သေနတ်ပစ်ဖောက်ဓားပြတိုက်တဲ့ လူငယ် ၂ဦးအနက် တစ်ဦး ဖမ်းမိထားဟုဆို
ဧပြီ-၇၊ ၂၀၂၆/People’s Spring
စစ်ခေါင်းဆောင်မင်းအောင်လှိုင် မကြာခဏလာနေတဲ့ ပြင်ဦးလွင်မြို့က မေစိန်ရွှေရတနာဆိုင် ဓားပြတိုက်ခံရမှု ဒီကနေ့ ဧပြီ ၇ရက် မနက်က ဖြစ်ပွားခဲ့ပါတယ်။
ဒီကနေ့ မနက် ၁၁နာရီခွဲလောက်မှာ ပြင်ဦးလွင်မြို့က လူစည်ကားတဲ့ လမ်းတစ်လမ်းဖြစ်တဲ့ ချယ်ရီလမ်းမပေါ်က မေစိန်ရွှေရတနာဆိုင်ကို သေနတ်ကိုင်ဆောင်ထားတဲ့ လူငယ် ၂ဦးက သေနတ်ပစ်ဖောက် ဝင်ရောက်ဓားပြတိုက်သွားတာလို့ မြို့ခံတွေက ပြောပါတယ်။
Public Service Announcement
“ချယ်ရီလမ်းဆိုတာ လူအရမ်စည်တာ။ အဲဒီလမ်းကို တိုက်ခံရတယ်ဆိုတော့မြို့က ဆိုးနေပြီ။ အဲဒီအချိန်လောက်ကလည်း မိုးရွာနေတယ်။ အဲဒါကို အခွင့်ကောင်းယူတိုက်တာ ထင်တယ်”လို့ ပြင်ဦးလွင်မြို့ခံတစ်ဦးက ပြောပါတယ်။
ဓားပြတိုက်တဲ့ လူငယ် ၂ဦးအနက် တစ်ဦးကို ဖမ်းမိထားတယ်လို့ မြို့ခံတွေက ပြောပါတယ်။
ပြင်ဦးလွင်မြို့ဟာ စစ်ခေါင်းဆောင်မင်းအောင်လှိုင်မကြာခဏလာလေ့ရှိတဲ့ စစ်တပ်မြို့တော်တစ်ခုဖြစ်ပြီး လုံခြုံရေးအားကောင်းတဲ့ မြို့အဖြစ် နာမည်ကြီးပါတယ်။
ပြီးခဲ့တဲ့ ၂၀၂၅ ဒီဇင်ဘာ ၁၂ရက်ကလည်း ပြင်ဦးလွင်မြို့လယ်ခေါင်က အောင်စံပယ်ရွှေဆိုင် သေနတ်ကိုင်ထားသူ နှစ်ဦးကဓားပြတိုက်ခံခဲ့ရပါတယ်။
ပြင်ဦးလွင်နဲ့တဆက်တည်းရှိတဲ့ မန္တလေးမြို့မှာတော့ စစ်တပ်နဲ့ရဲတပ်ဖွဲ့ဝင်တွေ၊ ပျူစောထီးအဖွဲ့ဝင်တွေပူးပေါင်းကျူးလွန်တဲ့ ရွှေဆိုင်ဓားပြတိုက်မှုတွေမကြာခဏဖြစ်ပွားခဲ့ပါတယ်။
ပြင်ဦးလွင်မြို့မှာ ဆိုင်ကယ်ခိုးယူမှု၊ လုယက်မှုတွေလည်း ဖြစ်နေပြီး တရားဥပဒေစိုးမိုးရေးကို စစ်ကောင်စီက မကိုင်တွယ်နိုင်ဘူးလို့မြို့ခံအချို့က ပြောပါတယ်။
(ဓားပြတိုက်ခံရတဲ့ မေစိန်ရွှေရတနာဆိုင်ကို တွေ့ရစဉ်။ ဓာတ်ပုံ − CJ)
