ဧပြီ ၁၅၊၂၀၂၅။ရဲခေါင်/People’s Spring
မကွေးတိုင်း၊ရေစကြို မြို့နယ်တွင် စစ်ကောင်စီတပ်စစ်ကြောင်းထိုးလာ၍ တိုက်ပွဲဖြစ်ပွားခဲ့ကြောင်း ရေစကြိုမြို့နယ်ပြည်သူ့ကာကွယ်ရေးအဖွဲ့က ယနေ့(ဧပြီ ၁၅ ရက်)တွင် အသိပေးထုတ်ပြန်သည်။
ရေစကြိုမြို့အခြေစိုက် အမှတ်(၂၅၈)ခြေလျင်တပ်ရင်း(ခလရ -၂၅၈)မှ စစ်ကြောင်းထိုးလာသော အင်အား၁၅၀ပါ စစ်ကြောင်းအား ကံသစ်ကျေးရွာအနီး၌ ဧပြီ ၁၃ရက်တွင် တိုက်ပွဲဖြစ်ပွားခဲ့သည်ဟု ဆိုသည်။
အဆိုပါတိုက်ပွဲအတွင်း စစ်ကောင်စီတပ်သားလေးဦး အပြင်းအထန်ရရှိပြီး လက်နက်များကောက်ယူရန် ကြိုးပမ်းခဲ့သော်လည်း အင်အားကွာဟမှုကြောင့် ဆုတ်ခွာခဲ့ရကြောင်း ဖော်ပြသည်။
Public Service Announcement
ထို့အပြင် ယမန်နေ့(ဧပြီ ၁၄ရက်)တွင် ခလရ(၂၅၈)တပ်ရင်းမှ စစ်ကောင်စီတပ်စစ်ကြောင်း နောက်တစ်ခုထွက်ရှိလာပြီး ကံသစ်ကျေးရွာ၌ပင် ထပ်မံရောက်ရှိနေကြောင်း အသိပေးသည်။
ကံသစ်ကျေးရွာသည် ရေစကြိုမြို့၏ အနောက်ဘက်ခြမ်းတွင်ရှိပြီး ပခုက္ကူ-ရေစကြို ရထားလမ်းပိုင်းဘေးတွင် ရှိသည်။
ထိုးစစ်ဆင်လာသည့် စစ်ကောင်စီတပ်စစ်ကြောင်းကို ပခုက္ကူခရိုင်တပ်ရင်း(၉)နှင့် ပူးပေါင်းခုခံနေကြောင်းလည်း ရေစကြိုမြို့နယ်ပြည်သူ့ကာကွယ်ရေးအဖွဲ့က ပြောသည်။
စစ်ကောင်စီသည် ယခုနှစ် ဖေဖော်ဝါရီနောက်ဆုံးပတ်မှ မတ်လ ဒုတိယပတ်အထိ ရေစကြိုမြို့နယ်ကို စစ်ကြောင်းထိုးခဲ့ဖူးပြီး ပြည်သူ ၁၈ဦးထက်မနည်းသတ်ဖြတ်ခဲ့ကာ ကျေးရွာ ၂၀ခန့်ကို မီးတင်ရှို့ခဲ့သည်။
ရေစကြိုမြို့တွင် စစ်ကောင်စီ၏ ခလရ (၂၅၆၊၂၅၇)နှင့် (၂၅၈)တပ်ရင်းများ အခြေစိုက်ထားသည်။
