ဂါဇာ ကမ်းမြှောင်ဒေသမှာ ပြုလုပ်ခဲ့တဲ့ လေကြောင်း တိုက်ခိုက်မှုတွေအတွင်း လူသိများတဲ့ စစ်သွေးကြွ ခေါင်းဆောင် ၃ ဦးကို ရှင်းလင်းနိုင်ခဲ့တယ်လို့ အစ္စရေးက ကြေညာပါတယ်။
ပါလက်စတိုင်း ကျန်းမာရေးဌာန တာဝန်ရှိသူတွေက မေလ ၈ ရက်၊ အစ္စရေးရဲ့ လေကြောင်း တိုက်ခိုက်မှုတွေအတွင်း ဂါဇာမှာ ၁၂ ဦး သေဆုံးခဲ့ကြောင်း ထုတ်ပြန်ပါတယ်။ သေဆုံးသူတွေထဲမှာ အမျိုးသမီး ၃ ဦးနဲ့ ကလေး ၃ ဦး ပါဝင်ခဲ့ပြီး နောက်ထပ် ၂၀ လောက် ထိခိုက်ဒဏ်ရာတွေ ရရှိခဲ့တယ်လို့ ဆိုပါတယ်။
အစ္စရေးက လေကြောင်း တိုက်ခိုက်မှုတွေအတွင်း ပါလက်စတိုင်း အရပ်သားတွေ သေဆုံးမှုနဲ့ ပတ်သက်လို့ တိတိကျကျ မှတ်ချက် မပေးပေမယ့် အစ္စလာစ်မစ် ဂျီဟတ် စစ်သွေးကြွ ဦးစီးအရာရှိ ၃ ဦးကိုတော့ သုတ်သင်နိုင်ခဲ့ကြောင်း ထုတ်ပြန်ပါတယ်။
အခုလို လေကြောင်း တိုက်ခိုက်မှုတွေ လုပ်ဆောင်တာဟာ အစ္စရေး ပြည်သူတွေရဲ့ အသက်အိုးအိမ်ကို ထိပါးလောက်တဲ့ ခြိမ်းခြောက်မှုတွေကို လက်တုံ့ပြန်ဖို့ ဖြစ်တယ်လို့လည်း အစ္စရေးက အကြောင်းပြပါတယ်။
Public Service Announcement
ပြီးခဲ့တဲ့ ရက်ပိုင်းတွေအတွင်း ဂါဇာကနေ အစ္စရေး ပိုင်နက်ဖက်ကို ဒုံးကျည်တွေနဲ့ ပစ်ခတ် တိုက်ခိုက်ခဲ့ပြီး ဒီလို ကိစ္စတွေ ရပ်တန်းက မရပ်မချင်း အကြမ်းနည်းတဲ့ တုံ့ပြန်မယ်လို့လည်း အစ္စရေး စစ်တပ်က သတိပေးထားပါတယ်။
မေလ ၈ ရက် မနက် အရုဏ်မတက်ခင်က တိုက်ခိုက်မှုမှာ အစ္စရေး စစ်လေယာဉ်နဲ့ ရဟတ်ယာဉ် အစီး ၄၀ လောက်ဟာ ဂါဇာကမ်းမြှောင် အနှံ့အပြားက အစ္စလာမ်မစ် စစ်သွေးကြွ အဖွဲ့တွေရဲ့ စစ်ရေးပစ်မှတ်တွေကို တပြိုင်တည်းနီးပါး တိုက်ခိုက်ခဲ့ပါတယ်။ အစ္စရေးရဲ့ စစ်ဆင်ရေးတွေအတွင်း အရပ်သား နေအိမ်တွေ ထိခိုက် ပျက်စီးခဲ့သလို ဂါဇာ ဒေသခံတွေ အထိတ်တလန့် ဖြစ်ခဲ့ပါတယ်။
ဟားမားစ် ပြောက်ကျားအဖွဲ့တွေ အဓိက ထိန်းချုပ်ထားရာ နယ်မြေဖြစ်ပေမယ့် ဂါဇာကမ်းမြှောင်မှာ အစ္စရေးရဲ့ ရန်သူတော် တခြား အစ္စလာမ်မစ် လက်နက်ကိုင် အဖွဲ့အစည်း တချို့လည်း လှုပ်ရှားနေပါတယ်။ အစ္စလာမ်မစ် ဂျီဟတ် စစ်သွေးကြွ အဖွဲ့တစ်ခုဖြစ်တဲ့ အယ်လ်ကွက်ဒ်စ် တပ်ရင်းက သူတို့ရဲ့ ခေါင်းဆောင်ပိုင်း ၃ ဦးဟာ အစ္စရေးရဲ့ တိုက်ခိုက်မှုတွေအတွင်း သေဆုံးခဲ့ကြောင်း အတည်ပြု ဝန်ခံသွားပါတယ်။
ထင်ရှားတဲ့ ပါလက်စတိုင်း စစ်သွေးကြွ အဖွဲ့ဝင်ဟောင်း တစ်ဦးဟာ အစ္စရေးရဲ့ ဖမ်းဆီးထိန်းသိမ်းမှုကို ခံရချိန်အတွင်း အစာငတ်ခံ ဆန္ဒပြရင်း သေဆုံးသွားတဲ့နောက် အစ္စရေးနဲ့ ပါလက်စတိုင်း တင်းမာမှုတွေ မြင့်တက်နေပြီး အစ္စလာမ်မစ် ဂျီဟတ် အဖွဲ့ကလည်း အစ္စရေးနယ်မြေတွေကို ဒုံးကျည်တွေနဲ့ စတင် တိုက်ခိုက်ခဲ့တာ ဖြစ်ပါတယ်။
