မြောက်ကိုရီးယားခေါင်းဆောင် ကင်မ်ဂျုံအန်းဟာ တောင်ကိုရီးယားရဲ့မြို့တော် ဆိုးလ်ရဲ့ ပုံစံငယ်ကို ကြည့်ရှုစစ်ဆေးခဲ့ပြီး လိုအပ်လာရင် ရန်သူကို ချေမှုန်းနိုင်ရေး အသင့်တပ်လှန့် ပြင်ဆင်ထားဖို့ မြောက်ကိုရီးယား စစ်တပ်က ညွှန်ကြားခဲ့ကြောင်း သိရပါတယ်။
မြောက်ကိုရီးယား အစိုးရ မီဒီယာတွေက ဖော်ပြတဲ့ ဓာတ်ပုံတွေမှာတော့ ကင်မ်ဟာ အရွယ်အစား အတော်ကြီးမားအောင် အနုစိတ် ပုံစံတူ တည်ဆောက်ထားတဲ့ ဆိုးလ်မြို့ရဲ့ ပုံစံငယ်ကို စစ်ဆေး ကြည့်ရှုနေတာ တွေ့ရပါတယ်။ အဲဒီ ပုံစံငယ်ကိုတော့ ဓာတ်ပုံထဲမှာ ဖော်ပြမထားဘဲ ဆင်ဆာ ဖြတ်တောက်ထားပါတယ်။
အဲဒီ ပုံစံငယ်ကို ကင်ဂျုံအီလ် စစ်ရေးနဲ့ နိုင်ငံရေး တက္ကသိုလ်မှာ ထားရှိတာ ဖြစ်ပါတယ်။ ကင်မ်ဟာ ဆိုးလ်မြို့ရဲ့ ပုံစံငယ်အပြင် အမေရိကန်နဲ့ တောင်ကိုရီးယားတို့ ပူးပေါင်း ဖြန့်ကျက်ထားတဲ့ တောင်ကိုရီးယား အခြေစိုက် စစ်စခန်းတွေရဲ့ ပုံစံငယ်တွေကိုပါ လေ့လာခဲ့တယ်လို့ ဆိုပါတယ်။
ကင်မ်က အဲဒီ တက္ကသိုလ်မှာ မြောက်ကိုရီးယား စစ်ဘက် အရာရှိတွေကို ခေတ်မီ စစ်ရေး မဟာဗျူဟာတွေ၊ နည်းပညာတွေနဲ့ အကျွမ်းတဝင် ရှိလာအောင် ဘယ်လို လေ့ကျင့် သင်ကြားပေးနေသလဲ ဆိုတာကိုလည်း စစ်ဆေးခဲ့တယ်လို့ ဆိုပါတယ်။
Public Service Announcement
ကင်မ်က မြောက်ကိုရီးယားဟာ စစ်ပြင်ဆင်မှုတွေမှာ ပိုမို အကျွမ်းတဝင်နဲ့ အသင့်အနေအထား ရှိနေဖို့ လိုအပ်ကြောင်း၊ ကိုရီးယား ကျွန်းဆွယ်ရဲ့ တင်းမာမှုတွေဟာ အစဉ်တစိုက် မြင့်တက်လာနေပြီး မြောက်ကိုရီးယား အနေနဲ့ ရန်စမှုတွေ ကြုံလာပြီ ဆိုတာနဲ့ တန်ပြန် တိုက်ခိုက်နိုင်အောင် ပြင်ဆင်ထားရမှာဖြစ်ကြောင်း ပြောကြားသွားပါတယ်။
ကင်မ်ဟာ ပြီးခဲ့တဲ့ လပိုင်းတွေအတွင်း မြောက်ကိုရီးယားကို စစ်ပွဲအတွက် ပြင်ဆင်ထားဖို့ မိန့်ခွန်းတွေ အကြိမ်ကြိမ် ပြောခဲ့တာကိုလည်း တွေ့ရပါတယ်။ လေ့လာသူတွေကတော့ ကင်မ်ဟာ အမေရိကန်၊ တောင်ကိုရီးယားတို့အပေါ် ရန်လိုတဲ့ သဘောထားတွေ ပိုမို ပြသလာနေပြီး ရုရှားနဲ့ ပိုမိုနီးကပ်တဲ့ ပူးပေါင်းဆောင်ရွက်မှုတွေ ရှိလာခြင်းကလည်း အဲဒီ အခြေအနေအပေါ် မီးစာဖြည့်ပေးနေတယ်လို့ သုံးသပ်ထားကြပါတယ်။
ကိုးကား: NK News
