မန္တလေးက စျေးမှာ စျေးဝယ်နေတဲ့ကလေးငယ်ရဲ့ ဆွဲကြိုး လုယက်ခံရ

ဇွန် – ၂၇ ၊၂၀၂၅ ၊ဆိုင်းမင်း/People’s Spring

မန္တလေးမြို့ ၊ ချမ်းမြသာစည်မြို့နယ် ၊ မြနန္ဒာစျေးအရှေ့မှာ သစ်သီးဝယ်နေတဲ့ ကလေးငယ်ရဲ့ ဆွဲကြိုးကို အမျိုးသမီး သုံးဦးက လုယက်သွားတဲ့ ဖြစ်စဉ် မနေ့ (ဇွန်လ ၂၆ ရက်) ညနေပိုင်းက ဖြစ်ပွားခဲ့တယ်လို့ ဒေသခံတွေကပြောပါတယ်။

စည်ပင်ကဖွင့်လှစ်ထားတဲ့ မြနန္ဒာစျေးအရှေ့ဘက် ၆၆လမ်းနဲ့ ၁၁၀လမ်းအနီးမှာ မနေ့ ညနေပိုင်း ၄ နာရီခွဲခန့်က အသက် ၆ နှစ်အရွယ် မိန်းကလေးငယ် သစ်သီးဝယ်နေချိန် လုယက်ခံရတာပါ၊

” ကလေးက မအော်တတ်ဘူး ၊ကောင်မလေးသုံးယောက်ကဖြတ်လုသွားတာ “လို့ မျက်မြင်တွေ့လိုက်တဲ့ စျေးသည်တစ်ဦးကပြောပါတယ်။

Public Service Announcement

ဆွဲကြိုးလုခံရတဲ့ ကလေးငယ်မှာ အနည်းငယ်ပွန်းပဲ့ဒဏ်ရာရရှိသွားတယ်လို့ ဆိုပါတယ်။

အမျိုးသမီးသုံးဦး ဆိုင်ကယ်တစ်စီးနဲ့ ရောက်လာပြီးနောက် ဆိုင်ကယ်ပေါ်ကနေ ဆင်းကာ ကလေးငယ်နားကိုကပ်ပြီး ဆွဲကြိုးလုယက်သွားတာလို့ သိရပါတယ်။

လုယက်မှုကျူးလွန်တဲ့ အမျိုးသမီးတွေဟာ အသက် ၂၀ ဝန်းကျင်ရှိတယ်လို့ မျက်မြင်တွေ့လိုက်ရတဲ့ စျေးသည်ရဲ့ပြောပြချက်အရသိရပါတယ်။

ပြီးခဲ့တဲ့ ဇွန်လ ၂၀ရက်ကလည်း မဟာအောင်မြေမြို့နယ် ရဲမွန်တောင်ရပ်ကွက် မှာ ညပိုင်း ၈နာရီဝန်းကျင် ဆိုင်ကယ်မောင်းနှင်လာတဲ့ အမျိုးသားကို သေနတ်ပြခြိမ်းခြောက်ပြီး ဆိုင်ကယ်လုယက်မှုဖြစ်ပွားထားပါတယ်။