‘အချစ်အကြောင်းတွေ မပြောဖြစ်ကြတော့ဘူး’

မေရီသော်

မျက်မှောင်ကြီးကြုံ့ပြီး မကြည့်စမ်းပါနဲ့လို့

အားလုံးက ဝိုင်းပြောကြတယ်

ဒါဆိုမျက်လုံးတွေကို စုံမှိတ်ထားမှသာရမှာဖြစ်ပြီး

အဲ့ဒါက ရွေးချယ်စရာ မဟုတ်ခဲ့ဘူး‌ကွယ်

နောက်ခံသီချင်းသံလည်း

တိတ်ဆိတ်သွားတာ ကြာပြီ

ပြတ်သွားတဲ့ဂစ်တာကြိုးလေး သွားရှာဝယ်တဲ့

လူကြုံကလည်း ပြန်မရောက်သေးလို့

နိုင်ငံအနှံ့အပြားက သင်းကွဲတွေ၊

သူရူးတွေ နဲ့ ဖလော်‌ဆော်ဖာတွေ ပေါင်းပြီး

ဂြိုလ်သားတွေရဲ့အကူအညီနဲ့

ရန်ကုန်မြို့ကြီးကို တည်ထောင်ခဲ့ကြတာ

အခုကျ မြို့ပြကို နာနာကျင်ကျင်

လှမ်းအော်ခေါ်နေတဲ့ သူတို့အသံတွေကို

တောနက်ထဲမှာ

ညမှောင်ပြီဆိုရင် ကြားနေရတယ်

ဘယ်သူမှ မအိပ်ကြတော့ဘူး

ဆယ်စုနှစ်တိုင်းမှာ ကမ္ဘာပျက်တော့မယ်လို့

ထင်ကြတဲ့လူအုပ်ကြီးတွေ ရှိခဲ့ကြတယ်

စစ်ပွဲထဲမှာမို့ မေတ္တာထားဖို့ အရေးကြီးတယ်

စစ်ပွဲထဲမှာမို့ မေတ္တာမထားနိုင်လည်း

အရေးမကြီးလှဘူး

မိုးသည်းသည်းကြီးရွာချလိမ့်မယ်လို့

ဘော့ဘ်ဒိုင်လန်က လေးလံစွာနဲ့ ပြောတယ်

စစ်ပွဲတွေ ပြန်ခေတ်စားလာတဲ့အခါ

လူသားတွေဟာ ခေါင်းထဲမှာတင်

ကိုယ့်ကိုယ်ကို ပြန်ရင်ဆိုင်ဖို့မလိုတော့ပါ

ဘေးထွက်ဆိုးကျိုးအနေနဲ့ အီဗော်လူးရှင်း ၂ ရက် နောက်ကျသွားတယ်

အိမ်ရှေ့မှာ ဖေဖေဟာ ခပ်တည်တည်ကြီးနဲ့

ထိုင်နေတတ်တာကို ငယ်ငယ်ကတည်းက

မှတ်မိခဲ့တယ်

ခွီစရာတွေကုန်သွားပြီလို့ ပြောပြီးနောက်

ဂျူနီယာတယောက်လည်း ဒိုပါမင်လား

ဆာရိုတိုနင်လား တခုခု

ချို့တဲ့သွားလို့ဆိုပြီး

တချိန်လုံး ထိုးအိပ်နေတော့တာ

မျိုးဆက်နဲ့ချီတဲ့ ကျိန်စာစက်ဝန်းဟာ

၂၃ ဒဿမ ၅ ဒီဂရီ စောင်းငန်းငန်းကြီး လည်နေတုန်း

အရာအားလုံးကို ချန်ထားခဲ့ပြီး

အခုချက်ချင်း အာကာသထဲကို

စရိတ်ငြိမ်း ထွက်သွားရမယ်ဆိုရင်ရော

သွားဖြစ်မှာတဲ့လား

ကမ္ဘာဟာ ကိုယ်မရှိမှ ပိုကောင်းလာမယ်ဆိုတာ

သေချာရင်တော့ တမျိုးပေါ့လေ

အခုတော့ ခေါင်းငိုက်စိုက်နဲ့ ထိုင်နေတဲ့

ချစ်သူရဲ့ လက်ဖျားတွေ အေးစက်နေလို့

သေချာဆုပ်ကိုင်ပေးထားတယ်

အချစ်အကြောင်းတော့ မပြောဖြစ်ဘူး။

(The Call – ​ခေါ်သံ”အွန်လိုင်းမဂ္ဂဇင်းမှာ ‘​​ ​မေရီ​သော်’ရေးဖွဲ့ခဲ့တဲ့ “​အချစ်အကြောင်းတွေ မပြောဖြစ်ကြတော့ဘူး” ဝတ္ထုတိုကို People’s Spring က ပြန်လည်​ဖော်ပြ​ပေးတာ ဖြစ်ပါတယ်။အနုရသကဲပြီး တော်လှန်​ရေးအတွက် အ​ထောက်အကူ ပြုတဲ့ စာ​ပေကဏ္ဍမျိုးစုံကို “The Call – ​ခေါ်သံ” အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749… မှာလည်းသွား​ရောက်ဖတ်ရှုနိုင်ပါတယ်)