကျေးရွာတွေကို အာဏာသိမ်းစစ်တပ်ကလေကြောင်း တိုက်ခိုက်မှုဆက်တိုက်ပြုလုပ်နေကြောင်း AAက ထုတ်ပြန်ခဲ့ပြီး မနေ့က ရွှေလှေကျေးရွာ ဗုံးကြဲမှုမှာ ကလေးငယ်အပါအဝင် ပြည်သူ ၄ဦးသေဆုံးခဲ့ကြောင်း ဖော်ပြပါတယ်။
ဇူလိုင် ၃၁ရက် ညနေပိုင်းမှာ ရွှေလှေရွာကို စစ်တပ် လေယာဉ် ၂စီးက ဗုံး ၃လုံး ကြဲချခဲ့ရာ စျေးဆိုင်တစ်ဆိုင် အနီးကျရောက်ပေါက်ကွဲပြီး ဆိုင်ရှင်လင်မယား ၂ဦးနဲ့ ဝန်ထမ်းအမျိုးသမီး ၁ဦး ပွဲချင်းပြီးသေဆုံးခဲ့ကြောင်းအသိပေးပါတယ်။
ဒဏ်ရာရခဲ့တဲ့ဆိုင်ရှင်ရဲ့သား ၁နှစ် ၄လအရွယ် ကလေးငယ်ဟာလည်း ဗုံးစထိမှန် ပြင်းထန်စွာ ဒဏ်ရာရရှိခဲ့ရာ ဆေးရုံ ပို့ဆောင်စဉ် လမ်းခုလတ်မှာ သေဆုံးခဲ့ကြောင်း ထုတ်ပြန်ပါတယ်။
Public Service Announcement
လေကြောင်းတိုက်ခိုက်မှုကြောင့် စျေးဆိုင်အနီးဝန်းကျင်က ပြည်သူ ၂ဦးလည်း ဒဏ်ရာရရှိခဲ့သလို လူနေအိမ်၊ ဈေးဆိုင်နဲ့ ကား၊ ဆိုင်ကယ်အချို့ ပျက်စီးမှု ရှိခဲ့တယ်လို့ ဖော်ပြပါတယ်။
စစ်တပ်ဟာ ဇူလိုင် ၂၇ရက်ကလည်း သံတွဲမြို့နယ် လင်းမူတောင်ကျေးရွာအနီးရှိ ယခင် “ကျောက်ခွဲစက်ရုံဟောင်း” ရှိသောနေရာကိုလည်း လေကြောင်းတိုက်ခိုက်ခဲ့ပါသေးတယ်။
စစ်တပ်ဟာ တော်လှန်ရေးလက်နက်ကိုင်တပ်တွေကို ဖိအားပေးလိုတာရှိပါက အရပ်သားပြည်သူနေထိုင်ရာ တွေကို ပစ်မှတ်ထား တိုက်ခိုက်တဲ့ ကျူးလွန်မှုတွေ အရင်ကလည်း ရှမ်းမြောက်က တအာင်း၊ ကိုးကန့်ဒေသမှာ ပြုလုပ်ခဲ့ပါတယ်။
နိုင်ငံတဝန်း စစ်မျက်နှာအသီးသီးမှာ အထိနာခဲ့တဲ့ အာဏာသိမ်းစစ်တပ်ဟာ အဲဒီလို အရပ်ဘက်ပစ်မှတ်တွေကို တိုက်ခိုက်ပြီး သက်ဆိုင်ရာဒေသရှိ လက်နက်ကိုင်တော်လှန်ရေးတပ်တွေနဲ့ အပစ်ရပ်ကာ စစ်မျက်နှာနည်းအောင် လုပ်ဆောင်နေတာကိုလည်း တအာင်းနဲ့ ကိုးကန့်ဒေသ ဖြစ်စဉ်တွေမှာ တွေ့ရပါတယ်။
