Connect with us

Hi, what are you looking for?

LuduNwayOo

နိုင်ငံတကာ

Pfizerနဲ့ Sinovac ကာကွယ်ဆေးတွေ နှစ်ကြိမ် ထိုးထားရုံနဲ့ Omicron ကူးစက်မှုကို မဟန့်တားနိုင်

ဒီဆေးနှစ်မျိုးဟာ ကမ္ဘာအနှံ့မှာ တွင်တွင်ကျယ်ကျယ် အသုံးပြုနေတဲ့ ကိုဗစ် ကာကွယ်ဆေးတွေ ဖြစ်ပါတယ်။ အထူးသဖြင့် ဆင်းရဲနွမ်းပါးတဲ့ ကမ္ဘာ့နိုင်ငံတွေ တော်တော်များများမှာ တရုတ်ရဲ့ ကာကွယ်ဆေးတွေကို မှာယူ သုံးစွဲနေကြရပါတယ်။

အသုံးများတဲ့ ကိုဗစ် ကာကွယ်ဆေး နှစ်မျိုးဟာ နှစ်ကြိမ် အပြည့် ထိုးနှံထားရုံနဲ့ Omicron မျိုးကွဲသစ် ကိုရိုနာဗိုင်းရပ်စ် ကူးစက်မှုတွေကို ဟန့်တားဖို့ လုံလောက်မှာ မဟုတ်ကြောင်း သုတေသန စစ်တမ်းတွေက ဖော်ပြနေပါတယ်။

ဟောင်ကောင် တက္ကသိုလ်က ပညာရှင်တွေဟာ Sinovacနဲ့ Pfizer ကာကွယ်ဆေး နှစ်ကြိမ် ထိုးထားသူတွေ အနေနဲ့ တတ်နိုင်သမျှ မြန်မြန် တတိယအကြိမ် Booster ဆေးတစ်လုံး ထပ်ထိုးကြဖို့ တိုက်တွန်းလိုက်ကြပါတယ်။ ဒီဆေးတွေကို နှစ်ကြိမ် ထိုးထားပြီး လှုံ့ဆော်ပေးတဲ့ ကိုယ်ခံအား Antibody စနစ်ဟာ Omicronကို တားဆီးဖို့ လုံလောက်တဲ့ ပမာဏမျိုး မရှိနိုင်ကြောင်း သုတေသီတွေက ဆိုပါတယ်။

ဟောင်ကောင် တက္ကသိုလ်က ပညာရှင်တွေဟာ Pfizerရဲ့ ကာကွယ်ဆေး နှစ်ကြိမ် ထိုးထားသူ ၂၅ ဦးရဲ့ သွေးရည်ကြည်တွေကို ဓာတ်ခွဲ စစ်ဆေးမှုတွေ ပြုလုပ်ခဲ့ရာမှာ Omicronကို ဟန့်တားနိုင်တဲ့ Antibody ရရှိထားသူ ၅ ဦးသာ တွေ့ရှိခဲ့ပါတယ်။ အဓိပ္ပါယ်ကတော့ Omicronမျိုးကွဲ ကိုရိုနာ ဗိုင်းရပ်စ်ဟာ Pfizerဆေးရဲ့ အာနိသင်ကို ၂၄၊ ၂၅ ရာခိုင်နှုန်း ဝန်းကျင်လောက်သာ ကျန်တော့တဲ့ထိ လျော့နည်းသွားနိုင်တယ် ဆိုတာမျိုး ဖြစ်ပါတယ်။ တောင်အာဖရိကမှာ ကနဦး စမ်းသပ်ခဲ့ချိန်တုန်းကတော့ Omicronဟာ Pfizerရဲ့ ကာကွယ်ဆေးကို ၃၃ ရာခိုင်နှုန်းလောက်ထိ အာနိသင် ကျဆင်းစေနိုင်တယ်လို့ ညွှန်ပြထားပါတယ်။ Sinovacက ထုတ်လုပ်တဲ့ ကာကွယ်ဆေးကို ၂ ကြိမ် ထိုးနှံထားသူတွေဆီက သွေးရည်ကြည်ကို ဟောင်ကောင် တက္ကသိုလ်မှာ စမ်းသပ် စစ်ဆေးခဲ့တဲ့ အခါမှာတော့ Omicronကို ဟန့်တားနိုင်တဲ့ Antibody လှုံ့ဆော်မှု ရှိနေသူ တစ်ဦးမှ မတွေ့ခဲ့ပါဘူး။

အမေရိကန် ကုမ္ပဏီ Pfizerက ကာကွယ်ဆေး တတိယအကြိမ် Booster ထိုးထားရင်တော့ Omicron ကူးစက်မှုတွေကို အတော်လေး ထိထိရောက်ရောက် ဟန့်တားနိုင်စွမ်း ရှိနေဆဲလို့ ပြောကြားထားပါတယ်။ တရုတ် ကုမ္ပဏီ Sionvacကလည်း တတိယအကြိမ် ကာကွယ်ဆေး Booster ထိုးထားမယ်ဆိုရင် Omicronအတွက် လုံလောက်တဲ့ Antibody ထွက်နိုင်တယ်လို့ ဆိုပါတယ်။

ဒီဆေးနှစ်မျိုးဟာ ကမ္ဘာအနှံ့မှာ တွင်တွင်ကျယ်ကျယ် အသုံးပြုနေတဲ့ ကိုဗစ် ကာကွယ်ဆေးတွေ ဖြစ်ပါတယ်။ အထူးသဖြင့် ဆင်းရဲနွမ်းပါးတဲ့ ကမ္ဘာ့နိုင်ငံတွေ တော်တော်များများမှာ တရုတ်ရဲ့ ကာကွယ်ဆေးတွေကို မှာယူ သုံးစွဲနေကြရပါတယ်။

တောင်အာဖရိက နိုင်ငံမှာ စတင် တွေ့ရှိခဲ့တဲ့ Omicron မျိုးကွဲ ကိုရိုနာ ဗိုင်းရပ်စ်ဟာ မျိုးဗီဇ ပြောင်းလဲမှုတွေ ထူထူထပ်ထပ် ဖြစ်ပေါ်နေပြီး ရှိရင်းစွဲ ကာကွယ်ဆေးတွေရဲ့ အာနိသင်ကို လျော့ကျသွားစေတာမျိုး ဖြစ်ကောင်း ဖြစ်နိုင်တယ်လို့ ကမ္ဘာ့ကျန်းမာရေး အဖွဲ့ကြီး (WHO)က ပြောကြားထားပါတယ်။ ပြီးတော့ Omicronဟာ ကြုံဖူးသမျှ Sars-Cov-2 ကိုရိုနာဗိုင်းရပ်စ် မျိုးကွဲ အားလုံးမှာ ကူးစက်နှုန်း အမြင့်ဆုံး အမျိုးအစား ဖြစ်တယ်လို့လည်း WHOက အတည်ပြုထားပါတယ်။

You May Also Like

နိုင်ငံတကာ

တရုတ်လက်အောက်ခံ မြို့ပြနိုင်ငံငယ်ရဲ့ အစိုးရ အဖွဲ့က လီရဲ့ ဆေးစစ်ရလဒ် အဖြေဟာ Positive ဖြစ်ခဲ့ကြောင်း နိုဝင်ဘာ ၂၁ ရက်မှာ အတည်ပြု ထုတ်ပြန်ပါတယ်။

နိုင်ငံတကာ

ရှိုက်သွင်းရတဲ့ ကာကွယ်ဆေးကို တရုတ် ဆေးကုမ္ပဏီ CanSino Biologicsက တီထွင်ခဲ့ပါတယ်။ ဒီဆေးဟာ လူသားတွေအတွက် ဆိုးကျိုး မရှိသလောက်နည်းတဲ့ တုပ်ကွေးဗိုင်းရပ်စ် တစ်မျိုးကို အခြေခံပြီး တီထွင် ထုတ်လုပ်ထားကြောင်း သိရပါတယ်။

သတင်း

NUG အစိုးရ၏ ကျန်းမာရေးဝန်ကြီးဌာနကလည်း ​မြန် မာနိုင်ငံတွင် ရက်သတ္တနှစ်ပတ်အတွင်း ကိုဗစ်ရောဂါကူးစက်ပြန့်ပွားမှု နှစ်ဆတိုးလာသည်ကိုတွေ့ရကြောင်း ကမ္ဘာ့ကျန်းမာရေးအဖွဲ့(WHO)၏စာရင်းများကို ကိုးကားပြီး သတိပေးသည်။

သတင်း

စစ်​ကောင်စီလက်​အောက်တွင် ကျန်းမာ​ရေး​စောင့်​ရေး​စောင့်​ရှောက်မှုစနစ်ပျက်ယွင်း​နေပြီး ကိုဗစ်ကူးစက်မှုအ​ခြေအ​နေမှန်ကိုသိရှိရန်ခက်ခဲသည်။