ဂျပန်နိုင်ငံ အနောက်တောင်ပိုင်းမှာ မဂ္ဂနီကျု ၇.၁ အဆင့် ငလျင်ကြီးတစ်ခု လှုပ်ခတ်ခဲ့တဲ့နောက် ဆူနာမီ ရေလှိုင်းအန္တရာယ် သတိပေးချက်တွေ ထုတ်ပြန်ထားပါတယ်။
ဂျပန်ရဲ့ ငလျင်တိုင်းတာရေး စနစ်အရ အမြင့်ဆုံးလို့ သတ်မှတ်တဲ့ ရှင်ဒို ၇ အဆင့် ငလျင်ဟာ ကျူရှူးကျွန်းရဲ့ ကူမာမိုတို ဒေသမှာ လှုပ်ခတ်ခဲ့တာ ဖြစ်ပါတယ်။ ငလျင်ဟာ မြေအနက် ၁၀ ကီလိုမီတာလောက်ကို ဦးတည်တဲ့ မြေတိမ်ငလျင် အမျိုးအစား ဖြစ်တာကြောင့်လည်း မြေပြင်ပေါ်မှာ သက်ရောက် ယိမ်းခါမှုက ပိုပြီး ပြင်းပြင်းထန်ထန် သိရှိ ခံစားခဲ့ရပါတယ်။
ဂျပန်မိုးလေဝသနဲ့ ငလျင်အေဂျင်စီက အရီရာကီနဲ့ ယတ်ဆူရှီရို ပင်လယ်ကမ်းရိုးတန်းတဝိုက်မှာ ဆူနာမီ ရေလှိုင်းအန္တရာယ် သတိပေးချက် ထုတ်ပြန်ခဲ့ပြီး ဒေသခံတွေကို ကုန်းတွင်းပိုင်းဆီ ရွှေ့ပြောင်းဖို့ ညွှန်ကြားခဲ့ပါတယ်။
ဇူလိုင် ၂၈ ရက်နေ့ ငလျင်လှုပ်ခတ်မှုအပြီး မိနစ်ပိုင်းအတွင်းမှာတင် ဆူနာမီလှိုင်း အငယ်စားလေးတွေ ပင်လယ်ကမ်းရိုးတန်းဆီ ရောက်ရှိခဲ့တယ်လို့ ယုံကြည်ရပြီး နောက်ဆက်တွဲ လှိုင်းလုံးတွေလည်း ရိုက်ခတ်လာနိုင်ကြောင်း တာဝန်ရှိသူတွေက ပြောပါတယ်။
Public Service Announcement
ငလျင်ဟာ ကူမာမိုတို မြို့ရဲ့ တောင်ဖက်မှာရှိတဲ့ ယူကီဆိုတဲ့ ပိုသေးတဲ့ မြို့တစ်ခုကို ဦးတည် လှုပ်ခတ်ခဲ့တာပါ။ ငလျင်ကြောင့် ဓာတ်အားလိုင်းတွေ ပြတ်တောက်ကုန်ပြီး အိမ်ခြေ ၄၅၆၀၀ လောက် မီးပြတ်ကုန်တယ်လို့ ကျူရှူး ဓာတ်အားပေး ဌာနက ပြောပါတယ်။
ငလျင်လှုပ်ခတ်ခဲ့ချိန်အတွင်း အဆောက်အအုံတွေ အကြီးအကျယ် ယိမ်းထိုးတာ၊ တချို့နေရာတွေမှာ မီးလောင်တာ၊ လူတွေ အနာတရဖြစ်တာမျိုး သတင်းတွေ ကြားရပေမယ့် ထိခိုက်ပျက်စီးမှုနဲ့ သေကြေဒဏ်ရာရမှု အခြေအနေ အသေးစိတ်ကိုတော့ မသိရသေးပါဘူး။
၂၀၁၆ တုန်းက ကူမာမိုတိုမြို့မှာ ငလျင်နှစ်ခု လှုပ်ခတ်မှုတွေကြောင့် လူ ၂၇၈ ဦးသေဆုံးပြီး ၂၈၀၀ လောက် ဒဏ်ရာရခဲ့ဖူးပါတယ်။ အဲဒီငလျင်တွေဒဏ်ကြောင့် သမိုင်းဝင် ကူမာမိုတို ရဲတိုက်ကြီးမှာ ထိခိုက်ပျက်စီးမှုတွေလည်း ဖြစ်ပေါ်ခဲ့ပြီး ရှေးမူမပျက် ပြန်လည် ထိန်းသိမ်းမှုတွေဟာ ၂၀၅၂ ခုနှစ်ထိ ကြာမြင့်နိုင်ဖွယ် ရှိနေကြောင်း သိရပါတယ်။
ကိုးကား: A News
