မက္ကဆီကိုနိုင်ငံမှာ ပြီးခဲ့တဲ့ သီတင်းပတ်က ဝင်ရောက် တိုက်ခတ်သွားတဲ့ ဟာရီကိန်း မုန်တိုင်းကြီး အိုတစ်ဟာ တိုင်းတာ ရရှိဖူးသမျှ အမြင့်ဆုံး လေတိုက်နှုန်းတွေ စာရင်းထဲ ပါဝင်လာခဲ့တယ်လို့ သိရပါတယ်။
Category 5အဆင့် မုန်တိုင်းကြီး ဖြတ်သန်းသွားခဲ့တဲ့ အကာပူလ်ကို ဒေသနားက မိုးလေဝသ ဌာနတစ်ခုဟာ မုန်တိုင်းရဲ့ လေတိုက်နှုန်း အမြင့်ဆုံး တနာရီ ၂၀၅ မိုင်နှုန်း (တနာရီ ၃၃၀ ကီလိုမီတာနှုန်း)ကို တိုင်းတာ ရရှိခဲ့တယ်လို့ ဆိုပါတယ်။ ဒါဟာ လူ့သမိုင်းမှာ လေတိုက်နှုန်းတွေကို သိပ္ပံနည်းကျ တိုင်းတာခဲ့တဲ့ မှတ်တမ်းတွေထဲမှာ အားအပြင်းဆုံး ထိပ်တန်း ၁၀ ခု စာရင်းဝင် ဖြစ်လာစေပါတယ်။
နာမည်ကြီး အပန်းဖြေ ကမ်းခြေတွေကြောင့် ထင်ရှားတဲ့ အကာပူလ်ကိုမှာ မုန်တိုင်းကြောင့် လူ ၄၀ ကျော် သေဆုံးပြီး ထိခိုက်ပျက်စီးမှု တန်ဖိုးကလည်း ဒေါ်လာ ၁၀ ဘီလီယံထက်မနည်း များပြားခဲ့ပါတယ်။
အမေရိကန်နဲ့ တခြားနိုင်ငံတချို့က မိုးလေဝသ ဌာနတွေကလည်း ဆိုင်ကလုန်း အိုတစ်ဟာ လူ့သမိုင်းမှာ ကြုံဖူးသမျှ အားအပြင်းဆုံး စာရင်းဝင် လေတိုက်နှုန်းမျိုး ထွက်ပေါ်လာစေတယ်လို့ အတည်ပြုခဲ့ပါတယ်။ သမိုင်းတလျှောက် တိုင်းတာ ရရှိဖူးသမျှ အပြင်းဆုံး လေတိုက်နှုန်းကတော့ ၁၉၉၆ ခုနှစ်၊ ဧပြီလတုန်းက ဩစတြေးလျရဲ့ ဘာရိုးကျွန်းကို ဆိုင်ကလုန်း မုန်တိုင်း အိုလီဗီရာ ဝင်ရောက်ခဲ့ချိန်က ကြုံခဲ့တာဖြစ်ပြီး တစ်နာရီ ၂၅၃ မိုင်နှုန်းထိ အားကောင်းခဲ့ပါတယ်။
Public Service Announcement
မြန်မာနိုင်ငံမှာ အကြီးအကျယ် ထိခိုက်ပျက်စီးမှုတွေ ကြုံတွေ့စေခဲ့ဖူးတဲ့ နာဂစ် ဆိုင်ကလုန်း မုန်တိုင်းရဲ့ အမြင့်ဆုံး လေတိုက်နှုန်းကတောင် တစ်နာရီကို ၁၃၅ မိုင်နှုန်းထိသာ ရောက်ရှိခဲ့ပါတယ်။
အိုတစ်ဟာ မက္ကဆီကို နိုင်ငံအတွက် ကြုံဖူးသမျှ အဆိုးဆုံး သဘာဝ ကပ်ဘေးတခု ဖြစ်လာပြီး ပြန်လည် ထူထောင်ရေး လုပ်ငန်းတွေအတွက် အစွမ်းကုန် ပံ့ပိုး ကူညီသွားမယ်လို့ အစိုးရက ကြေညာထားပါတယ်။ နောက်ပြီး ကယ်ဆယ်ရေး ကဏ္ဍအပြင် မုန်တိုင်း နောက်ဆက်တွဲ လုယက်မှု ပြဿနာတွေကို ဖြေရှင်းဖို့အတွက် မုန်တိုင်းဒဏ်သင့် ဒေသမှာ ရဲတွေအပြင် မက္ကဆီကို စစ်တပ်ကိုပါ ဖြန့်ကျက်ထားရပါတယ်။
မုန်တိုင်း တိုက်ခတ်ပြီးတာ တစ်ပတ်ကျော် ကြာမြင့်ခဲ့ပြီ ဖြစ်ပေမယ့် လမ်းပန်း ဆက်သွယ်ရေး ပြတ်တောက်နေရာ အစွန်အဖျား ဒေသတချို့ကို ကယ်ဆယ်ရေး အဖွဲ့တွေ သွားရောက်ဖို့ ခက်ခက်ခဲခဲ ရုန်းကန်ရတဲ့ အခြေအနေတွေ ရှိနေဆဲလို့လည်း သိရပါတယ်။
