မြစ်ငယ်အထက်တန်းကျောင်းမှာဓားထိုးမှုဖြစ်ပြီးကျောင်းသူ ကျောင်းသား သုံးဦးဒဏ်ရာရ

အောက်တိုဘာ – ၂၃ ၊၂၀၂၅ ၊ ဆိုင်းမင်း/People’s Spring

မန္တလေးတိုင်း ၊ အမရပူမြို့နယ်၊ မြစ်ငယ်မြို့ အထက်တန်းကျောင်းဝင်းထဲမှာ မနေ့ (အောက်တိုဘာ ၂၂ ရက် )မွန်းလွဲပိုင်းကဓားထိုးမှုဖြစ်လို့ ကျောင်းသူ၊ကျောင်းသား သုံးဦး ဒဏ်ရာရကာ တစ်ဦး စိုးရိမ်ရတယ်လို့မြို့ခံအချို့ဆီက သိရပါတယ်။

ဖြစ်စဉ်ကတော့ မနေ့ မွန်းလွဲပိုင်း ၁၂ နာရီ ၄၅ မိနစ် ဝန်းကျင်က မြစ်ငယ် အထက်တန်းကျောင်း ထမင်းစားဆင်းချိန်မှာ ဖြစ်ပွားတာပါ။

ဆယ်ကျော်သက်လူငယ်တစ်ဦးက ညီမဖြစ်သူကို အအေးဘူးပေးမယ်ဆိုတဲ့အကြောင်းပြချက်နဲ့ ကျောင်းဝင်းထဲ ဝင်လာပြီး Grade-11(ဝိဇ္ဇာတွဲ) B -အခန်းက ကျောင်းသူရဲ့ လည်ပင်းကိုဓားနဲ့ ထိုးခဲ့တာလို့သိရပါတယ်။

Public Service Announcement

အဲဒီဖြစ်စဉ်မှာ ဘေးကနေ ဝင်ဆွဲတဲ့သူငယ်ချင်းဖြစ်သူ ကျောင်းသူ နဲ့ ကျောင်းသား တို့လည်း လည်ပင်းနဲ့ လက်တွေမှာ ဓားဒဏ်ရာတွေရခဲ့ပါတယ်။

ဓားနဲ့ ဝင်ထိုးတဲ့ ဆယ်ကျော်သက်လူငယ်အမျိုးသားဟာ အသက် ၁၇ နှစ်အရွယ်ဖြစ်ပြီး ကိုယ့်ကိုယ်ကိုလည်း ဓားနဲ့ ဒဏ်ရာရအောင် ပြုလုပ်ခဲ့တယ်လို့ မြို့ခံအချို့က ပြောပြပါတယ်။

ဓားနဲ့ထိုးသူအပါအဝင် ဒဏ်ရာရသွားတဲ့ ကျောင်းသူ ၊ကျောင်းသား သုံးဦးကို မန္တလေးဆေးရုံကြီးမှာ ကုသပေးနေတယ်လို့သိရပါတယ်။

အဲဒီသုံးဦးအနက် လည်ပင်းကိုဓား နဲ့ထိုးခံရတဲ့ ကျောင်းသူကတော့ စိုးရိမ်ရတယ်လို့ သိရပါတယ်။ကျောင်းဝင်းထဲဝင်ရောက်ပြီးဓားနဲ့ထိုးတဲ့ အကြောင်း အရင်းကိုတော့ မသိရသေးပါဘူး။