လူတူစက်ရုပ်တွေ တင်သွင်းမှုကို ပိတ်ပင်တဲ့ အမေရိကန်ရဲ့ လုပ်ရပ်ဟာ တရုတ် နည်းပညာ ကုမ္ပဏီတွေကို ဖိနှိပ်တဲ့ အစီအစဉ် တစ်ခုလို့ တရုတ်က စွပ်စွဲ ပြောကြားခဲ့ပါတယ်။
အမျိုးသား လုံခြုံရေး ကဏ္ဍကို လက်ခံနိုင်စရာ မရှိတဲ့ ရှုထောင့်မျိုးကနေ ခြိမ်းခြောက်လာနိုင်တာကြောင့် လူတူစက်ရုပ်တွေရော၊ ခြေလေးချောင်းထောက် ခွေးစက်ရုပ်တွေကိုပါ ပြည်ပကနေ တင်သွင်းခွင့်ကို ပိတ်ပင်ကြောင်း အမေရိကန်က အခုသီတင်းပတ် အစောပိုင်းမှာ ကြေညာခဲ့ပါတယ်။
အမေရိကန်ကို တင်သွင်းနေတဲ့ လူတူစက်ရုပ် အများစုဟာ တရုတ်မှာ ထုတ်လုပ်ထားတာပါ။ တရုတ် နည်းပညာ နယ်ပယ်မှာတော့ လူတူစက်ရုပ်တွေ ထုတ်လုပ်မှုဟာ သိသိသာသာ တိုးတက်လာတဲ့ ကဏ္ဍတစ်ခုအဖြစ် ရှိနေပါတယ်။
တရုတ်နဲ့ အမေရိကန်တို့ဟာ ရည်ရွယ်ချက် ပေါင်းစုံအတွက် လူတူစက်ရုပ်တွေ ထုတ်လုပ်မှုကို အပြိုင်အဆိုင် တီထွင်နေတဲ့ နိုင်ငံတွေလည်း ဖြစ်ပါတယ်။
Public Service Announcement
ဇူလိုင် ၂၈ ရက်မှာတော့ အမေရိကန် ဖက်ဒရယ် ဆက်သွယ်ရေး ကော်မရှင် (FCC)က ပြည်ပကနေ လူတူစက်ရုပ်တွေ၊ ခွေးစက်ရုပ်တွေ တင်သွင်းမှုကို ပိတ်ပင်ကြောင်း ကြေညာခဲ့ပါတယ်။ နိုင်ငံရဲ့ အမျိုးသား လုံခြုံရေးအတွက် ပြည်ပကနေ နည်းပညာမြင့် စက်ရုပ်ပစ္စည်းတွေ တင်သွင်းမှုကို တားမြစ်လိုကြောင်း FCCက ထုတ်ပြန်ခဲ့ပါတယ်။
တရုတ် နိုင်ငံခြားရေး ဝန်ကြီးဌာနကတော့ ဇူလိုင် ၂၉ ရက်နေ့မှာ FCCရဲ့ အဲဒီ ညွှန်ကြားချက်ကို အပြင်းအထန် ကန့်ကွက်ခဲ့ပါတယ်။ တရုတ် ကုမ္ပဏီတွေအပေါ် ဖိနှိပ်ဖို့အတွက် အမျိုးသား လုံခြုံရေးကို အမေရိကန်က အကြောင်းပြချက် ပေးနေတဲ့အပေါ် တရုတ်အနေနဲ့ အမြဲတမ်း ဆန့်ကျင် ကန့်ကွက်နေမှာဖြစ်ကြောင်း ဝန်ကြီးဌာန ပြောရေးဆိုခွင့်ရ အမျိုးသမီး မော်နင်းက ပြောပါတယ်။
တရုတ် ကုမ္ပဏီတွေရဲ့ အခွင့်အရေးတွေနဲ့ အကျိုးစီးပွားကို ကာကွယ်ဖို့အတွက် တရုတ်ဟာ လိုအပ်တဲ့ တုံ့ပြန် စီမံမှုတွေကို လုပ်ဆောင်သွားမယ်လို့လည်း သူက ဆိုပါတယ်။ ပြည်ပယှဉ်ပြိုင်မှုကနေ ကာကွယ်ပေးထားတဲ့ မူဝါဒဟာ အမေရိကန်ရဲ့ စျေးကွက် အားပြိုင်နိုင်စွမ်းကို မြင့်တက်လာစေမှာ မဟုတ်တဲ့အပြင် အမေရိကန် ကုမ္ပဏီတွေနဲ့ သုံးစွဲသူတွေကိုသာ ထိခိုက်စေလိမ့်မယ်လို့လည်း မော်က ဝေဖန်သွားပါတယ်။
တရုတ်မှာတော့ ပုံသဏ္ဍန်မျိုးစုံ၊ အရွယ်မျိုးစုံ၊ ရည်ရွယ်ချက်မျိုးစုံနဲ့ စက်ရုပ်တွေကို ဟိုတယ်တွေ၊ စျေးဝယ်စင်တာတွေ၊ စက်ရုံတွေမှာ အသုံးပြုမှုတွေ လျင်လျင်မြန်မြန် တိုးပွား ကျယ်ပြန့်လာနေပါတယ်။ FCCရဲ့ ပိတ်ဆို့စာရင်းမှာတော့ စက်ရုပ်တွေသာ မကဘဲ Huaweiနဲ့ China Telecomတို့က ထုတ်လုပ်တဲ့ ဒရုန်းတချို့လည်း ပါဝင်နေပါတယ်။
အမေရိကန်မှာတော့ လူတူစက်ရုံတွေကို အလုံပိတ်ထားတဲ့ သီးသန့်နေရာတွေ၊ ဥပမာ မော်တော်ကား စက်ရုံတွေနဲ့ ကုန်လှောင်ရုံတွေမှာသာ အဓိက အသုံးပြုနေဆဲ ဖြစ်ပါတယ်။
ကိုးကား: AFP
