မန္တလေးမြို့ မဟာအောင်မြေမြို့နယ် မဟာအောင်မြေ ကျောက်မျက်ရတနာရောင်းဝယ်ရေးစခန်းအနီးရှိ စစ်ကောင်စီကင်းစခန်းတစ်ခုအား လက်ပစ်ဗုံးဖြင့် တိုက်ခိုက်ခဲ့ကြောင်း ဗမာ့ဇာမဏီအဖွဲ့ က ထုတ်ပြန် သည်။
ယနေ့(နိုဝင်ဘာ ၄ ရက်) နံနက် ၆နာရီခွဲခန့်က မဟာအောင်မြေကျောက်မျက်ရတနာရောင်းဝယ်ရေးစခန်း အနောက်မြောက်ဒေါင့် အိမ်သာအနီးတွင် စစ်ကောင်စီကင်းစခန်းတစ်ခုအား ဗမာ့ဇာမဏီအဖွဲ့၏ မြို့ပြစစ်ဆင် ရေးကော်မတီမှ လက်ပစ်ဗုံးတစ်လုံး ပစ်သွင်းဖောက်ခွဲခဲ့ခြင်းဖြစ်သည်။
ထိုဖောက်ခွဲတိုက်ခိုက်မှုကြောင့် ရဲတပ်ကြပ်တစ်ဦး သေဆုံးပြီး ဒုရဲအုပ်တစ်ဦး ဒဏ်ရာရရှိခဲ့ကြောင်း အဆိုပါအဖွဲ့က ဆိုသည်။
ထိုစစ်ဆင်ရေးမှာ စစ်ကောင်စီက ကျောက်မျက်ဈေးအား ဖွင့်ရန်စာထုတ်ခဲ့ခြင်းအပေါ် ဗမာ့ဇာမဏီအဖွဲ့က တုန့်ပြန်ခဲ့ခြင်းဖြစ်ကြောင်း အသိပေးထားသည်။
Public Service Announcement
ဗမာ့ဇာမဏီအဖွဲ့သည် စစ်ကောင်စီ၏ ထောက်တိုင်များဖြစ်သော စစ်ကောင်စီပိုင် စီးပွားရေးလုပ်ငန်းများ၊ စစ်ကောင်စီသတင်းပေး ဒလန်များ၊ စစ်ကောင်စီမှတပ်စွဲထားသော ရပ်/ကျေး အုပ်ချုပ်ရေးမှူးရုံးများအား ဆက်လက်တိုက်ခိုက်သွားမည်ဟု ကြေညာထားသည်။
