မန္တလေး တဖက်ကမ်း စစ်ကိုင်းတိုင်း၊ မင်းကွန်းဒေသရှိ ကင်းရွာ ပြီးခဲ့တဲ့ ရက်ပိုင်း က စစ်ကောင်စီတပ်နဲ့ လက်အောက်ခံ ပြည်သူ့စစ်တွေ ရဲ့ မီးရှို့ဖျက်ဆီးတာ ခံလိုက်ရတယ်လို့ နယ်မြေခံ တော်လှန်ရေးအဖွဲ့ဝင်တစ်ဦးက ပြောပါတယ်။
ကင်းရွာမှာ တိုက်ပွဲမဖြစ်ဘဲ လွန်ခဲ့တဲ့ သုံးရက်ခန့်က စစ်ကောင်စီစစ်ကြောင်းဝင်ရောက်ကာ မီးရှို့သွားတာဖြစ်ပြီး ဒေသခံတွေလည်း တိမ်းရှောင်နေရတယ်လို့ အဲဒီ တော်လှန်ရေးတပ်ဖွဲ့ဝင်က အသိပေးပါတယ်။
မီးရှို့ခံရလို့ ပျက်စီးဆုံးရှုံးမှုအသေးစိတ်ကိုတော့မသိရသေးပါဘူး။
Public Service Announcement
ပြီးခဲ့တဲ့ ဇန်နဝါရီလ ပထမ ပတ်အတွင်းကလည်း စစ်ကိုင်း – မင်းကွန်း ကားလမ်းဘေးက လက်ပံရွာ မီးရှို့ခံရပြီး နေအိမ် အလုံး ၁၀၀ ကျော် မီးလောင် ပျက်စီး ခဲ့ရပါတယ်။
” လက်ပံက သုံးကြိမ်လောက်ရှိနေပြီ မီးရှို့ခံနေရတာ”လို့ မင်းကွန်းတိုက်နယ် သတင်းမှန်ပြန်ကြားရေးက တာဝန်ရှိသူတစ်ဦးကပြောပါတယ်။
လက်ရှိ မင်းကွန်းဒေသမှာ ဖုန်းလိုင်းနဲ့ အင်တာနက်လိုင်းဖြတ်တောက်ခံရတာရှိနေလည်းလို့လည်း သိရပါတယ်။
မန္တလေးတိုင်း နဲ့ ဧရာဝတီမြစ်သာ ခြားတဲ့ မင်းကွန်းဒေသမှာ တော်လှန်ရေးအင်အားစုတွေနဲ့ စစ်ကောင်စီတပ်တွေကြားစစ်ရေးတင်းမာနေတာ ကာလကြာပါပြီ။
ဇန်နဝါရီလကုန်ပိုင်း မှာတင်မင်းကွန်း မြသိန်းတန်စေတီတော်အနီးမှာ စစ်ကောင်စီတပ်နဲ့ တော်လှန်ရေးအင်အားစုတွေကြား တိုက်ပွဲတွေ ဖြစ်ထားပါသေးတယ်။
မင်းကွန်းဒေသမှာ စစ်ရေးတင်းမာနေတာကြောင့် စစ်ကိုင်း – မင်းကွန်း လမ်းပိုင်းကို ညပိုင်းအသုံးမပြုကြဖို့ မင်းကွန်း ပြည်သူ့ကာကွယ်ရေးအဖွဲ့က ဖေဖော်ဝါရီ ၁၄ ရက်က အသိပေးချက်ထုတ်ပြန်ထားပါတယ်။
