ဖိလစ်ပိုင်မှာ လူနေ ဧရိယာထဲ စစ်လေယာဉ် ပျက်ကျပြီး ၂၉ ဦးထက်မနည်း သေဆုံး

ဖိလစ်ပိုင် နိုင်ငံမှာ လူနေရပ်ကွက်ထဲ စစ်လေယာဉ်တစ်စီး ပျက်ကျခဲ့ပြီး လူ ၂၉ ဦးထက်မနည်း သေဆုံးသွားကြောင်း သိရပါတယ်။

ဇူလိုင် ၄ ရက်က နိုင်ငံတောင်ပိုင်း၊ ဂျိုလိုမြို့မှာ ပျက်ကျခဲ့တဲ့ လေယာဉ်ပေါ်မှာ စစ်သား အများစု အပါအဝင် လူ ၉၀ ကျော် လိုက်ပါလာခဲ့ပါတယ်။ လေယာဉ် ပျက်ကျပြီး မီးလောင်ကျွမ်းသွားပေမယ့် တော်တော်များများကို အသက်ရှင်လျက် ဆွဲထုတ်နိုင်ခဲ့ကြောင်း ဒေသခံတွေက ပြောပါတယ်။

လေယာဉ် ပျက်ကျမှုမှာ လူ ၅၀ လောက် ဒဏ်ရာရပြီး ၁၇ ဦး ပျောက်ဆုံးနေကြောင်း၊ ထိခိုက်ထားသူတွေကို အနီးမှာရှိတဲ့ စစ်ဆေးရုံ တစ်ခုဆီ အရေးပေါ် တင်ပို့ခဲ့ကြောင်း ဖိလစ်ပိုင် စစ်တပ်က ထုတ်ပြန်ပါတယ်။ C130 Hercules အမျိုးအစား သယ်ယူပို့ဆောင်ရေး လေယာဉ်ကြီးဟာ ကာဂါယန်း ဒီအိုရိုက စစ်သည်တွေကို သယ်ဆောင်လာပြီး ဂျိုလို လေဆိပ်ကို ဆင်းသက်ချိန်မှာ ပျက်ကျသွားတာ ဖြစ်ပါတယ်။

လေယာဉ်က ပြေးလမ်းကို လွဲချော်သွားပြီး ပြန်ဆွဲတင်ဖို့ ကြိုးစားပေမယ့် မအောင်မြင်တော့တာလို့ ဖိလစ်ပိုင် စစ်တပ် အကြီးအကဲ ဗိုလ်ချုပ်ကြီး ဆိုဘီဂျာနာက သတင်းထောက်တွေကို ပြောပါတယ်။ ဒဏ်ရာရသူတွေထဲက ၄ ဦးနဲ့ သေဆုံးသူ ၂ ဦးဟာ မြေပြင်ပေါ်က အရပ်သားတွေလို့လည်း သူက အတည်ပြုခဲ့ပါတယ်။

Public Service Announcement

ဖိလစ်ပိုင် တောင်ပိုင်းက ကျွန်းစုတွေမှာ အစွန်းရောက် အစ္စလာမ်မစ် ခွဲထွက်ရေး လက်နက်ကိုင်တွေ ဖြစ်ကြတဲ့ အဘူဆေယက်ဖ်လို အဖွဲ့အစည်းတွေ လှုပ်ရှားနေတာကြောင့် လုံခြုံရေး အင်အား တိုးမြှင့်ထားပါတယ်။ အခုပျက်ကျတဲ့ လေယာဉ်ဟာ တပ်ကူတွေ လာပို့ပေးတာလို့ ဆိုပါတယ်။ လေယာဉ်ပေါ် ပါလာသူ အားလုံးနီးပါးဟာ စစ်သင်တန်း ဆင်းလာတာ မကြာသေးတဲ့ တပ်သားသစ်တွေလို့လည်း သိရပါတယ်။