ရန်ကုန်လေဆိပ်မှာ MNA လေယာဥ်စက်ချို့ယွင်းပြီးရပ်ထားတဲ့ MAI လေယာဥ်ကို ဝင်တိုက်မိ

ဧပြီ-၂၀၊၂၀၂၆။တာရာ၊သတိုး/People’s Spring

ရန်ကုန်အပြည်ပြည်ဆိုင်ရာလေဆိပ်မှာ မြန်မာအမျိုးသားလေကြောင်းလိုင်း(MNA)မှ ATR-72 လေယာဉ်တစ်စင်းဟာ ဘရိတ်စနစ်ချို့ယွင်းမှုကြောင့် ရပ်နားထားတဲ့ MAI ရဲ့ Airbus A319 လေယာဉ်ကိုဒီ​​နေ့မနက်ပိုင်းမှာဝင်တိုက်မိခဲ့ပါတယ်။

ဧပြီ ၂၀ ရက် မနက်ပိုင်းကအဲဒီမတော်တဆမှုဖြစ်ပွားခဲ့တာဖြစ်ပြီး ပျံသန်းဖို့ လေယာဉ်ပြေးလမ်းသို့ ထွက်ခွာစဉ် ဘရိတ်ချို့ယွင်းသဖြင့် ထိန်းချုပ်မှုမရဘဲ ရပ်နားထားတဲ့ MAI လေယာဉ်ရဲ့ အမြီးပိုင်းကို ဝင်တိုက်မိခဲ့တာပါ။

အဲဒီနောက် အနီးရှိ ကုန်ပစ္စည်းတင်ဆောင်ရေးလှည်း (Baggage Cart)တစ်စီးကိုထပ်မံတိုက်မိပြီးမှ ရပ်တန့်သွားခဲ့တယ်လို့ သိရပါတယ်။

Public Service Announcement

“ဖြစ်စဥ်က​တော့ မှန်ပါတယ်။ ​လေယာဥ်နှစ်စင်းလုံးထိခိုက်မှုရှိတယ်။ ​​လေကြာင်းတာဝန်ရှိသူ​တွေက အ​သေးစိတ်စစ်​ဆေး​နေပါတယ်။ ပုံမှန်​လေယာဥ်မထွက်ခင် စစ်​ဆေးတာ​ရှိပါတယ်။ ဘာက ချို့ယွင်းတာလဲဆိုတာ​တော့ စစ်​ဆေးပြီးမှ သိနိုင်မယ်”လို့MNAတာဝန်ရှိသူတစ်ဦးက​ပြောပါတယ်။

ဖြစ်စဉ်ကြောင့်လေယာဉ်နှစ်စင်းလုံးမှာ ကိုယ်ထည်ပိုင်း ထိခိုက်ပျက်စီးမှုအချို့ ရှိခဲ့ပေမယ့် ခရီးသည်များနဲ့ မြေပြင်ဝန်ထမ်းများ ထိခိုက်ဒဏ်ရာရရှိမှု မရှိခဲ့ဘူးလို့ ဆိုပါတယ်။

လက်ရှိမှာလေယာဉ်နှစ်စင်းလုံးကို စစ်ဆေးပြင်ဆင်ဖို့ ခေတ္တရပ်နားထားပြီး ဖြစ်စဉ်နဲ့ပတ်သက်လို့ သက်ဆိုင်ရာ တာဝန်ရှိသူများက အသေးစိတ် စုံစမ်းစစ်ဆေးမှုများ ဆက်လက်လုပ်ဆောင်​နေတယ်လို့ သိရပါတယ်။

​​လေယာဥ်ကွင်းတစ်ကွင်းလုံးမှာ ​လေယာဥ် အနည်းငယ်ပဲရှိပြီး ရပ်ထားတဲ့​လေယာဥ်ကိုမှ သွားတိုက်မိလို့ ပြည်သူအချို့ကလည်း​မေးခွန်းထုတ်​နေပါတယ်။

လေယာဥ်မ​တော်တဆမှုနဲ့ပတ်သက်ပြီး MNA ကဧပြီ ၂၀ ရက် ညပိုင်းအထိ သတင်းထုတ်ပြန်တာမရှိ​​သေးပါဘူး ။

“MNAလေကြောင်းလိုင်းက တစ်ခုမဟုတ် တစ်ခု အမြဲ ပြဿနာဖြစ်တယ် ပြီးတော့ တာဝန်ယူမှု တာဝန်ခံမှုလဲ မရှိဘူး” လို့ ခရီးသည်တစ်ဦးက မှတ်ချက်ရေးသားထားပါတယ်။