နိုင်ငံရဲ့ ဂုဏ်သတင်း အကြီးမားဆုံး ဘုန်းတော်ကြီးတစ်ပါးက သက်ငယ်မုဒိမ်းမှုနဲ့ အဖမ်းခံရတဲ့ သတင်းဟာ သီရိလင်္ကာ လူ့အဖွဲ့အစည်းကြားမှာ အပြင်းအထန် ဂယက်ရိုက်ခတ်သွားပါတယ်။
သိက္ခာတော်ရ ဆရာတော် ပါဠိဂါမ ဟိမာရသနဟာ အသက် ၁၅ နှစ်အရွယ် မိန်းကလေး တစ်ဦးကို မုဒိမ်းကျင့်မှု၊ လိင်အကြမ်းဖက်မှု စွပ်စွဲချက်တွေအတွက် လောလောဆယ် ဖမ်းဆီး ခံထားရပါတယ်။
သက်တော် ၇၁ နှစ်အရွယ် ဘုန်းတော်ကြီးဟာ ထေရဝါဒ ဗုဒ္ဓသာသနာ ထွန်းကားရာ အာရှတောင်ပိုင်း ကျွန်းနိုင်ငံဖြစ်တဲ့ သီရိလင်္ကာမှာ ဂုဏ်သတင်း အကျော်ကြားဆုံး ဆရာတော်တစ်ပါး ဖြစ်ခဲ့ပါတယ်။ သူဟာ အနူရာဒပူရမြို့ရဲ့ ဘာသာရေး အထွဋ်အမြတ် နယ်မြေ ၈ ခုကို ကြီးမှူးတဲ့ ဥက္ကဋ္ဌ ဆရာတော်အဖြစ် တာဝန်ယူထားခဲ့သူပါ။
နိုင်ငံရဲ့ ကလေးသူငယ် စောင့်ရှောက်ရေးဌာနက အဆိုပြုခဲ့တဲ့နောက် ဘုန်းတော်ကြီး ပါဠိဂါမ ဟိမာရသနကို ရဲတွေက မေလ ၈ ရက်နေ့မှာ သူ့ကို ဖမ်းဆီးခဲ့ပါတယ်။ အဲဒီဌာနဟာ ဘုန်းတော်ကြီးက အဓိက သံသယတရားခံ ဖြစ်နေလျက်နဲ့ ဖမ်းဆီးဖို့ ပျက်ကွက်တဲ့အတွက် ရဲတပ်ဖွဲ့ကို အစောပိုင်းမှာ ဖိအားပေး ဝေဖန်ခဲ့ပါတယ်။ အမှုအတွက် ပထမဆုံး ရုံးထုတ် ကြားနာမှုကို မေလ ၁၂ ရက်နေ့မှာ ပြုလုပ်မှာ ဖြစ်ပါတယ်။
Public Service Announcement
ဝရမ်းရခဲ့တဲ့နောက် ရဲတွေဟာ ကိုလံဘို မြို့တော်က ဆေးရုံတစ်ခုမှာ အရေးပေါ် ကျန်းမာရေး အခြေအနေ တစ်ခုအတွက် ကုသမှု ခံယူနေပါတယ်ဆိုတဲ့ ဘုန်းတော်ကြီးကို သွားရောက် ဖမ်းဆီးခဲ့ပါတယ်။
အခုအမှုဟာ မတ်လတုန်းက မိန်းကလေးငယ် တစ်ဦးက စောင့်ရှောက်ရေး စင်တာကနေ ဖမ်းဆီးခေါ်ဆောင် ခံရပြီး ချုပ်နှောင်ခံထားခဲ့ရတဲ့ မှုခင်းနဲ့ ဆက်စပ်နေပါတယ်။ အဲဒီကိစ္စမှာ မိန်းကလေးအပေါ် ဘုန်းတော်ကြီးက မုဒိမ်းမှု ကျူးလွန်ခဲ့တယ်ဆိုတဲ့ စွပ်စွဲချက် ထွက်ပေါ်လာခဲ့တာပါ။ ဒါ့အပြင် ဘုန်းတော်ကြီးဟာ ၂၀၂၂ ခုနှစ်ကတည်းက အနူရာဒပူရမှာရှိတဲ့ ဘုရားကျောင်း နယ်မြေတစ်ခုထဲမှာ လိင်အမြတ်ထုတ်မှုတွေ ကျူးလွန်နေခဲ့တယ်ဆိုတဲ့ အထောက်အထားတွေ ရှိနေခဲ့ကြောင်း ကလေးသူငယ် စောင့်ရှောက်ရေးဌာန တာဝန်ရှိသူတွေက ဆိုပါတယ်။
ရဲတွေရဲ့ အဆိုအရ မိန်းကလေးရဲ့ မိခင်ကလည်း ဘုန်းတော်ကြီးရဲ့ ပြစ်မှုမှာ အလိုတူအလိုပါ အားပေးကူညီမှုနဲ့ အဖမ်းခံထားရကြောင်း သိရပါတယ်။ လူဝင်မှုကြီးကြပ်ရေး ဌာနကလည်း ပါဠိဂါမ ဟိမာရသန အနေနဲ့ ပြည်ပကို ထွက်ပြေးလို့ မရတာ သေချာအောင် အစီအမံတွေ တင်းတင်းကျပ်ကျပ် လုပ်ဆောင်ထားတယ်လို့ အစောပိုင်းမှာ ကြေညာခဲ့ပါတယ်။
သီရိလင်္ကာမှာ နာမည်ကြီး ဘုန်းတော်ကြီးတွေဟာ လူထုရဲ့ ချစ်ခင်ကြည်ညိုမှုကို ခံရတဲ့အပြင် နိုင်ငံရေး အရလည်း ဩဇာညောင်းတာကြောင့် အခုလို အထင်ကရ ဆရာတော်တစ်ပါး ရာဇဝတ်မှုနဲ့ အဖမ်းခံရခြင်းဟာ ဖြစ်တောင့်ဖြစ်ခဲ ကိစ္စမျိုး ဖြစ်လာခဲ့ပါတယ်။
ကိုးကား: BBC
