နိုင်ပကောင်း/People’s Spring
ကရင်အမျိုးသားအစည်းအရုံး (KNU) ဌာနချုပ်နေရာဟောင်း မာနယ်ပလောဒေသ မှာ နောက်ဆုံးလက်ကျန်အဖြစ် ကျန်ရှိတဲ့ ပွိုင့် ၉၁၃ ( နို့ဒေး) စခန်းကို ဒီဇင်ဘာလ ၁၆ ရက် မနက်ပိုင်းမှာ အပြီးသတ် တိုက်ခိုက်ရှင်းလင်းနိုင်ခဲ့ပြီလို့ KNU ပြောရေးဆိုခွင့်ရှိသူ ပဒိုစောကလယ်စေးက အတည်ပြုပါတယ်။
“(တိုက်ပွဲသတင်း) အသေးစိတ် ကတော့ စိစစ်နေတုန်းပါ” လို့ ပဒိုစောကလယ်စေးက ပြောပါတယ်။
စစ်တပ်ဘက်က ပွိုင့် ၉၁၃ လို့ သတ်မှတ်ထားတဲ့ နို့ဒေးစခန်းဟာ ထိုင်းနယ်စပ်အနီး သောင်းရင်းမြစ်ဘေးမှာ နေရာယူတပ်စွဲထားတာဖြစ်ပြီး KNU တပ်မဟာ (၇) နယ်မြေမှာ တည်ရှိပါတယ်။
Public Service Announcement
အဲဒီစခန်းကို သိမ်းဖို့အတွက် ပြီးခဲ့တဲ့နိုဝင်ဘာလကတည်းက KNU နဲ့ ပူးပေါင်းတပ်က ဝန်းရံပိတ်ဆို့ထားခဲ့တာဖြစ်ပြီး ဒီဇင်ဘာလ ၁၆ ရက်မှာ အပြီးသတ် သိမ်းယူလိုက်တာပါ။
စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့တွေ အထိအခိုက်အကျအဆုံးများသလို လက်နက်ခဲယမ်းအများအပြားသိမ်းဆည်းရမိတယ်လို့ ကရင်စစ်ရေးသတင်းရင်းမြစ်ကအသိပေးပါတယ်။
မာနယ်ပလောဒေသမှာ ကဆောဝါးလေး၊ ဖူးလောကုန်း၊ မြောက်ကုန်း၊ ကယ်ဂေါ်ကျိုး စတဲ့ တပ်စခန်းတွေ ပိတ်ဆို့ တိုက်ခိုက်ခံရပြီးနောက် အဲဒီ စခန်းတွေကို စွန့်ခွာကာ ဗျုဟာစခန်းအဆင့်ရှိတဲ့ ပွိုင့် ၉၁၃ ဆီ သွားရောက်ပူးပေါင်းခဲ့ကြတာပါ။
KNU ရဲ့ ဌာနချုပ် မာနယ်ပလော ကို ၁၉၉၅ ခုနှစ် ၊ ဇန်နဝါရီလကုန်ပိုင်းမှာ စစ်တပ်နဲ့ ဒီကေဘီအေ ပူးပေါင်းတပ်တွေက တိုက်ခိုက်သိမ်းယူခဲ့တာဖြစ်ပါတယ်။
