စစ်တပ်တိုက်​လေယာဥ် ဗုံသွားကြဲရင်း​မှော်ဘီမှာပျက်ကျတာဖြစ်ပြီး ၁ ဦး​သေဟုစစ်​ရေးသတင်းရင်းမြစ်အချို့​ပြော

သြဂုတ်-၃၊၂၀၂၆။တာရာ/People’s Spring

မှော်ဘီမြို့နယ်မှာစစ်တပ်ရဲ့ တိုက်လေယာဉ်တစ်စီး ပျက်ကျခဲ့တာဟာ ​လေ့ကျင့်​ရေးပျံသန်းစဥ် ပျက်ကျတာမဟုတ်ဘဲဗုံးကြဲဖို့ ပျံသန်းစဥ် ပျက်ကျခဲ့တာဖြစ်ပြီး​လေယာဥ်​​​ပေါ်ပါတဲ့ စစ်သား၂ ဦးထဲမှတစ်ဦး​သေဆုံးခဲ့တယ်လို့ စစ်တပ်နဲ့နီးစပ်တဲ့သတင်းရင်းမြစ်အချို့က​ပြောပါတယ်။

ဩဂုတ် ၃ရက် မနက် အစော ၅နာရီလောက်မှာ တိုက်လေယာဉ်ဟာ လေ့ကျင့်ပျံသန်းရေး လုပ်နေစဉ်မှာ ငှက်တစ်ကောင်နဲ့ တိုက်ခိုက်မှုဖြစ်ပြီး အင်ဂျင်ခန်းမီးလောင်လို့ ပျက်ကျခဲ့တာလို့ စစ်တပ်ဝါဒဖြန့် မီဒီယာတွေမှာ ဖော်ပြထားပါတယ်။အဲဒီဖြစ်စဉ်မှာ စစ်တပ် လေယာဉ်မှူး မသေဘဲ ခုန်ထွက်နိုင်ခဲ့ကြောင်းနဲ့ ထိခိုက်ဒဏ်ရာရသူမရှိဘူးလို့ စစ်တပ်ကထုတ်ပြန်ခဲ့ပါတယ်။

ဒါ​ပေမယ့် အဆိုပါတိုက်လေယာဥ်ကဗုံးကြဲဖို့သွားစဥ် အင်ဂျင်ခန်းမီးလောင်လို့ ပျက်ကျခဲ့တာဖြစ်တယ်လို့ စစ်တပ်နဲ့ နီးစပ်တဲ့သတင်းရင်းမြစ်အချို့က​ပြောပါတယ်။

Public Service Announcement

“မနက်အစော ရခိုင်ဘက်ကိုသွားတာ။တိုက်လေယာဥ်ကတစ်စင်းထဲတော့မဟုတ်ဘူး။ နှစ်စင်းတတ်သွားတာ။ပြီးတော့မနက်အစောကြီး။ ရာသီဥတုကလည်းသိပ်မကောင်းဘူး။ ​နောက်တစ်ခုက လေယာဥ်အမှုထမ်းတွေက တောက်လျှောက်မနားရဘူး။ တိုက်ပွဲဖြစ်တဲ့နေရာတွေကိုတောက်လျှောက်သွားနေရတော့ ဒဏ်မခံနိုင်ကြဘူး။ မနက်အ​စောပိုင်းဆို ငှက်​တွကလည်း အိပ်တန်းထနေတဲ့အချိန် တိုက်မိတာနေမှာပေါ့။ငှက်ကအင်ဂျင်ခန်းထဲကိုဝင်သွားတော့ မီးလောင်ပြီးပျက်ကြတာ။ အဲဒီမှာလေယာဥ်မှူးက အရေးပေါ်ခလုတ်နဲ့လေထီဖွင့်ပြီးခုန်ချတော့ အသက်ဘေးကလွတ်တာပေါ့။ အမှုထမ်းကတော့သေတယ်။ လေယာဥ်မှူးကိုတော့ သူတို့စစ်နေတယ်လို့ကြားတယ်” လို့ စစ်တပ်နဲ့နီးစပ်သူတဦးကပြောပါတယ်။

စစ်တပ်​လေယာဥ်ဟာ ဘယ်​ဒေသကို ဗုံးသွားကြဲရင်းပျက်ကျခဲ့တယ်ဆိုတာကို လူထု​နွေဦးအ​နေနဲ့ သီးခြားအတည်မပြုနိုင်​ပါဘူး။ဒါ​ပေမယ့်စစ်တပ်ဟာ အခုရက်ပိုင်းအတွင်း တိုက်ပွဲပြင်းထန်​နေတဲ့ ရခိုင်ပြည်နယ် ၊ရခိုင်ပြည်နယ်နဲ့ ဧရာဝတီတိုင်း၊ပဲခူးတိုင်း၊မ​ကွေးတိုင်းအစပ်​ဒေသ​တွေ နဲ့ ကရင်ပြည်နယ် ၊ချင်းပြည်နယ် ၊မ​ကွေးတိုင်း၊စစ်ကိုင်းတိုင်း ၊ကချင်ပြည်နယ် စတဲ့ ​ဒေသအနှံကို ဗုံး​တွေ ဆက်တိုက်ကြဲ​နေတာဖြစ်ပါတယ်။

သြဂုတ် ၃ ရက်မနက်မှာဆိုရင် စစ်တပ်ကရခိုင်ပြည်နယ် ၊သံတွဲမြို့နယ် ၊ငပလီကမ်း​ခြေရှိဂျိတ္တောအမှတ်(၉)ရပ်ကွက် ကိုမနက်၁၀နာရီ​ကျော်က​နေ ၁၁ နာရီနီးပါးထိ မိနစ် ၃၀ ​ကျော်ကြာတိုက်​လေယာဥ် ၄ စီး ၊Y-12 တစ်စီးနဲ့ ဗုံး ဆက်တိုက် ဗုံးကြဲခဲ့ပါတယ်။ ​လေယာဥ်အုပ်နဲ့ ဗုံး အလုံး ၆၀ ​ကျော်ကြဲတာ​ကြောင့် အနည်းဆုံး​ဒေသခံပြည်သူ ၂ ဦး ဒဏ်ရာရခဲ့တယ်လို့ ​ဒေသခံ​တွေက​ပြောပါတယ် ။

ဒါ့အပြင် သြဂုတ် ၃ ရက်မှာ ကရင်ပြည်နယ်မှာလည်း တိုက်ပွဲ​တွေပြင်းထန်ခဲ့ပြီး စစ်တပ်က မြန်မာ-ထိုင်းနယ်စပ်ကို ​လေ​ကြောင်းတိုက်ခိုက်မှု​တွေ မကြာခဏလုပ်​နေပါတယ်။ သြဂုတ် ၃ ရက်မှာ ​စစ်တပ်ရဲ့တပ်မ ၂၂ လက်​အောက်ခံ ခမရ (၂၀၃) တပ်ရင်းနဲ့ ခမရ(၂၁၀)တို့ဟာ ဒေါနအ​ရှေ့ခြမ်းမှာ စစ်​ကြောင်းထိုးဝင်စဥ် KNLA ဦး​​ဆောင်တဲ့ပူး​ပေါင်းတပ်​တွေတိုက်ခိုက်မှု​ကြောင့် စစ်​ကြောင်းမှူးအပါအဝင်စစ်​ကြောင်းတစ်ခုလုံးပျက်ပြီးလက်နက်ခဲယမ်း​တွေသိမ်းဆည်းရရှိခဲ့တယ်လို့ KNU ကလည်းထုတ်ပြန်ပါတယ် ။

စစ်တပ် တိုက်​လေယာဥ်ပျက်ကျပြီး​​တော့ သြဂုတ် ၃ ရက်မနက်ကတည်းက ညောင်နှစ်ပင်လမ်းခွဲကို စစ်ကားတွေ တောက်လျှောက်သွားနေတာ တွေ့ရတယ်လို့မှော်ဘီမြို့ခံတစ်ဦးကလည်းပြောပါတယ်။

အာဏာသိမ်းစစ်တပ်ဟာ စစ်ရေးပြင်းထန်နေတဲ့ ဒေသတွေအပါအဝင် နိုင်ငံတဝန်း အရပ်သား ပြည်သူတွေကို ပစ်မှတ်ထားတဲ့ လေကြောင်းတိုက်ခိုက်မှုတွေကို နေ့ည မရွေးလုပ်နေတာဖြစ်ပါတယ်။

ဒီလို လေကြောင်းတိုက်ခိုက်ရာမှာ တိုက်ခိုက်ရေးလေယာဉ်တွေကို အုပ်စုလိုက် အသုံးပြု တိုက်ခိုက်နေရုံသာမက Y12 လေယာဉ်တွေကိုလည်း အသုံးပြုလျက်ရှိပြီး ဗုံးအလုံးအရေ အများအပြား ကြဲချတိုက်ခိုက်နေတာဖြစ်ပါတယ်။ နိုင်ငံတစ်ဝန်း​နေ့စဥ်ရက်ဆက် ပတ်ပြီးမနားတမ်းဗုံးကြဲ​နေတာ ၊​လေယာဥ်​မောင်းနဲ့ အမှုထမ်း​တွေ ဆက်တိုက် ဗုံးလိုက်ကြဲ​နေတာ​ကြောင့် ​လေယာဥ်​တွေရဲ့ကြံ့ခိုင်မှု အ​ပေါ် ​မေးခွန်းထုတ်မှု​တွေလည်းရှိ​နေပါတယ်။

အဲဒီလို တိုက်ခိုက်လာမှုအပေါ် တော်လှန်ရေးတပ်တွေကလည်း ခုခံတိုက်ခိုက်မှု လုပ်ခဲ့ရာ ကချင်၊ ရှမ်းမြောက်၊ ကရင်နီ၊ စစ်ကိုင်းနဲ့ မကွေးအပါအဝင် ဒေသအချို့မှာ စစ်တပ်ရဲ့ ရဟတ်ယာဉ်တွေနဲ့ တိုက်လေယာဉ်အချို့ ထိမှန်ပျက်ကျအောင် တိုက်ခိုက်နိုင်ခဲ့တဲ့ ဖြစ်စဉ်တွေလည်းရှိပါတယ်။ ​

People’s Spring စု​ဆောင်းထားတဲ့အချက်အလက်​တွေအရ စစ်တပ်အာဏာသိမ်းပြီး​နောက်ပိုင်း ​တော်လှန်​ရေးတပ်​တွေက တိုက်ခိုက်လို့ စစ်တပ်ရဲ့ တိုက်​လေယာဥ်​တွေအပါအဝင် ​လေယာဥ်မျိုးစုံ နဲ့ ရဟတ်ယာဥ် အစီး​ရေ အနည်းဆုံး ၁၂ စီး ပျက်ကျခဲ့ပြီး ၊ အ​ကြောင်းအမျိုးမျိုး​ကြောင့်ပျက်ကျတဲ့ ​လေယာဥ် ၊ရဟတ်ယာဥ် အနည်းဆုံး ၈ စီးရှိ​နေပြီဖြစ်ပါတယ်။

စစ်တပ်အာဏာသိမ်းပြီး ၅ နှစ်ကျော်ကာလအတွင်း စစ်တပ်ရဲ့လေကြောင်းတိုက်ခိုက်မှုကြောင့် နိုင်ငံတ၀န်းသေဆုံးတဲ့ ပြည်သူ ၆,၀၀၀ နီးပါး ရှိတယ်လို့ အမျိုးသားညီညွတ်ရေးအစိုးရ(NUG)က ထုတ်ပြန်ထားပါတယ်။