လေးကေ့ကော်တိုက်ပွဲ ပြင်းထန်နေ၊ တိုက်ပွဲအတွင်း စစ်ကောင်စီတပ် ၁၀၀ခန့်သေတယ်လို့ ကျားသစ်နက်စစ်ကြောင်း ထုတ်ပြန်

အောက်တိုဘာ-၈၊ ၂၀၂၅ / People’s Spring

ကရင်ပြည်နယ် ၊မြဝတီမြို့ တောင်ဘက်မှာရှိတဲ့ လေးကေ့ကော်မြို့သစ်တိုက်ပွဲအတွင်း စစ်ကောင်စီတပ်က ၁၀၀ခန့် သေဆုံးပြီး အလင်းဝင်လာသူများရှိနေတယ်လို့ ကျားသစ်နက်စစ်ကြောင်း ထုတ်ပြန်ပါတယ်။

လေးကေ့ကော်မြို့သစ်အတွင်းမှာ ကရင်အမျိုးသားအစည်းအရုံး(KNU) /KNLA ၊ ဗျူဟာအမှတ် (၃၂) ကျားသစ်နက်စစ်​ကြောင်း ၊ ​ကော်ဘရာစစ်​ကြောင်း ၊ ဗွီနွန်စစ်​ကြောင်း ၊ Justice Solider စစ်​ကြောင်း မဟာမိတ်ပူး​ပေါင်းစစ်​ကြောင်းတွေနဲ့ စစ်ကောင်စီပူးပေါင်းတပ်တွေ နေ့စဉ် တိုက်ပွဲပြင်းထန်နေတယ်လို့ ကျားသစ်နက်စစ်ကြောင်းက အသိပေးပါတယ်။

စစ်ကောင်စီတပ်ဟာ ပြည်သူတွေကို အဓမ္မခေါ်ယူစုဆောင်းတာတွေ၊ အတင်းကြပ်ပေါ်တာဆွဲခံရတဲ့ ပြည်သူ့စစ်တွေနဲ့ အင်အားအလုံးအရင်းနဲ့ ထိုးစစ်ဆင်နေတယ်လို့ ဆိုပါတယ်။

Public Service Announcement

ဒါ့အပြင် ကရင်နယ်ခြားစောင့်တပ်(BGF)ရဲ့ တပ်ရင်းအချို့ပါ စစ်ကောင်စီတပ်ကို ကူတိုက်ပေးနေပြီး လေးကေ့ကော်မြို့သစ်ကို ထိုးစစ်ဆင်နေတာဖြစ်ပါတယ်။

အဲဒီစစ်ကောင်စီရဲ့ ပူးပေါင်းစစ်ကြောင်းတွေကို တော်လှန်ရေးတပ်တွေက ခုခံတိုက်ခိုက်ရာမှာ စစ်ကောင်စီတပ်က သေဆုံးသူ ၁၀၀ခန့်ရှိတယ်လို့ ကျားသစ်နက်စစ်ကြောင်းက ထုတ်ပြန်ထားပါတယ်။ သေဆုံးတဲ့ ၁၀၀ခန့်မှာ ပြည်သူ့စစ်တပ်သားသစ်တွေက အများဆုံးပါတယ်လို့လည်း ဖော်ပြထားပါတယ်။

ဒါ့အပြင် လေးကော့ကော်တိုက်ပွဲအတွင်းမှာ စစ်ကောင်စီတပ်ကနေ အလင်းဝင်လာတဲ့ သူတွေလည်းအများအပြားရှိနေတယ်လို့ ထုတ်ပြန်ထားပါတယ်။ ဒါပေမယ့် အရေအတွက်အတိအကျကိုတော့ ဖော်ပြထားတာ မရှိပါဘူး။

အဲဒီလို အလင်းဝင်လာတဲ့သူတွေကိုလည်း ကြိုဆိုနေတယ်လို့ ကျားသစ်နက်စစ်ကြောင်းက ဆိုပါတယ်။

KNUတပ်မဟာ ၆ ထိန်းချုပ်ထားတဲ့ လေးကေကော်မြို့သစ်ကို စက်တင်ဘာလ ၂၁ ရက်ကစတင်ပြီး ကရင့်နယ်ခြားစောင့်တပ် (BGF)အကူအညီနဲ့ စစ်ကောင်စီတပ်က ဒရုန်း ၊ လက်နက်ကြီးပစ်ကူယူကာမြေပြင်စစ်ကြောင်း​တွေထိုးခဲ့တာပါ။

အဲဒီနောက် အောက်တိုဘာ ၅ရက်မှာတော့ လေးကေ့ကော်မြို့သစ်ရဲ့ နေရာတချို့ကို စစ်ကောင်စီတပ်က ထိန်းချုပ်ခဲ့ပါတယ်။