‘အေးချမ်းစွာ အနားယူပါ သား’

မောင်သုည (ရှပ်ပုံသားလေး)

သားရေ…
ခွဲခွာခြင်းတရားရှိတယ်ဆိုတာ သိပေမယ့်
တကယ်တမ်း ခွဲခွာခဲ့ကြရင်
အသွေးအသားနဲ့ ထုဆစ်ပြီး
မြင်းမိုရ်တောင်မက ကြီးမားတဲ့
မေတ္တာပန်းချီကားတချပ်မှာ
အူဝဲကဗျာကစ
အမေတို့က ပိုနာကျင်ရပါတယ် သား ၊

အမေတို့ ဘယ်လိုနှလုံးသားနဲ့
ဆက်ရှင်သန်ရမလဲ သားရယ် ၊

ဘယ်တော့မှ
ပြန်မလာနိုင်တဲ့ လူကိုမျှော်ရတာလည်း
ငရဲကျခြင်း တမျိုးပဲမို့
သားတယောက် ဆုံးရှုံးသွားတဲ့ မိခင်တယောက်ဆိုတာလည်း
ငရဲကျသလို ပူလောင်ရပါတယ် သား ၊

Public Service Announcement

သားရေ…
ရင်နဲ့လွယ်ထားရတဲ့ သွေးစက်တိုင်းအတွက်
ရွှေဗျိုင်းဖြူပုံပြင်တွေ
မိတ်ထီလာကန်တော်အောက်က
ဖားကောက်ခဲ့ပေး ဆိုတဲ့
အမေချော့တေးတွေဟာ
အခုချိန်မှာ
ငါ့သားအတွက် ဘာမှအသုံးမဝင်ခဲ့သလို
တောက်လောင်နေတဲ့ ဗျာပါရမီးမှာလည်း
အမေ့ဘဝက
အပြာချခံခဲ့ရပါတယ် သား ၊

သားရေ…
နာကျည်းချက်ကို
ဘယ်လိုသိဒ္ဓိတန်ခိုးနဲ့ ဖြေရပါ့မလဲ ၊

အနာဂတ်ကို
ရွှေလိုကျင်ယူရတဲ့ သားတို့ခေတ်မှာ
လူပီသချင်တဲ့ အမေတို့လို အာဂမိန်းမတွေက
ရင်ကွဲနာကျပေးရတာလည်း
ခေတ်အဆင့်ဆင့်ရဲ့
သမိုင်းအစဥ်အလာပဲ မဟုတ်လား ၊

သားသိလား
ဘုရားတွေ အဆူဆူပွင့်ခဲ့ပေမယ့်
သားကို ဘုရားလို ကိုးကွယ်ထားကြတဲ့
အမေတွေ
လောကကြီးမှာ ပဒုမ္မာကြာလို
အမြဲလှပခဲ့ကြ ဆိုပေမယ့်
အမေတို့ရဲ့ မျက်ရည်ဟာ
ကိုယ့်လမ်းကိုယ်ဖောက်စီးဆင်းပေးရတဲ့
မြစ်တစင်းလို
ကြေကွဲခြင်းဟာ
ဥဒါန်းမကြေတဲ့တရားတွေနဲ့ပါ သားရယ် ၊

အခုတော့
သားပြန်နိုးနိုးနဲ့ မျှော်လင့်ရင်း
သပြေခက်လေးရဲ့ ပျော်ရွှင်မှုအနာဂတ်နေ့ရက်တွေကို
သားအတွက်လုပ်ပေးထားတဲ့
ဖန်ပုလင်းရေချမ်းအိုးလေးထဲမှာ
အမေ မျိုသိမ့်လိုက်ပါပြီ ၊

အမေသားလေး
အေးချမ်းစွာ အနားယူပါ သား၊
ဒီချိန်မှာ
ဘယ်လိုလူတွေရဲ့ ရယ်မောသံတွေပဲကြားကြား
နှလုံးသားတခုရဲ့ ကွဲအက်သံက
အမေ့ရင်ထဲမှာ ရှိုက်ငင် ရှင်သန်လျက်ပါ သား ၊

ဘယ်လိုပဲဖြစ်ဖြစ်
ဒီကောင်းကင်ကြီးရဲ့သမိုင်းမှာ
အမေ့သားဟာ
အမြဲထွန်းလင်းနေမယ့် ကြယ်တပွင့်
ဆိုရင်
အမေဟာ
သိက္ခာခြုံပြီး လိပ်ပြာလုံနေမယ့်
ကြယ်ကြွေပုံပြင်ထဲက မိခင်ပေါ့ ၊

ဒီလို ခေတ်ဆိုးတခုရဲ့ ရာသီမှာ
ချခွဲခံလိုက်ရတဲ့ မိသားစုတခုရဲ့ ပျော်ရွှင်ခြင်းဆိုတာ
အိပ်မက်ထဲမှာ လိုက်ရှာရင်း
ပြန်မလာနိုင်ဘူးဆိုတာ သိပေမယ့်
သားကို အမေမျှော်နေမိပါတယ် ၊

သားရယ်…
ဖြစ်ပြီးရင် ပျက်ရစမြဲ လူ့လောကကြီးအလယ်မှာ
အရှိကိုအရှိတိုင်း
အမှန်ကို အမှန်တိုင်း ပြောရရင်
အမေ့ကို ခြေစုံကန်ပြီး ဒီအိမ်အိုလေးထဲက ထွက်သွားတဲ့နေ့ကစ
အမေ့ရင်ထဲကို
ထဲထဲဝင်ဝင်ရိုက်သွင်းပြီးသား သံမှိုတွေဟာ
ဒီနေ့ ဒီချိန်ထိ
ဆွဲနှုတ်ပစ်လို့ မထွက်ဘူး
နောက်လည်း ထွက်မှာ မဟုတ်တော့ဘူး သား ၊

သားရေ…
ဒီလို အမေသားသူရဲကောင်းလေးတွေကို
ဘယ်လိုလူတွေကများ
မိုက်လုံးကြီးတဲ့ကောင်တွေလို့ စွပ်စွဲရက်ကြသလဲ ။

အမှန်တရားအတွက် တိုက်ပွဲဝင်ခဲ့တာပဲ
လူ့မိစ္ဆာတွေ လက်ဦးချက်ရလို့
လည်ဆင်းခဲ့ရတဲ့ အမေသား
နှောင်ကြိုးမဲ့စွာ စိတ်ချလက်ချ
ထွက်သွားပါ ၊

မေတ္တာငတ်နေတဲ့ လူ့အဖွဲ့အစည်းကနေ
အေးချမ်းစွာ အနားယူအိပ်စက်ပါ သား၊

ဒီနိုင်ငံမှာ
ဝဋ်ကြွေးကြီးတဲ့ ကောင်တွေသာ
အသက်ရှည်ကြတယ် သားရယ် ၊

အမေ့သားလေး
ကောင်းရာသုဂတိလားပါစေ ။ ။

(The Call -ခေါ်သံ”အွန်လိုင်းမဂ္ဂဇင်းမှာ’မောင်သုည (ရှပ်ပုံသားလေး)’ရေးဖွဲ့တဲ့ “အေးချမ်းစွာ အနားယူပါ သား” ကဗျာကို People’s Spring ကပြန်လည်​ဖော်ပြ​ပေးတာဖြစ်ပါတယ်။အနုရသကဲပြီးတော်လှန်​ရေးအတွက်အ​ထောက်အကူပြုတဲ့ စာ​ပေကဏ္ဍမျိုးစုံကို “The Call – ​ခေါ်သံ” အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749… မှာလည်းသွား​ရောက်ဖတ်ရှုနိုင်ပါတယ်)