ကဖေး/People’s Spring
စစ်ကိုင်းတိုင်း၊ ရေဦးမြို့ပေါ် တပ်စွဲထားသည့် စစ်ကောင်စီတပ် ဂိတ်စခန်းတစ်ခုကို မြို့နယ်ပြည်သူ့ကာကွယ်ရေးအဖွဲ့(ပကဖ)က တိုက်ခိုက်ခဲ့ပြီးနောက် စစ်ကောင်စီတပ်က လက်နက်ကြီးများဖြင့် ရမ်းသမ်းပစ်ခတ်နေသည်။
ရေဦးမြို့မြောက်ခြမ်း ဟိန်းဆီဆိုင်းနေရာရှိ စစ်ကောင်စီတပ် ဂိတ်စခန်းကို မြို့နယ်ပြည်သူ့ကာကွယ်ရေးအဖွဲ့(ပကဖ) ယနေ့( ဖေဖော်ဝါရီ ၅ရက်) ညနေပိုင်း၌ တိုက်ခိုက်ခြင်းဖြစ်သည်။
” ဒရုန်းတွေ၊ ငါးကြင်းမြှီးတွေနဲ့ ချတာ။ ဒရုန်းပျံတဲ့ဘက်လို့ထင်တဲ့ ရွာသစ်ကျေးရွာဘက်ကို လက်နက်ကြီးနဲ့ ပစ်နေတယ်”ဟု ရေဦးပကဖမှ ရဲဘော်တစ်ဦးက ပြောသည်။
Public Service Announcement
လက်နက်ကြီးဖြင့်ပစ်ခတ်မှုကြောင့် လက်ရှိအချိန်အထိ ထိခိုက်မှုသတင်းမကြားရသေးကြောင်း တော်လှန်ရေးရဲဘော်တစ်ဦးက ည ၉နာရီခန့်တွင်ပြောသည်။
” ကိုးချက်ရှိပြီပစ်နေတာ။ ဗုံးကျင်းထဲပဲ နေနေကြရတယ်ဗျ။ ရမ်းပစ်နေတာ”ဟု ရေဦးမြို့မှဒေသခံတစ်ဦးက ပြောသည်။
ရေဦးမြို့တွင် ရပ်ကွက်ခြောက်ခုရှိပြီး စစ်ကောင်စီက မြို့ပေါ်နှင့် ပျူစောထီးများရှိသည့် အောင်သာယာကျေးရွာ၌ တပ်ဆွဲထားသည်။ ကျန်ကျေးရွာပေါင်း၂၀၀နီးပါးကို ပြည်သူ့ကာကွယ်ရေးတပ်ဖွဲ့များက ထိန်းချုပ်ထားသည်။
