'/%3E%3C/svg%3E){kind=small}
ဧပြီ-၁၇၊၂၀၂၆။People’s Spring
မြန်မာ့ ရှပ်အင်္ကျီပြာ လှုပ်ရှားမှုမှာ ဗြိတိန်နိုင်ငံက Africa House London အဖွဲ့ ဥက္ကဋ္ဌ ရစ်ချတ်ဆမ်မီတီဂိုလည်း ပူးပေါင်း ပါဝင်ပြီး နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် လွတ်မြောက်ရေးအတွက် တောင်းဆိုခဲ့ပါတယ်။ လူမှုကွန်ရက် မီဒီယာပေါ် တင်ထားတဲ့ ဗီဒီယိုမှာတော့ ဆမ်မီတီဂိုဟာ လက်ဝါးမှာ ‘Free Aung San Suu Kyi’ဆိုတဲ့ စာသားကို ရေးသားပြထားတာ တွေ့ရသလို ဒေါ်အောင်ဆန်းစုကြည်၊ နိုင်ငံရေး အကျဉ်းသားတွေနဲ့ မြန်မာနိုင်ငံ လွတ်မြောက်ရေးအတွက် တောင်းဆိုကြောင်းလည်း ပြောကြားထားပါတယ်။ သူဟာ ယူဂန္ဓာနွယ်ဖွား ဗြိတိန် နိုင်ငံသား တစ်ဦးဖြစ်ပြီး အစိုးရ ဆက်ဆံရေး၊ အပြည်ပြည်ဆိုင်ရာ ကုန်သွယ်ရေးနဲ့ ပြည်သူ့ဝန်ဆောင်မှု လုပ်ငန်းတွေဆိုင်ရာ ကျွမ်းကျင် ပညာရှင်တစ်ဦးပါ။
နိုင်ငံရေးအကျဉ်းသားတွေကို ဂုဏ်ပြုရင်း အကျဉ်းထောင်ဝတ်စုံ အပြာရောင်အင်္ကျီကို အသက်ထက်ဆုံးဝတ်ဆင်သွားခဲ့သူ ဟံသာဝတီဦးဝင်းတင် ကွယ်လွန်ခြင်း ၁၂နှစ်ပြည့်မှာ လက်ရှိအကြမ်းဖက်စစ်တပ်ရဲ့ မတရားဖမ်းဆီးခြင်းခံရတဲ့ နိုင်ငံရေးအကျဉ်းသားအားလုံး လွတ်မြောက်ရေးအတွက် ရည်ရွယ်ပြီးတော့ Blue Shirt Campaign ကို ဧပြီလ ၁၀ရက်မှ ၂၁ရက်အထိ ပြုလုပ်နေတာဖြစ်ပါတယ် ။
