အသစ် ခန့်အပ်လိုက်တဲ့ ပေါင်းစည်းဆောင်ရွက်ရေး ဝန်ကြီးဟာ မြောက်ကိုရီးယားအပေါ် ပျော့ပျော့ပျောင်းပျောင်း ဆက်ဆံမယ့်သူ မဟုတ်ဘူးလို့ တောင်ကိုရီးယား သမ္မတ ယွန်ဆွတ်ခ်ယိုလ်က သတိပေး ပြောကြားလိုက်ပါတယ်။
တောင်ကိုရီးယား အစိုးရ အဖွဲ့ထဲမှာတော့ ပေါင်းစည်းဆောင်ရွက်ရေး ဝန်ကြီးဌာနဟာ ခါးသီးပြိုင်ဘက် မြောက်ကိုရီးယားနဲ့ ထိတွေ့ဆက်ဆံမှုဆိုင်ရာ မူဝါဒတွေကို အဓိက အကောင်အထည်ဖော် ကိုင်တွယ်ရတာ ဖြစ်ပါတယ်။ သမ္မတ ယွန်ဟာ ပြီးခဲ့တဲ့ ရက်ပိုင်းကမှ ကင်မ်ယွန်ဟိုကို ပေါင်းစည်းဆောင်ရွက်ရေး ဝန်ကြီးအဖြစ် ခန့်အပ်ထားခဲ့တာပါ။
ယွန်က အရင်တုန်းကဆိုရင် အဲဒီ ဝန်ကြီးဌာနဟာ မြောက်ကိုရီးယားကို ထောက်ပံ့ရေး ပစ္စည်းတွေ ပေးပို့နိုင်ရေး တစ်ခုတည်းကိုပဲ အဓိက အားစိုက်လေ့ ရှိတယ်လို့ ဝေဖန်ပါတယ်။ ပေါင်းစည်း ဆောင်ရွက်ရေး ဝန်ကြီးဌာနဟာ မြောက်ကိုရီးယားအတွက် ထောက်ပံ့ရေး အေဂျင်စီ တစ်ခုလို အလုပ်လုပ်နေတယ် ဆိုတာက သိပ်ကို မှားယွင်းတယ်လို့လည်း သူက ဆိုပါတယ်။
ဝန်ကြီးအသစ် ကင်မ်ဟာ ကွန်ဆာဗေးတစ် တစ်ဦးဖြစ်ပြီး မြောက်ကိုရီးယား အစိုးရရဲ့ လူ့အခွင့်အရေး ချိုးဖောက်မှုတွေနဲ့ ပတ်သက်ရင် ပွင့်ပွင့်လင်းလင်း လူသိရှင်ကြား ဝေဖန်လေ့ရှိသူ တစ်ဦး ဖြစ်ပါတယ်။ လောလောဆယ် ကိုရီးယား ကျွန်းဆွယ်မှာ တင်းမာမှုတွေ မြင့်တက်နေတဲ့တိုင် ကင်မ်ရဲ့ ရပ်တည်မှုမျိုးဟာ ပေါင်းစည်းဆောင်ရွက်ရေး ဝန်ကြီးဌာနအတွက် အမှန်တကယ် လိုအပ်တယ်လို့ သမ္မတ ယွန်က ယုံကြည်နေပါတယ်။
Public Service Announcement
ပေါင်းစည်း ဆောင်ရွက်ရေး ဝန်ကြီးဌာနဟာ အမှန်တကယ် ပြောင်းလဲရတော့မှာ ဖြစ်ကြောင်း၊ ဝန်ကြီးအသစ်ဟာ မြောက်ကိုရီးယားကို ပျော့ပျော့ပျောင်းပျောင်း ချဉ်းကပ်နေမယ့် သဘော မရှိကြောင်း ယွန်က ပြောခဲ့တယ်လို့ ပြည်တွင်း မီဒီယာတွေမှာ ဖော်ပြထားပါတယ်။
နောက်ပြီး သမ္မတဟာ ဝန်ကြီးဌာန အနေနဲ့ လစ်ဘရယ် ဒီမိုကရက် စံနှုန်းတွေကို ပိုမို အလေးထားဖို့၊ လူ့အသက်တွေနဲ့ ပတ်သက်ရင် ပိုမိုကောင်းမွန်တဲ့ စီမံကိုင်တွယ်မှု၊ ရပ်တည်မှုမျိုးတွေ ပြသဖို့လည်း တိုက်တွန်းခဲ့ကြောင်း သိရပါတယ်။
၂၀၁၉ တုန်းက ကင်မ်ရေးသားဖူးတဲ့ အွန်လိုင်း အမြင်ဆောင်းပါး တစ်ခုမှာဆိုရင် မြောက်ကိုရီးယားမှာ ကင်မ်ဂျုံအန်း အစိုးရ ပြုတ်ကျပြီး တစ်နိုင်ငံလုံး အမှန်တကယ် လွတ်လပ်သွားမှသာ နှစ်နိုင်ငံ ပြန်လည် သင့်မြတ်ရေး လမ်းကြောင်းတွေကို ထူထောင်သင့်တယ်လို့ ဝေဖန် ထောက်ပြထားခဲ့ပါတယ်။
