ဇေအောင်/People’s Spring
စစ်ကိုင်းတိုင်း၊ မုံရွာမြို့နယ်၊ မုံရွာ – မန္တလေးလမ်းပိုင်းဘေးရှိ စစ်ကောင်စီတပ်သားများ ကင်းလာစောင့်မည့်တိုက်၌ ကြိုတင်မိုင်းဆင်၍ မိုင်းဆွဲတိုက်ခိုက်ခဲ့ရာ စစ်သား ၃ဦး သေဆုံးကြောင်း မုံရွာမြို့နယ်ပြည်သူ့ကာကွယ်ရေးအဖွဲ့၏ တာဝန်ရှိသူက ပြောသည်။
ဒီဇင်ဘာ ၁၇ရက်က စစ်ကောင်စီတပ်နှင့် ပျူစောထီးစစ်ကြောင်းသည် မုံရွာမြို့နယ်၊ မုံရွာ – မန္တလေး လမ်းပိုင်းတနေရာရှိ စစ်ကောင်စီတပ်သားများ ပုံမှန် ကာကင်းယူလေ့ရှိသည့် အဆောက်အဦးအတွင်း ရှေ့ထွက်မိုင်း ၂လုံး၊ ရှေ့တန်းမိုင်း ၁ လုံး ကြိုတင်ထောင်ပြီး မိုင်းဆွဲတိုက်ခိုက်ခဲ့ကြောင်း မုံရွာပကဖ၏ တာဝန်ရှိသူက ပြောသည်။
မိုင်းများပေါက်ကွဲမှုကြောင့် ကင်းလာစောင့်သည့် စစ်အုပ်စုဝင် သုံးဦး သေဆုံးပြီး ၇ ဦး ဒဏ်ရာရရှိသွားကြောင်း မုံရွာပကဖ၏ တာဝန်ရှိသူက ဆိုသည်။
Public Service Announcement
“ပြည်သူ့နေအိမ်မှာ တပ်စွဲသလိုနေထိုင်ပြီး လမ်းပေါ်တက် ဆတ်ကြေးကောက်ကြတာပါ။”ဟု ၎င်းတာဝန်ရှိသူက ပြောသည်။
စစ်အုပ်စု၏ ထိခိုက်မှုကို လူထုနွေဦးက သီးခြားအတည်ပြုနိုင်ခြင်း မရှိသေးပေ။
အဆိုပါတိုက်ခိုက်မှုအား မုံရွာမြို့နယ်ပြည်သူ့ကာကွယ်ရေးအဖွဲ့၊ ချောင်းဦးမြို့နယ်ပကဖတိုက်ခိုက်ရေးတပ်ဖွဲ့ (CHUPDF)၊ Monywa Special ဒိတ်ဒိတ်ကြဲ LPDF နှင့် Special Force 11 LPDF တို့ ပူးပေါင်းတိုက်ခိုက်ခဲ့ခြင်းဖြစ်သည်။
ဒီဇင်ဘာ ပထမလဝက်အတွင်းကလည်း မုံရွာ-မန္တလေးလမ်းပေါ်တွင် စစ်ကောင်စီ၏ ကြေးနီတင်ယာဥ်များအပါအဝင် စစ်ကောင်စီယာဥ်များအား တော်လှန်ရေးအဖွဲ့များက မိုင်းဆွဲတိုက်ခိုက်ခဲ့သေးသည်။
