မန္တလေးမှာ ကျောင်းပြန်ဖွင့်ပေမယ့် ဆရာ၊ဆရာမတွေသာ ကျောင်းတက်

စာသင်ကျောင်းတွေ ပြန်လည်ဖွင့်လှစ်တဲ့ ဒီနေ့မှာ မန္တလေးရှိကျောင်းတွေမှာတော့ ဆရာ၊ ဆရာမတွေသာ ကျောင်းတက်တာကိုတွေ့ပါတယ်။

ပြီးခဲ့တဲ့ ဇူလိုင်လကစတင်ပြီး ပိတ်ထားတဲ့ စာသင်ကျောင်းတွေဟာ နိုဝင်ဘာလ ၁ရက်နေ့မှာပြန်ဖွင့်ရမယ်လို့ စစ်ကောင်စီကအမိန့်ထုတ်ထားပါတယ်။

စာသင်ကျောင်းတွေပြန်ဖွင့်ပေမယ့် မန္တလေးမှာ ကျောင်းသား၊သူတွေ ကျောင်းတက်တာကိုမတွေ့ရဘဲ CDM မှာမပါဝင်တဲ့ ဆရာ၊ဆရာမတွေသာ အရပ်ဝတ်နဲ့ ကျောင်းတက်နေကြတာဖြစ်ပါတယ်။

“ဒီနေ့စဖွင့်တဲ့နေ့မှာတော့ ကျောင်းသား၊သူတွေမလာကြသေးဘူး။ ကျောင်းအပ်ကတော့ အခုထိလက်ခံပေးနေတုန်းပါပဲ”လို့ မန္တလေးမြို့ရှိ အလယ်တန်းကျောင်းအုပ်ဆရာမတစ်ဦးကပြောပါတယ်။

Public Service Announcement

“ကျောင်းလည်းမအပ်ထားဘူး။ ဒီအခြေနေမှာကျောင်းထားဖို့စိတ်ကူးမရှိဘူး။ စာတွေမမေ့အောင်လို့တော့ ပြင်ပကျူရှင်ပဲထားတော့တယ်”လို့ ကျောင်းသားမိဘတစ်ဦးကပြောပါတယ်။

စစ်ကောင်စီက ကျောင်းပြန်ဖွင့်ဖို့အတွက် ကျောင်းသူ ၊ကျောင်းသားတွေကို အသက်၁၂နှစ်အရွယ်ကစတင်ပြီး ကိုဗစ်ကာကွယ်ဆေးထိုးနှံတာတွေပြုလုပ်ခဲ့ပါတယ်။