စစ်ကောင်စီထောက်ပို့စစ်ကြောင်းတိုက်ခိုက်မှုတွင် ပြည်သူများပစ်ခတ်နေသည့် ဟောက်ဝစ်ဇာအမြောက်ကျည်များသိမ်းရမှု အဖိုးမဖြတ်နိုင်ဟု အရာတော်ပကဖ ပြော

ဟန်နွေ/People’s Spring

အရာတော်မြို့ အမှတ်(၁၀)စစ်အခြေခံလေ့ကျင့်ရေးတပ်(စခတ-၁၀)သို့လာသည့် စစ်ကောင်စီ ထောက်ပို့စစ်ကြောင်းတိုက်ခိုက်ရာတွင် ပြည်သူများအားရမ်းသမ်းပစ်ခတ်နေသည့် ၁၂၂ မမ ဟောက်ဝစ်ဇာအမြောက်ကျည်များ သိမ်းပိုက်ရရှိမှုမှာ အဖိုးမဖြတ်နိုင်ကြောင်း အရာတော် ပြည်သူ့ကာကွယ်ရေးအဖွဲ့(ပကဖ)က ယနေ့(ဇန်နဝါရီ ၁၁ရက်) ထုတ်ပြန်သည်။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ အမှတ်(၁)စစ်ဒေသကွပ်ကဲမှုအောက်ရှိ PDF ၊ ပကဖ ပူးပေါင်းတပ်များသည် ဇန်နဝါရီ ၉ရက်တွင် စစ်ကောင်စီ၏ ထောက်ပို့ ယာဉ်တန်းကို တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၅ဦး သေဆုံးပြီး ၇ဦး အရှင်ဖမ်းမိကာ လက်နက်ခဲယမ်းများ သိမ်းရခဲ့သည်။

သိမ်းရခဲ့သည့် လက်နက်ခဲယမ်းများတွင် ၁၂၂ မမ ဟောက်ဝစ်ဇာ ကျည် ၁၅လုံးပါရှိသည်ဟု စစ်ဒေသ(၁)က အသိပေးထားသည်။

Public Service Announcement

“ပြီးခဲ့တဲ့ ၉ ရက်နေ့မှာဖြစ်ခဲ့တဲ့ နမခကနေ အရာတော် စခတ ၁၀ ခွေးထောက်ပို့စစ်ကြောင်းကို ဖြတ်တောက်တဲ့ တိုက်ပွဲမှာ ကျွန်တော်တို့အနေနဲ့ အဖိုးမဖြတ်နိုင်တာက ပြည်သူတွေကို ရမ်းသမ်းထုနေတဲ့ ဟောင်ဝပ်ဇာကျည်တွေကိုပါ သိမ်းဆည်းရမိလိုက်တာပဲဖြစ်ပါတယ်။ စခတ ၁၀က စခတွေဟာ ကြွက်မနိုင် ကျီမီးနဲ့ရှို့ဆိုသလို PDF တွေကို မနိုင်တိုင်း ညည အရာတော် ပြည်သူတွေကို အိပ်ကောင်းခြင်းမအိပ်ရ၊ စားကောင်းခြင်း မစားရအောင် နှိပ်စက်နေတာလဲ ဒီဟောင်ဝပ်ဇာပါပဲ” ဟု အရာတော် ပကဖက ထုတ်ပြန်သည်။

မကြာသေးမီ ကာလအတွင်းကလည်း ဒေသတွင်းကျေးရွာအလှူပွဲကို စကတ-၁၀က ဟောက်ဝစ်ဇာဖြင့် ရမ်းသမ်းပစ်ခတ်ခှဲ့၍ ပြည်သူများ ထိခိုက်သေဆုံးမှုရှိခဲ့ကြောင်း အသိပေးခဲ့သော်လည်း ဖြစ်စဉ်အသေးစိတ်ကို ဖော်ပြမထားပေ။

ဇန်နဝါရီ ၉ရက်က မုံရွာမြို့အခြေစိုက် အနောက်မြောက်ပိုင်းတိုင်းစစ်ဌာနချုပ်(နမခ)မှ စစ်ကောင်စီ ထောက်ပို့စစ်ကြောင်း တိုက်ခိုက်မှုအတွင်း တော်လှန်ရေး ရဲဘော်တစ်ဦး ကျဆုံးခဲ့ရသည်ဟုလည်း အရာတော် ပကဖ အသိပေးသည်။

“ ပြည်သူ့အတွက် ထိုက်တန်ဂုဏ်ပြောင်စွာ အသက်ပေးလှူခဲ့တဲ့ ရဲဘော်ကို လေးစားဂုဏ်ယူလျှက်ပါ” ဟု အရာတော် ပကဖက ထုတ်ပြန်သည်။

အဆိုပါ စစ်ကောင်စီထောက်ပို့ စစ်ကြောင်းတွင် ထပရ (၉၂၉)တပ်ရင်း နှင့် တပ်မ (၇၇) လက်အောက်ခံ ထုတ်နုတ်အင်အားများပါသည့် Jammer ကား ၃စီး၊ ချောဆွဲခံထားရသည့် ရိက္ခာတင်ကုန်ကား ၇စီးအား မုံရွာခရိုင်တပ်ရင်းများ၊ ဒရုန်းတပ်ဖွဲ့၊ အရာတော်ပကဖ တပ်ဖွဲ့များ၊ ဒေသတွင်း တော်လှန်ရေးတပ်များ ပူးပေါင်း တိုက်ခိုက်ခဲ့ခြင်းဖြစ်သည်။

ဇန်နဝါရီ ၁၁ရက်တွင်လည်း အရာတော် -မုံရွာ လမ်းပိုင်းတွင် စစ်ရေးတင်းမာနေဆဲအခြေအနေဖြစ်၍ ပြည်သူများ လုံခြုံရေးအတွက် အရာတော် – မုံရွာလမ်း အသုံးပြုခြင်းကို ရပ်နားထားပေးရန် အရာတော် ပကဖက ထုတ်ပြန်ထားသည်။ ထို့ပြင် ပြည်သူများ၏ ကာများချောဆွဲနေပြီး လမ်းပိုင်းပေါ် လှုပ်ရှားမှုများ ရှိနေဆဲဟု အသိပေးထားသည်။