မိုးမိတ်မြို့အနီးတိုက်ပွဲ စစ်တပ်၂ရက်ဆက်လေကြောင်းသုံးတိုက်ခိုက်

သြဂုတ်-၁၂၊၂၀၂၆။ကဖေး/People’s Spring

ရှမ်းပြည်နယ်မြောက်ပိုင်းမိုးမိတ်မြို့အနီးမှာ ဒီနေ့ တိုက်ပွဲဆက်ဖြစ်နေပြီး စစ်တပ်က လေကြောင်းကနေ ဗုံးကြဲပြီး လက်နက်ကြီးတွေ ပစ်ခတ်နေပါတယ်။

မိုးမိတ်မြို့ နဲ့ ၂မိုင်ခန့်အကွာညောင်နီရွာမှာဩဂုတ်လ ၁၁ရက်နေ့လယ်၁နာရီခန့်ကစပြီး တိုက်ပွဲဖြစ်ပွား​နေတာပါ ။

“မနက်အစောကြီးကတည်းက လက်နက်ကြီးသံတွေကြားရတာ။ မြို့ထံကနေပါ လှမ်းပစ်နေတာ။ဂျက်ဖိုက်တာကမနက် ၁၀နာရီမှာလာကြဲတာ။တိုက်ပွဲက ပိုပြင်းထန်လာလို့အနီပတဝန်းကျင်က ဒေသခံတွေ ရှောင်ရတော့မယ်”လို့ ဒေသခံတစ်ဦးကပြောပါတယ်။

Public Service Announcement

သြဂုတ် ၁၂ ရက်မနက်ပိုင်းမှာ စစ်တပ်က လေကြောင်းက‌နေ ဗုံးသုံးလုံးကြဲချပြီး နောက်ထပ် ဂျက်ဖိုက်တာရော ရဟတ်ယာဉ်ပါထပ်မံပျံသန်းနေပါတယ်။

ယခုတစ်ကြိမ်ဖြစ်တဲ့တိုက်ပွဲဟာ မိုးမိတ်မြို့အနီးမှာ တပ်စွဲထားတဲ့ ကချင်လွတ်လပ်ရေးတပ်မတော်(KIA) စခန်းကို တိုက်ခိုက်ဖို့နဲ့ မတိုက်ရင်ဖယ်ပေးဖို့စစ်တပ်ကရှမ်းပြည်တိုးတက်ရေးပါတီ၊ရှမ်းပြည်တပ်မတော် (SSPP/SSA)ကိုဖိအားပေးတာကနေ စတင်တာလို့ ဒေသခံသတင်းမြစ်တွေကပြောပါတယ်။

” KIAကိုမတိုက်ရင်မင်းတို့လည်းမနေနဲ့ ဆိုပြီး SSPPကိုစစ်တပ်ကဖိအားပေးတာ။စစ်တပ်က စပစ်တာ။အဲ့ဒီကနေတိုက်ပွဲဖြစ်နေတာ။KIA နဲ့လည်းဖြစ်တယ်။SSPPနဲ့လည်းဖြစ်နေတယ်”လို့ ဒေသခံသတင်းမြစ်တွေကပြောပါတယ်။

တိုက်ပွဲစတင်ဖြစ်ပွားတဲ့ သြဂုတ် ၁၁ ရက်မှာ လေကြောင်းတိုက်ခိုက်မှု​ကြောင့် အရပ်သားထိခိုက်မှုတွေရှိတယ်လို့ လည်း ​ဒေသခံအချို့က​ပြောပါတယ်။

“ရဟတ်ယာဉ်နဲ့ပတ်ပြီး စက်သေနတ်နဲ့ပစ်တာပါ။ အဲဒီလိုပစ်တာတစ်ခါမှကိုမမြင်ဖူးဘူး။ ထိတဲ့အထဲ ဘုန်းကြီးတစ်ပါး ပါတယ်”လို့ ဒေသခံတစ်ဦးကပြောပါတယ်။

SSPP/SSA ဟာ ဝပြည်သွေးစည်းညီညွတ်ရေးတပ်မတော် (UWSA) ဦးဆောင်တဲ့ ပြည်ထောင်စုငြိမ်းချမ်းရေးဆွေးနွေးမှုကော်မတီ(FPNCC)မှာ ပါဝင်ပြီးစစ်တပ်နဲ့ငြိမ်းချမ်းရေးဆွေးနွေးဖို့ နေပြည်တော်ကို ရောက်နေပါတယ်။လက်ရှိဖြစ်ပွားနေတဲ့တိုက်ပွဲနဲ့ပတ်သက်လို့SSPP/SSA ကသတင်းမထုတ်ပြန်သေးပါဘူး။

KIAကတော့ဒေသခံတွေလေကြောင်းအန္တရာယ်သတိပြုကြဖို့ သတိပေးထားပါတယ်။

” စစ်ကောင်စီတပ်ကတော့ အရပ်သားပစ်မှတ်တွေပါ ပစ်နေတာကို သင်ခန်းစာယူပြီး သတိနဲ့ နေကြဖို့ လိုပါတယ်”လို့ KIA ပြန်ကြားရေးတာဝန်ခံ ဗိုလ်မှူးကြီးနော်ဘူက သြဂုတ် ၁၁ ရက်မှာ သတိပေးထားပါတယ်။

မိုးမိတ်မြို့ဟာ၁၀၂၇စစ်ဆင်ရေးနဲ့အတူ တအာင်းအမျိုးသားလွတ်မြောက်ရေးတပ်မတော်(TNLA)နဲ့ မဟာမိတ်​တွေကသိမ်းယူခဲ့တဲ့မြို့ဖြစ်ပါတယ်။ ဒါ​ပေမယ့် တရုတ်အစိုးရရဲ့ကြားဝင်မှုနဲ့ အတူ မိုးမိတ်မြို့၊မိုးကုတ်မြို့​တွေကို ၂၀၂၅ ခုနှစ်၊အောက်တိုဘာလမှာTNLA ကပြန်လွှဲပေးခဲ့တာပါ။ အဲဒီနောက်ပိုင်းနှစ်မြို့နယ်လုံးမှာ ပြန်ဝင်လာတဲ့ စစ်တပ်ကို PDF ၊ပကဖ နဲ့ မဟာမိတ်တွေက တိုက်ခိုက်ခဲ့ကြပါတယ်။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD)စစ်ရုံးချုပ်ကမိုးကုတ်-မိုးမိတ်ဒေသ စစ်ဆင်ရေးစစ်ဦးစီးအဖွဲ့ကို နိုဝင်ဘာလ (၉) ရက်နေ့မှာ စတင်ဖွဲ့စည်းခဲ့ပြီး စစ်ကောင်စီစစ်ကြောင်းတွေကိုနိုဝင်ဘာလ (၃၀) ရက်ကစပြီး တိုက်ခိုက်ခဲ့တာပါ။ဒါပေမယ့် မတ်လဆန်းထဲမှာ တိုက်ပွဲတွေပိုမိုပြင်းထန်လာပြီးတဲ့နောက်ပိုင်း PDFပူးပေါင်းတပ်တွေက နှစ်မြို့စလုံးကနေဆုတ်ခွာခဲ့ရပါတယ်။အဲ့ဒီနောက်ပိုင်း စစ်တပ်က မြို့ထဲမှာ တပ်စွဲထားတာပါ။မိုးမိတ်မြို့နယ်ထဲမှာ KIA၊ PDFနဲ့ ပူးပေါင်းတပ်တွေအပြင် SSPP/SSA လည်း တပ်စွဲထားပါတယ်။

စစ်တပ်ဘက်ကဝါဒဖြန့် တယ်လီဂရန်​တွေက​ညောင်နီရွာနားက KIA နဲ့ PDF စခန်း​ကို စစ်တပ်က ​လေ​ကြောင်း ၊လက်နက်ကြီး​တွေသုံးပြီးတိုက်ခိုက်ခဲ့တယ်လို့ ​ရေးသားဝါဒဖြန့်​နေပါတယ်။

ဒါ​ပေမယ့် ကချင်​ဒေသတိုက်ပွဲ​တွေနဲ့ပတ်သက်ပြီး သတင်း​တွေ ​​ဖော်ပြ​ပေး​နေတဲ့ လူမှုကွန်ယက်စာမျက်နှာအချို့ကညောင်နီရွာအနီးဝန်းကျင် တိုက်ပွဲ​တွေဟာစစ်တပ်နဲ့ SSPP/SSA တို့အကြား တိုက်ပွဲဖြစ်ပွားခဲ့တယ်လို့ဆိုနေတယ်လို့​ရေးသား​​နေတာကို​တွေ့ရပါတယ်။တိုက်ပွဲ​တွေမှာစစ်တပ်ဘက်က အရာရှိ​တွေ​သေဆုံးမှု​တွေရှိပြီး ​လေ​ကြောင်းက​နေ ဗုံးကြဲ​နေတယ်လို့လည်း​ရေးသားထားပါတယ် ။

လက်ရှိမှာ မိုးမိတ်မြို့နဲ့ ဆက်စပ်နေတဲ့ မဘိမ်းမြို့နယ်အပြင်ကချင်ပြည်နယ်ထဲမှာပါဝင်တဲ့ ရွှေကူမြို့နယ်မှာလည်း စစ်ကောင်စီနဲ့ KIA စစ်ရေးတင်းမာနေပါတယ်။