ရုရှားစစ်တပ်ဟာ ကိုယ့်ရဟတ်ယာဉ်ကိုယ် မှားယွင်း ပစ်ချမိခဲ့တယ်လို့ ယုံကြည်ရတဲ့ ဗီဒီယို မှတ်တမ်းတစ်ခု ထွက်ပေါ်လာခဲ့ပါတယ်။
မေလ ၁၃ ရက်က ယူကရိန်းနဲ့ နယ်စပ်နားမှာရှိတဲ့ ကလင်ဆီမြို့မှာ ရုရှား ရဟတ်ယာဉ်တစ်စီး ပျက်ကျမှု ဖြစ်ပွားခဲ့ပါတယ်။ အစိုးရပိုင် Tass သတင်း အေဂျင်စီက အဲဒီ ရဟတ်ယာဉ်ဟာ အင်ဂျင် မီးလောင်မှုကြောင့် မတော်တဆ ပျက်ကျခဲ့တယ်လို့ ဖော်ပြခဲ့ပါတယ်။
ဒါပေမဲ့ ရုရှားရဲ့ စစ်ထောက်ခံရေး Telegram channel တစ်ခုမှာ တင်ထားတဲ့ ဗီဒီယိုမှာတော့ ရဟတ်ယာဉ်ဟာ အမြင့်မှာ ပျံသန်းနေချိန် တစ်ခုခု ထိမှန်လို့ ပေါက်ကွဲသွားပြီး မြေပြင်ပေါ် စိုက်ဆင်းသွားခဲ့တာ တွေ့ရပါတယ်။ ပြီးတော့ ပျက်ကျသွားတဲ့ အချိန်မှာ အပြင်းအထန် မီးလောင်ကျွမ်းခဲ့ပါတယ်။
အဲဒီ ရဟတ်ယာဉ်ဟာ Mi-8 အမျိုးအစားလို့ ယုံကြည်ရပြီး မျက်မြင်တွေကလည်း ပျက်မကျခင် ပေါက်ကွဲသံကြီး ကြားလိုက်ရတယ်လို့ ပြောပါတယ်။ ရုရှား လေကြောင်း ကာကွယ်ရေး တပ်ဖွဲ့တွေက ကိုယ့်ရဟတ်ယာဉ်ကိုယ် မှားပစ်ချမိတယ်ဆိုတဲ့ သတင်းတွေ ပျံ့နှံ့နေပေမယ့် တိတိကျကျတော့ အတည်မပြုနိုင်သေးပါဘူး။
Public Service Announcement
ယူကရိန်းကလည်း နယ်စပ်နားက ကလင်ဆီမြို့မှာ ရုရှားရဲ့ Mi-8 ရဟတ်ယာဉ်ကို ပစ်ချခဲ့တယ်လို့ ထုတ်ပြန်တာမျိုး မရှိပါဘူး။ Mi-8တွေကို ရုရှားမှာ စစ်တပ်ရော၊ အရပ်ဖက်ပါ သယ်ယူပို့ဆောင်ရေးအတွက် အဓိက အသုံးပြုကြပါတယ်။
ပြီးခဲ့တဲ့ လကလည်း ရုရှားစစ်တပ်ရဲ့ SU-34 အမျိုးအစား တိုက်လေယာဉ် တစ်စီးဟာ ရုရှားမြို့ တစ်ခုဖြစ်တဲ့ ဘယ်လ်ဂိုရတ်ဒ်မှာ မှားယွင်း ဗုံးကြဲမိတာကြောင့် ပြည်သူတချို့ ထိခိုက်ဒဏ်ရာ ရခဲ့သလို မြို့ထဲမှာလည်း ပျက်စီးမှုတွေ ဖြစ်ပေါ်ခဲ့ပါတယ်။
