တပ်ရင်းမှူးအပါအဝင် ၆ ဦးအလောင်းကို ဆုံးတဲ့နေရာမှာပဲ အမိန့်ပြန်ပြီး မြုပ်မယ်လို့ဆို

KNLA တပ်မဟာ ၆ နဲ့ဖြစ်ပွားတဲ့ တိုက်ပွဲမှာ သေဆုံးသွားခဲ့တဲ့ စစ်ကောင်စီ ယာယီတပ်ရင်းမှူး အပါအဝင် ၆ ဦးကို သေဆုံးသွားတဲ့နေရာမှာပဲ အမိန့်တော်ပြန်ပြီး မြုပ်နှံသွားမယ်လို့ KNLA သတင်းရင်းမြစ်တစ်ဦးထံကနေ သိရပါတယ်။

အောက်တိုဘာ ၂၀ ရက်က ကေအဲန်ယူ ဒူးပလာယာခရိုင် ဝင်းရေးမြို့နယ် ခုံခံနဲ့ သံပုရာရွာကြားမှာ KNLA တပ်မဟာ ၆ နဲ့ အကြမ်းဖက်စစ်ကောင်စီတပ်တို့ကြား တိုက်ပွဲဖြစ်ပွားခဲ့ပြီး စစ်ကောင်စီဘက်က ခလရ ၂၈၃ ယာယီတပ်ရင်းမှူး ဗိုလ်မှူးသန်းဝင်းထွန်းအပါအဝင် ၆ ဦး သေဆုံးသွားခဲ့တာပါ။

“အဲ့ဒီဖြစ်ပွားတဲ့နေရာမှာပဲ လာပြီးတော့ အမိန့်တော့ပြန်မယ်လို့ကြားတယ်” လို့ KNLA သတင်းရင်းမြစ်တစ်ဦးက ပြောပါတယ်။

သေဆုံးသွားခဲ့တဲ့ စစ်ကောင်စီတပ်ဖွဲ့ဝင် ၆ ဦးရဲ့ အလောင်းကို ပြန်ကောက်ယူဖို့အတွက် ကနဦးမှာ နှစ်ဖက်တာဝန်ရှိသူတွေညှိနှိုင်းခဲ့ပြီး မနေ့ညပိုင်းက စစ်ကောင်စီတပ်ဖွဲ့ဝင်တွေက ခုံခံနဲ့ သံပုရာရွာကို ရောက်ရှိလာကာ အခုလို အမိန့်တော်ပြန် မြုပ်နှံသွားဖို့ စီစဉ်နေတာဖြစ်တယ်လို့ KNLA သတင်းရင်းမြစ်တစ်ဦးက ပြောပါတယ်။

Public Service Announcement

အဲ့ဒီတိုက်ပွဲဟာ ၁၀ မိနစ်ဝန်းကျင်သာ ဖြစ်ခဲ့တာဖြစ်ပြီး စစ်ကောင်စီဘက်က ၆ ဦးစလုံးသေဆုံးသွားတာဖြစ်ကာ လက်နက် ၇ လက်သိမ်းဆည်းရမိခဲ့ပြီး စစ်ကောင်စီရဲ့ ကားတစ်စီးပျက်စီးသွားခဲ့တယ်လို့ သိရပါတယ်။