ငလျင်လှုပ်ခတ်မှုကြောင့် မဲလ်ဘုန်းမှာ ထိခိုက် ပျက်စီးမှုတွေ ဖြစ်ပေါ်

ရစ်ချ်တာစကေး ၅.၈ အဆင့် ငလျင်တစ်ခု လှုပ်ခတ်မှုကြောင့် မဲလ်ဘုန်းမြို့မှာ ထိခိုက်ပျက်စီးမှုတချို့ ဖြစ်ပေါ်ခဲ့ကြောင်း သိရပါတယ်။

ဒီငလျင်ဟာ ဩစတြေးလျ အရှေ့တောင်ပိုင်း၊ ဗစ်တိုးရီးယား ပြည်နယ်ထဲက မန်းစ်ဖီးလ်ကို ဗဟိုပြုခဲ့တာ ဖြစ်ပါတယ်။ မန်းစ်ဖီးလ်ဟာ ပြည်နယ်မြို့တော် မဲလ်ဘုန်းနဲ့ သိပ်မဝေးပါဘူး။ ငလျင်ရဲ့ သက်ရောက်မှုဒဏ်ကို မဲလ်ဘုန်းမှာ သိသိသာသာ ခံစားခဲ့ရပြီး အဆောက်အအုံတချို့ ထိခိုက် ပျက်စီးမှု ရှိခဲ့ပါတယ်။

စက်တင်ဘာ ၂၂ ရက် မနက်ပိုင်းမှာ ငလျင်လှုပ်ခတ်ခဲ့ပြီးတဲ့နောက် ဝန်ကြီးချုပ် စကော့ မော်ရစ်ဆန်က ထိခိုက်မှု စာရင်းကို စုံစမ်းနေကြောင်း၊ လတ်တလောမှာတော့ သေကြေ ဒဏ်ရာရမှုနဲ့ ပတ်သက်လို့ ဆိုးဆိုးရွားရွား သတင်းမျိုးတွေ မကြားရကြောင်း ပြောကြားခဲ့ပါတယ်။

ငလျင် လှုပ်ရှားမှုကို တောင်ပိုင်း ဩစတြေးလျနဲ့ နယူးဆောက်သ်ဝေးလ်စ် ပြည်နယ်တွေကပါ သက်ရောက် ခံစားခဲ့ရပါတယ်။ ဒါ့အပြင် ရစ်ချ်တာစကေး ၄.၀ နဲ့ ၃.၁ အဆင့် နောက်ဆက်တွဲ ငလျင်ငယ် အနည်းဆုံးနှစ်ခု ထပ်လှုပ်ခဲ့တယ်လို့လည်း သိရပါတယ်။

Public Service Announcement

အမေရိကန်ကို ရောက်နေတဲ့ မော်ရစ်ဆန်က ဩစတြေးလျဟာ ငလျင်လှုပ်ခတ်မှုတွေနဲ့ သိပ်ပြီး ကြုံတွေ့လေ့ မရှိတဲ့ နိုင်ငံ ဖြစ်တာကြောင့် အခုအခြေအနေအတွက် အတော်လေး အထိတ်တလန့် ဖြစ်ခဲ့ကြောင်းလည်း ပြောပါတယ်။ လတ်တလောမှာတော့ ဒေသဆိုင်ရာ အာဏာပိုင်တွေက နောက်ဆက်တွဲ ငလျင်ငယ်တွေ လှုပ်ခတ်နိုင်ခြေအပေါ် သတိပေးချက်တွေ ထုတ်ပြန်ထားပါတယ်။

မဲလ်ဘုန်းမှာ လူဦးရေ ၅ သန်းလောက် နေထိုင်ပြီး ဩစတြေးလျ နိုင်ငံရဲ့ ဒုတိယ အကြီးဆုံးမြို့လည်း ဖြစ်ပါတယ်။ လတ်တလောမှာတော့ ကိုဗစ်ရောဂါ ကူးစက်မှုတွေကြောင့် မြို့ထဲမှာ Lockdown ကြေညာထားကြောင်းလည်း သိရပါတယ်။