ယူကရိန်းစစ်ပွဲ ရပ်ဆိုင်းရေးအတွက် ဖိအားပေးမှု တစ်ခုအဖြစ် ရုရှားရဲ့ အကြီးဆုံး ရေနံကုမ္ပဏီ နှစ်ခုကို အမေရိကန်က အရေးယူ ပိတ်ဆို့ကြောင်း ကြေညာခဲ့ပါတယ်။
အိမ်ဖြူတော်မှာ NATO စစ်မဟာမိတ် အဖွဲ့ရဲ့ အတွင်းရေးမှူးချုပ် မတ်ခ်ရူတေးနဲ့ တွေ့ဆုံ ဆွေးနွေးပြီးတဲ့နောက် အမေရိကန် သမ္မတ ဒေါ်နယ်လ်ထရမ့်က Rosneftနဲ့ Lukoil ကုမ္ပဏီတွေကို စီးပွားရေး ပိတ်ဆို့ အရေးယူမယ့် ဆုံးဖြတ်ချက်ကို အတည်ပြုခဲ့ပါတယ်။ ဒါဟာ ရေနံတင်ပို့မှုတွေကနေ ဝင်ငွေဆက်လက် ရှာဖွေနေတဲ့ ရုရှားအတွက် စီးပွားရေးအရ ကြီးမားတဲ့ ထိုးနှက်ချက်တစ်ခု ဖြစ်လာနိုင်ပါတယ်။
အောက်တိုဘာ ၂၂ ရက်နေ့တုန်းက ရူတေးနဲ့အတူ သတင်းထောက်တွေကို တွေ့ဆုံချိန်မှာ ထရမ့်က သူနဲ့ ရုရှား သမ္မတ ဗလာဒီမာ ပူတင်တို့ ဆွေးနွေး စကားပြောတဲ့ အခါတိုင်း တကယ့်ကို ဖော်ဖော်ရွေရွေ ရှိခဲ့ကြကြောင်း၊ ဒါပေမဲ့ ရလဒ်ကတော့ ဘယ်ကိုမှ ထိထိရောက်ရောက် ဦးတည်သွားလေ့ မရှိခဲ့ကြောင်း မှတ်ချက်ပေးခဲ့ပါတယ်။ သူဟာ ယူကရိန်း ငြိမ်းချမ်းရေးကိစ္စ တွန်းအားပေးမယ့် အစီအမံတွေအတွက် ရူတေးနဲ့ ဆွေးနွေးခဲ့တာပါ။
ရုရှားအပေါ် အရေးယူ ပိတ်ဆို့မှု အသစ်တွေ မကြေညာခင် တစ်ရက်အလိုမှာလည်း အမေရိကန် အစိုးရဟာ ပူတင်နဲ့ ထရမ့်တို့ကြား ယူကရိန်းစစ်ပွဲ ရပ်ဆိုင်းရေးကိစ္စ ဟန်ဂေရီနိုင်ငံ၊ ဘူဒါပက်စ်မြို့မှာ တွေ့ဆုံ ဆွေးနွေးဖို့ ညှိနှိုင်းနေတာတွေကိုလည်း အချိန် အကန့်အသတ်မရှိ ဆိုင်းငံ့ကြောင်း ကြေညာခဲ့ပါတယ်။ အဲဒီ ဆုံးဖြတ်ချက်နဲ့ ပတ်သက်ပြီး ထရမ့်က သူ့အနေနဲ့ အချိန်ဖြုန်းရုံသက်သက် ဆွေးနွေးပွဲမျိုးတွေကို မလိုချင်ကြောင်း မှတ်ချက်ပေးခဲ့ပါတယ်။ နီးစပ်သူတွေကတော့ ရုရှားဟာ အပစ်အခတ် ရပ်စဲရေး အဆိုကို လက်မခံတဲ့အပြင် ညှိနှိုင်းဖို့ ခက်လောက်တဲ့ တောင်းဆိုမှုတွေကို တင်ပြခဲ့တဲ့နောက် ထရမ့်က ပူတင်နဲ့ မတွေ့သေးဖို့ ဆုံးဖြတ်ခဲ့တာလို့ ပြောပါတယ်။
Public Service Announcement
ရုရှားအပေါ် အရေးယူ ပိတ်ဆို့မှုတွေနဲ့ ပတ်သက်ပြီး ထရမ့်က အခုအခါ အချိန်ကျလာပြီလို့ သူယူဆကြောင်း၊ အဲဒီမတိုင်ခင် အကြာကြီး စောင့်ပေးခဲ့ကြောင်း ဆိုပါတယ်။ နောက်ပြီး ရုရှားကသာ စစ်ပွဲကို ရပ်ဆိုင်းလိုက်မယ်ဆိုရင် အဲဒီ ပိတ်ဆို့ အရေးယူမှုတွေကို အမေရိကန်ကလည်း မဆိုင်းမတွ ဖယ်ရှားပေးမှာလို့ ထရမ့်က အာမခံခဲ့ပါတယ်။
ရူတေးက ရုရှား ရေနံကုမ္ပဏီတွေကို အမေရိကန်က ပိတ်ဆို့ အရေးယူလိုက်တဲ့ ဆုံးဖြတ်ချက်အပေါ် အထူးတလည် ချီးကျူးခဲ့ပြီး ပူတင်အတွက် ဖိအားတွေ အများကြီး တိုးသွားစေလိမ့်မယ်လို့ သတင်းထောက်တွေကို ပြောကြားခဲ့ပါတယ်။ ရုရှားကို ဖိအားတွေ ပိုပေးဖို့ လိုကြောင်း၊ ဒီနေ့မှာ သမ္မတ ထရမ့်ဟာ အဲဒီ လိုအပ်ချက်ကို လက်တွေ့ လုပ်ဆောင်ခဲ့ကြောင်း ရူတေးက မှတ်ချက်ပေးသွားပါတယ်။
ရေနံနဲ့ သဘာဝ ဓာတ်ငွေ့တွေဟာ ရုရှားရဲ့ အရေးအပါဆုံး မဟာဗျူဟာ ပြည်ပ ပို့ကုန်တွေဖြစ်ပြီး တရုတ်၊ အိန္ဒိယနဲ့ တူရကီလို နိုင်ငံတွေက အဓိက ဝယ်ယူနေပါတယ်။ ထရမ့်က အဲဒီ နိုင်ငံတွေကိုလည်း ရုရှားဆီက ရေနံတွေ ဆက်မဝယ်ဖို့ တောင်းဆိုထားပါတယ်။ တစ်ဖက်မှာလည်း ဥရောပ သမဂ္ဂ (EU)ဟာ လာမယ့် နှစ်အနည်းငယ်အတွင်း ရုရှားဆီက ဓာတ်ငွေ့ တင်သွင်း ဝယ်ယူမှုတွေကို အပြီးတိုင် ရပ်ဆိုင်းဖို့ထိ အစီအစဉ်တွေ ရေးဆွဲ ပြင်ဆင်ထားပြီး ဖြစ်ပါတယ်။
ကိုးကား: BBC
