ဟောမုဇ် ရေလက်ကြားနားက အီရန် ဒုံးကျည်စခန်းတွေကို အမေရိကန်က ဘန်ကာဖျက်ဗုံးတွေ ကြဲချ

မတ်-၁၈၊၂၀၂၆။People’s Spring

ဟောမုဇ် ရေလက်ကြား တဝိုက်က အီရန် ဒုံးကျည်စခန်းတွေကို ပေါက်ကွဲအား ပြင်းထန်တဲ့ ဘန်ကာဖျက်ဗုံးတွေပါ အသုံးပြုပြီး တိုက်ခိုက်နေကြောင်း အမေရိကန် စစ်တပ်က ပြောပါတယ်။

ပေါင် ၅၀၀၀ အလေးချိန်ရှိပြီး မြေနက်ပိုင်းက ဘန်ကာတွေထိ ထိုးဖောက်ဝင်ပြီး ဖောက်ခွဲနိုင်တဲ့ ဗုံးတချို့ကို အသုံးချပြီး အီရန်ရဲ့ ဒုံးကျည်စခန်းတွေကို ဖျက်ဆီးပစ်နိုင်ခဲ့တယ်လို့ အမေရိကန်ရဲ့ စစ်ရေးဗဟို ကွပ်ကွဲမှုဌာန (CENTCOM)က လူမှုကွန်ရက် မီဒီယာ Xမှာ မတ်လ ၁၇ ရက်နေ့က ရေးသားထားခဲ့ပါတယ်။

အဲဒီတိုက်ခိုက်မှုတွေရဲ့ ပစ်မှတ်ဟာ ဟောမုဇ် ရေလက်ကြားတလျှောက် တည်ရှိနေတဲ့ အီရန်ရဲ့ ဒုံးကျည်ဖျက် ခရုစ်ဒုံးကျည်တွေ တပ်ဆင်ထားရာ စစ်အခြေစိုက် စခန်းတွေ ဖြစ်တယ်လို့ CENTCOMက ဆိုပါတယ်။ အဲဒီ ဒုံးကျည်စခန်းတွေဟာ ဟောမုဇ် ရေလက်ကြားကို ဖြတ်သန်းခုတ်မောင်းတဲ့ နိုင်ငံတကာ အရပ်ဖက် ရေယာဉ်တွေကို အကြီးအကျယ် ခြိမ်းခြောက်နေတယ်လို့လည်း အမေရိကန် စစ်တပ်က စွပ်စွဲခဲ့ပါတယ်။

Public Service Announcement

ဖေဖော်ဝါရီ ၂၈ ရက်နေ့မှာ အမေရိကန်နဲ့ အစ္စရေးတို့ရဲ့ ပူးပေါင်းတိုက်ခိုက်မှုတွေ စတင်လာချိန် ကတည်းက အီရန်ဟာ ဟောမုဇ် ရေလက်ကြားကို ပိတ်ပစ်ခဲ့သလို ဖြတ်သန်းသွားလာနေတဲ့ ရေနံတင်နဲ့ ကုန်တင်သင်္ဘော တချို့ကိုလည်း တိုက်ခိုက်ခဲ့ပါတယ်။ ကမ္ဘာ့ရေနံတင်ပို့မှုရဲ့ စုစုပေါင်း ပမာဏထဲက ငါးပုံတစ်ပုံလောက် ပုံမှန်ဖြတ်သန်းရာ ရေလက်ကြားမှာ အဲဒီတိုက်ခိုက်မှုတွေ ဖြစ်ပေါ်လာတဲ့နောက် နိုင်ငံတကာ ရေနံနဲ့ လောင်စာဆီ စျေးတွေလည်း ထိုးတက်လာခဲ့ပါတယ်။

အမေရိကန်က ကြဲချတယ်ဆိုတဲ့ ပေါင် ၅၀၀၀ ဗုံးတွေဟာ တစ်လုံးကို ဒေါ်လာ ၃ သိန်းနီးပါးလောက် တန်ဖိုးရှိပြီး မြေအောက် ဘန်ကာတွေထိ ထိုးဖောက် ဖျက်ဆီးနိုင်တာကြောင့် ဘန်ကာဖျက်ဗုံးတွေလို့ ခေါ်ဝေါ်ပါတယ်။ အဲဒီ ဗုံးတွေဟာ မနှစ်တုန်းက အီရန် နျူကလီးယား စခန်းတွေကို အမေရိကန်ရဲ့ B-2 မဟာဗျူဟာ ဗုံးကြဲလေယာဉ်ကြီးတွေက ကြဲချခဲ့တဲ့ ပေါင် ၃၀၀၀၀ အလေးချိန်ရှိတဲ့ အကြီးစား ဘန်ကာဖျက်ဗုံးတွေလောက်တော့ အားမပြင်းပါဘူး။

သမားရိုးကျ ဗုံးတွေနဲ့ မတူတာက ဘန်ကာဖျက်ဗုံးတွေဟာ လေထဲမှာ လုံးဝ မပေါက်ကွဲဘဲ မြေမျက်နှာပြင်နဲ့ ထိတွေ့ချိန်၊ ဒါမှမဟုတ် မြေမျက်နှာပြင်အောက် တိုးဝင်သွားပြီးချိန်မှသာ ပေါက်ကွဲအောင် တီထွင်ထားတာပါ။ အဲဒီအတွက်လည်း ဗုံးရဲ့ ကိုယ်ထည်ကို လေးလံပြီး မာကျောတဲ့ အထူးသံမဏိ သတ္တုစပ်တွေနဲ့ အားဖြည့်တည်ဆောက်ထားကြောင်း သိရပါတယ်။

ကိုးကား-BBC