မင်းတုန်းမြို့နယ်မှာ စစ်တပ်က အရပ်သား ၃ဦး သတ်ဖြတ်

ဖေဖော်ဝါရီ-၄ ၊၂၀၂၆။ဇော်ဝင်း /People’s Spring

မကွေးတိုင်း၊မင်းတုန်းမြို့နယ်မှာ စစ်ကောင်စီတပ်စစ်ကြောင်းက အရပ်သား ၃ဦး သတ်ဖြတ်သွားတယ်လို့ ဒေသခံတချို့က ပြောပါတယ်။

မင်းတုန်းမြို့နယ်အနောက်ခြမ်းကို ဇန်နဝါရီ ၂၁ရက်ကနေ ၂၈ရက်ထိ စစ်ကြောင်းထိုးခဲ့တဲ့အလယ်ပိုင်းတိုင်းစစ်ဌာန(လပခ)လက်အောက်ခံတပ်ရင်းက သတ်ဖြတ်ခဲ့တာလို့ ဆိုပါတယ်။

စစ်တပ်စစ်ကြောင်းသတ်ဖြတ်ခဲ့တာက မင်းတုန်းမြို့နယ် သီးပင်ကုန်းကျေးရွာက (၄၄)နှစ် အရွယ် ကိုမှင် ၊အမှတ်(၃)ရပ်ကွက်က ဖိုးသား(ခ)ချစ်မင်းထိုက်နဲ့ အတည်ပြုမရသေးတဲ့ အမျိုးသား တစ်ဦးလို့ သိရပါတယ်။

Public Service Announcement

“အရပ်သားတွေပါ စစ်ကြောင်းဝင်လာချိန် တွေ့တာမှာ ဖမ်းဆီးပြီးနှိပ်စက်သတ်ဖြတ်ခဲ့တာပါ”လို့ မင်းတုန်းမြို့ခံတစ်ဦးက ပြောပါတယ်။

စစ်ကောင်စီတပ်ဟာ အရပ်သားတွေကို အရှင် လတ်လတ်မီးရှို့ခဲ့တာ၊ တုတ်နဲ့ မသေမချင်း နှိပ်စက် သတ်ခဲ့တာလို့ ရုပ်အလောင်းတွေကို တွေ့ရှိခဲ့တဲ့ ဒေသခံနောက်တစ်ဦးကလည်း ပြောပါတယ်။

“လူသားဒိုင်းကာလုပ် ဖမ်းဆီးထားပြီးမှ စစ်ကြောင်းထွက်တော့ တခါတည်းသတ်သွားခဲ့တဲ့ပုံစံမျိုး”လို့ သူက ပြောပါတယ်။

ဒါ့အပြင် ထန်းလေးပင်၊ပြောင်း၊သီးပင်ကုန်းနဲ့ တမာကျေးရွာတွေက နေအိမ်တွေကိုလည်း မီးရှို့တာနဲ့ ပစ္စည်းတွေကို ဖောက်ထွင်းယူဆောင်ခဲ့တာရှိတယ်လို့ သိရပါတယ်။

အဲဒီစစ်ကြောင်းဟာ ဖေဖော်ဝါရီ ၂ ရက်က မင်းတုန်းမြို့နယ်ကနေ ဆုတ်ခွာသွားပြီး အောင်လံ မြို့နယ်ဘက် ရောက်ရှိ​နေတယ်လို့ မကွေးတိုင်းစစ်ရေးသတင်းရင်းမြစ်တချို့က ပြောထားပါတယ်။