အောက်တိုဘာ-၂၈၊၂၀၂၅။အိမ်သွင်/People’s Spring
အာရက္ခတပ်တော်(AA)သိမ်းပိုက်ထိန်းချုပ်ထားတဲ့ တောင်ကုတ်မြို့က စာသင်ကျောင်းတစ်ကျောင်းကို စစ်ကောင်စီ လေကြောင်းကနေ ပေါင် ၅၀၀ ဗုံးကြဲချတိုက်ခိုက်ခဲ့ပါတယ်။
မနေ့က အောက်တိုဘာ ၂၇ရက် ညပိုင်းမှာ တောင်ကုတ်မြို့နယ် မီးချောင်းထိုးကျေးရွာက မဟော်သဓာအခမဲ့ ကိုယ်ပိုင်အထက်တန်းကျောင်းကို ဗုံးကြဲခဲ့တာလို့ ရခိုင်ပြည်နယ်ဒေသခံသတင်းမြစ်တချို့က ပြောပါတယ်။
” ဒီနေ့မနက်ထိကြားရသလောက်တော့ ကျောင်းဆောင်တော့ပျက်စီးသွားတယ်။ လူအထိခိုက်တော့မရှိဘူးပေါ့။ လုံခြုံရေးအရ ကျောင်းပိတ်ထားတာကြောင့်လည်း အထိအခိုက်မရှိခဲ့တာဖြစ်ပါတယ်”လို့ တောင်ကုတ်မြို့က စစ်ဘေးရှောင်တစ်ဦးက ပြောပါတယ်။
Public Service Announcement
စစ်ကောင်စီက ပဲခူးတိုင်း၊ ပန်းတောင်းမြို့နယ်ကနေတဆင့် တောင်ကုတ်မြို့ဦးတည်ပြီး စစ်ကြောင်းထိုးဖို့ကြိုးစားနေသလို လေကြောင်းတိုက်ခိုက်နေတာဖြစ်ပါတယ်။
စစ်ကောင်စီတပ်စစ်ကြောင်းတွေကို AAနဲ့ မဟာမိတ်ပူးပေါင်းတပ်တွေက ကြားဖြတ်တိုက်ခိုက်နေပါတယ်။
တောင်ကုတ်-ပန်းတောင်းလမ်းပိုင်းမှာ ပြီးခဲ့တဲ့အောက်တိုဘာလဆန်းက တိုက်ပွဲတွေပြင်းထန်ခဲ့ပြီးအောက်တိုဘာ ၁၄ ရက်မှာတော့ ပန်းတောင်းမြို့နယ်၊ ပုဂံဂွေ့ (ပန်းကန်ကွဲ) ကျေးရွာတောင်ဘက်၊ ၉ ကီလိုမီတာအကွာက စစ်ကောင်စီစခန်း ၆၆၆ပွိုင့်ကုန်းကို သိမ်းယူနိုင်ခဲ့တယ်လို့ AAကထုတ်ပြန်ပါတယ်။
တောင်ကုတ်-ပန်းတောင်းလမ်းပိုင်းနေရာချို့မှာတိုက်ပွဲတွေဆက်ဖြစ်နေပြီး မြို့ထဲကိုပါ လေကြောင်းကနေ ဗုံးကြဲတာဖြစ်ပါတယ်။
AAထိန်းချုပ်ထားတဲ့ မြို့တွေကို လေကြောင်းကနေတိုက်ခိုက်တာတွေ၊ အရပ်သားပြည်သူတွေကို နေ့ ရောညပါ အကြမ်းဖက်တိုက်ခိုက်နေလို့ သတိပြုကြဖို့ လေကြောင်း၊ ရေကြောင်း၊လက်နက်ကြီးရန်နဲ့ပတ်သက်တဲ့ အရေးပေါ် သတိပေးချက်ကိစက်တင်ဘာလ ၂၈ရက်ညမှာ ထုတ်ပြန်ထားပါတယ်။စစ်ကောင်စီဟာတိုက်ပွဲဖြစ်ပွားခြင်းမရှိတဲ့ မြို့၊ ရွာတွေက စာသင်ကျောင်း၊ ဈေး၊ ဆေးရုံ၊ ဆေးခန်းနဲ့ ဘုန်းတော်ကြီးကျောင်းစတဲ့ နေရာတွေအပြင် လူစုလူဝေးရှိတယ်လို့ ထင်တဲ့နေရာတွေကို နေ့၊ ည အချိန်မရွေး လေကြောင်း၊ ရေကြောင်း၊လက်နက်ကြီးတို့နဲ့ ပစ်ခတ်တိုက်ခိုက်နေတယ်လို့ ဆိုပါတယ်။
အောက်တိုဘာ ၂၅ရက်ကနေ အောက်တိုဘာ ၂၇ရက်အတွင်းတောင်ကုတ်၊ အမ်း၊ ပုဏ္ဏားကျွန်းနဲ့ ကျောက်ဖြူမြို့နယ်တွေကို စစ်ကောင်စီက ဗုံးကြဲလို့ ကလေနှစ်ဦးသေဆုံးပြီး နှစ်ဦးဒဏ်ရာရခဲ့ပါတယ်။
