ဩဂုတ် ၁၆၊ ၂၀၂၆။ ထားမြတ်/People’s Spring
ချင်းပြည်နယ်၊ တီးတိန်မြို့နယ်အခြေစိုက် စစ်တပ်ရဲ့ ခလရ(၂၆၉) တပ်ရင်းက တပ်သား ၃ဦး အလင်းဝင်လာကြောင်း PDF ဇိုလဲန်း တပ်ဖွဲ့က သတင်းထုတ်ပြန်ပါတယ်။
တီးတိန်မြို့နဲ့ ကနေဒီတောင်အကြား ဗာလ်ဗုမ်လမ်းခွဲမှာ လုံခြုံရေးကျနေတဲ့ စစ်သား ၃ဦးဟာ ဩဂုတ် ၁၅ရက်က PDF ဇိုလဲန်း တပ်ဖွဲ့ထံ ရောက်ရှိ အလင်းဝင်လာတာလို့ ဆိုပါတယ်။
အလင်းဝင်လာသူတွေ လက်နက်ခဲယမ်း ပါ၊မပါဖော်ပြမထားပေမဲ့ အလင်းဝင်လာတဲ့ စစ်သား ၃ဦးရဲ့ မှတ်တမ်း ပုံဖော်ပြထားပါတယ်။ စစ်ကောင်စီတပ်သားတွေ အလင်းဝင်ရောက်မှု အခြေအနေမေးမြန်းဖို့ PDF ဇိုလဲန်းတပ်ဖွဲ့ထံ ဆက်သွယ်ထားဆဲဖြစ်ပါတယ်။
Public Service Announcement
အရင်ကလည်း ခလရ(၂၆၉) တပ်ရင်းက စစ်ကောင်စီတပ်သားတွေ PDF ဇိုလဲန်းတပ်ဖွဲ့ထံ အလင်းဝင်ရောက်မှုတွေ မကြာခဏ ရှိခဲ့ပါတယ်။
PDF ဇိုလဲန်းဟာ ချင်းညီနောင်အဖွဲ့ဝင် ဒေသကာကွယ်ရေးတပ်ဖွဲ့ဖြစ်ပါတယ်။
တဖက်မှာလည်း စစ်ကောင်စီတပ်က PDF ဇိုလဲန်း တပ်ဖွဲ့ဝင်အချို့ လက်နက်နဲ့အတူ စစ်ကောင်စီထံ အလင်းဝင်ရောက်တာရှိတယ်လို့ ဝါဒဖြန့်မှုတွေရှိပါတယ်။ ဒီအခြေအနေနဲ့ပတ်သက်ပြီး PDF ဇိုလဲန်း စစ်ဦးစီးချုပ် ကိုဂိဒွန်က တပ်ဖွဲ့ဝင်တွေ စစ်ကောင်စီထံ အလင်းဝင်ရောက်မှုမရှိ၊ စစ်တပ်ရဲ့ ဝါဒဖြန့်မှုသာဖြစ်ကြောင်း ပြီးခဲ့တဲ့ရက်ပိုင်းက ပြောထားပါတယ်။
