ချင်းပြည်နယ်အတွင်း စစ်ရေးအခြေအနေ ပိုမိုတင်းမာကာ တိုက်ပွဲများဖြစ်ပွားလာနိုင်သည်ဟု ယူဆပြီး ချင်းပြည်နယ်ရှိ ဒေသခံများသည် မြန်မာ-အိန္ဒိယ နယ်စပ်ဒေသများသို့ ဆက်လက် တိမ်းရှောင်နေကြောင်း ချင်းအမျိုးသားတပ်ဦး(CNF) ပြောရေးဆိုခွင့်ရှိသူ ဆလိုင်းထက်နီက ပြောသည်။
ယခုရက်ပိုင်းအတွင်း ချင်းပြည်နယ်၌ တိုက်ပွဲဖြစ်ပွားမှု မရှိဘဲ ငြိမ်နေသော်လည်း ချင်းလက်နက်ကိုင်အဖွဲ့များ အနေဖြင့် လုံခြုံရေးနှင့် ဒေသကာကွယ်ရေးအတွက် အသင့်အနေအထား ပြင်ဆင်ထားသည်ဟု ၎င်းကဆိုသည်။
“စစ်ရေးအခြေအနေ တင်းမာလာနိုင်ဖွယ်ရှိတယ်ဆိုတဲ့ စဉ်းစားချက်နဲ့ ပြည်သူတွေ တစ်ရက်၊တစ်ရက် နယ်စပ်ဒေသဘက်ကို ထွက်ပြေးတိမ်းရှောင်တာတွေကတော့ ဆက်ပြီးတော့ ရှိနေတာပေ့ါ”ဟု ဆလိုင်းထက်နီက ပြောသည်။
ချင်းပြည်နယ် ထန်တလန်၊ ဟားခါး၊ ပလက်၀၊ တီးတိန် မြို့နယ်များမှ ဒေသခံမျး မိသားစုလိုက် တိမ်းရှောင်ကြပြီးအများစုမှာ အိန္ဒိယနိုင်ငံ မီဇိုရမ်ပြည်နယ်ရှိ နယ်စပ်ရွာများ၌ ခိုလှုံနေကြောင်း၊ စစ်ရှောင်အရေအတွက်ကို စုစည်းနိုင်ခြင်းမရှိသေးကြောင်း ၎င်းက ဆိုသည်။
Public Service Announcement
ချင်းပြည်နယ်တွင် စစ်ကောင်စီတပ်ကို ချင်းအမျိုးသားတပ်ဦး/ချင်းအမျိုးသားတပ်မတော်(CNF/CNA)၊ ချင်းဒေသကာကွယ်ရေးတပ်ဖွဲ့(CDF) တို့က ခုခံတိုက်ခိုက်လျက်ရှိသည်။ နိုဝင်ဘာ ပထမပတ်နှင့် ဒုတိယ ပတ်အတွင်း ဟားခါး၊ မင်းတပ်၊ မတူပီနှင့် ပလက်၀မြို့နယ်များ၌ တိုက်ပွဲများ ဖြစ်ပွားခဲ့သည်။
