–စစ်တပ်ကို ထပ်တိုးဒဏ်ခတ်အရေးယူရေးနှင့် ကျူးလွန်မှုများအတွက် တာဝန်ခံစေရေးအချက်များ ဥပဒေကြမ်းတွင် ထည့်သွင်းထား
မြန်မာ့ဒီမိုကရေစီအရေးကို အားပေးထောက်ခံမည့် ဥပဒေကြမ်းတစ်ရပ်ကို အမေရိကန် အထက်လွှတ်တော်ကအတည်ပြုလိုက်ပြီး သမ္မတလက်မှတ်ရေးထိုးရန် ပေးပို့ထားကြောင်း အထက်လွှတ်တော်အမတ် McConnell က ထုတ်ပြန်သည်။
မြန်မာအာဏာသိမ်းစစ်တပ်ကို ပိုမိုဒဏ်ခတ်အရေးယူရေးနှင့် အမျိုးသားညီညွတ်ရေးအစိုးရ (NUG) အပါအဝင် ဒီမိုကရေစီအင်အားစုများကို အားပေးထောက်ခံရေးအပါအဝင် ဒီမိုကရေစီလမ်း ကြောင်းပေါ် အမြန်ဆုံးပြန်လည်ရောက်ရှိရန် အမေရိကန်အစိုးရက လုပ်ဆောင်ရမည့်အချက်များ ထည့်သွင်းရေးဆွဲထားသည့် NDAA(National Defense Authorization Act)ကို လွှတ်တော်နှစ်ရပ်စလုံးက အတည်ပြုခဲ့ခြင်းဖြစ်သည်။
“ဒီနှစ်အစောပိုင်းမှာ မြန်မာနိုင်ငံရဲ့ တရားမဝင်၊ ရွေးချယ်ခံမဟုတ်တဲ့ စစ်ကောင်စီက တိုင်းပြည်ရဲ့ ဒီမိုကရေစီနည်းကျရွေးကောက်ခံအစိုးရကိုဆန့်ကျင်တဲ့ အာဏာသိမ်းမှုကို လုပ်ဆောင်ခဲ့ပါတယ်။ ဒီလုပ်ရပ်တွေကို ကျွန်တော် ပြင်းပြင်းထန်ထန် ရှုတ်ချပါတယ်။ နောက်ပြီး အရပ်သားတွေအပေါ် သူတို့ကျူးလွန်နေဆဲ အဆင်ခြင်မဲ့အကြမ်းဖက်မှုတွေနဲ့ သူတို့ရဲ့ နိုင်ငံရေးပြိုင်ဘက်တွေအပေါ် တရားစွဲဆိုခြင်းတွေကိုလည်း ရှုတ်ချပါတယ်။ ဒီအကြပ်အတည်းကိုဖြေရှင်းဖို့ဆိုရင် NDAA လုပ်ငန်းစဉ်ကတဆင့် မြန်မာ့ဒီမိုကရေစီအရေးအတွက် အမေရိကန်ရဲ့အားပေးထောက်ခံမှုကို ထပ်လောင်းအတည်ပြုဖို့ လွှတ်တော်နှစ်ရပ်ရဲ့ကြိုးပမ်းမှုကို ကျွန်တော် ဦးဆောင်ခဲ့ပါတယ်”ဟု အထက် လွှတ်တော်အမတ် McConnell က ပြောသည်။
Public Service Announcement
သမ္မတဘိုင်ဒန် အတည်ပြုလက်မှတ်ရေးထိုးပြီးပါက လာမည့်နှစ်တွင် စတင်အသက်ဝင်မည့် အထက်ပါဥပဒေ ကြမ်းတွင် အမေရိကန်နှင့် နိုင်ငံတကာ၏ ဒဏ်ခတ်အရေးယူထားမှုများ၏ သက်ရောက်မှုများကိုဆန်းစစ်ခြင်းနှင့် ထပ်တိုးဒဏ်ခတ်အရေးယူမှုများလုပ်ဆောင်ရေး၊ စစ်ကောင်စီ၏ တရားဝင်မှုကို ငြင်းပယ်သည့်တပြိုင်နက် NUG နှင့် အခြားသော ဒီမိုကရေစီအင်အားစုများကို အားပေးထောက်ခံရေး အချက်များပါဝင်သည်။
ထို့အပြင် စစ်တပ်၏ ရက်စက်ယုတ်မာမှုများနှင့် လူ့အခွင့်အရေးချိုးဖောက်မှုများကို တာဝန်ခံမှုရှိ စေရေး၊ တိုင်းရင်းသားအဖွဲ့များအကြား စစ်မှန်သည့်အမျိုးသားရင်ကြားစေ့ရေးဖြစ်ပေါ်ရေး၊ နိုင်ငံရေးအကျဉ်းသားများအားလုံးကို ပြန်လွှတ်ပေးရေး အချက်များလည်းပါဝင်သည်။
အထက်လွှတ်တော်အမတ် McConnell သည် မြန်မာ့ဒီမိုကရေစီအရေးအတွက် နှစ်ပေါင်းရှည်ကြာ ရပ်တည်ထောက်ခံပေးခဲ့သူဖြစ်ပြီး မြန်မာ့ဒီမိုကရေစီလိုလားသူ ဒေါ်အောင်ဆန်းစုကြည်နှင့် အနီးကပ်အလုပ်လုပ်ခဲ့သူဖြစ်သည်။
