ရဲခေါင်/People’s Spring
ကရင်နီပြည်၊ ဘောလခဲခရိုင်အတွင်းရှိ စစ်ကောင်စီတပ်စွဲထားသော စခန်းကုန်းတိုက်ပွဲအတွင်း ရဲဘော်တစ်ဦးကျဆုံးခဲ့ရကြောင်း ဘောလခဲပြည်သူ့ကာကွယ်ရေးတပ်ဖွဲ့ (B PDF)က ယနေ့ ထုတ်ပြန်သည်။
တော်လှန်ရေးမဟာမိတ်တပ်ပေါင်းစုများနှင့်အတူ အောက်တိုဘာ ၁၀ရက်က စစ်ကောင်စီစခန်းကုန်းတစ်ခုကို ၀င်ရောက်ချေမှုန်းတိုက်ခိုက်ခဲ့ခြင်းဖြစ်ပြီး ရဲဘော်သက်ပိုင်မှုး ကျဆုံးခဲ့ကြောင်း အသိပေးသည်။
Public Service Announcement
နိုင်ငံတော်နှင့် လူမျိုးအတွက် စွမ်းစွမ်းတမံ တိုက်ပွဲဝင်ရင်း အသက်ပေးလှူခဲ့သော ရဲဘော် သက်ပိုင်မှုးအား အာဇာနည်အဖြစ်အသိမှတ်ပြုကြောင်း BPDFက ဖော်ပြသည်။
“ဘောလခဲမှာက စကစ စခန်းကုန်းသုံးခုလောက် ကျန်သေးတယ်။သိမ်းဖို့ ကြိုးစားနေကြတာ။၁၀ ရက်နေ့ကတိုက်ပွဲက စခန်းကုန်းမှာ ဖြစ်ပြီးကျတာ။စကစဘက်က လေယာဥ်နဲ့ ပစ်ကူပေးခဲ့ရတယ်။အပြီးသတ် မရခဲ့ဘူးလို့ သိရတယ်”ဟု ကရင်နီစစ်ရေးသတင်းရင်းမြစ်က လူထုနွေဦးသို့ပြောသည်။
ရှမ်းပြည်နယ်အခြေစိုက် စစ်ဆင်ရေးကွပ်ကဲမှုဌာနချုပ် စကခ (၂)လက်အောက်ခံတပ်များကို ဘောလခဲမြို့တွင် စစ်ကောင်စီက အင်အားဖြည့်ထားကြောင်းလည်း ၎င်းက ဆက်ပြောသည်။
ပြီးခဲ့သည့် သြဂုတ် ၈ ရက်က ဘောလခဲမြို့ရှိ ရေကျော် စစ်ကောင်စီစခန်းကုန်းကို ကရင်နီတပ်ပေါင်းစုက သိမ်းပိုက်နိုင်ခဲ့ပြီး လက်နက်ခဲယမ်းများနှင့် စစ်ကောင်စီတပ်သား အလောင်းများရရှိခဲ့သည်။
လက်ရှိတွင် ကရင်နီပြည်နယ်သို့ ရှမ်းပြည်တောင်ပိုင်း ပင်လောင်း နှင့် ဆီဆိုင်မြို့များမှ စစ်ကောင်စီက စစ်ကြောင်းထိုး ဝင်ရောက်နေပြီး ပင်လောင်းနှင့်ဖယ်ခုံမြို့ကြားတွင် တိုက်ပွဲများ ရက်ဆက်ဖြစ်ပွားနေသည်။
