လေးကေကော်အနီးမှာ တိုက်ပွဲတွေပြင်းထန်ရာမှာ စစ်ကောင်စီတပ်ဖွဲ့ဝင်ရဲ့ လက်နက်ကြီးကြောင့် နေအိမ်တွေ မီးလောင်ပျက်စီးရသလို ဒေသခံပြည်သူ ရာနဲ့ချီပြီး ဘေးလွတ်ရာကို ထပ်မံ ထွက်ပြေးနေရတယ်လို့ ဒေသခံသတင်းရင်းမြစ်ဆီကသိရပါတယ်။
တိုက်ပွဲဖြစ်ပွားတဲ့နေရာတွေကတော့ မဲထော်သလေး ကျေးရွာ ၊ ဖလူးကျေးရွာ အနီးပတ်ဝန်းကျင်းတွေဖြစ်ပြီး တိုက်ပွဲတွေမှာ အထိနာခဲ့တဲ့ စစ်ကောင်စီဟာ အင်အားတိုးချဲ့ထားသလို လက်နက်ကြီးတွေကို သုံးနေတာပါ။
တိုက်ပွဲဟာ ဒီနေ့ညနေပိုင်း ၃ နာရီလောက်စတင်ပြီးပိုမိုပြင်းထန်လာတာလို့သိရပါတယ်။
ထိုင်း − မြန်မာ နယ်စပ်နားက မဲထော်သလေးရွာကို ထိန်းချုပ်ထားတဲ့ ကရင်အမျိုးသားလွတ်မြောက်ရေးတပ်မတော်နဲ့ မဟာမိတ်တပ်တွေရှိရာကို စစ်ကောင်စီက လက်နက်ကြီးမျိုးစုံနဲ့ ပစ်ခတ်နေတာလို့ ဒေသတွင်းမီဒီယာ KIC ကလည်းဖော်ပြထားပါတယ်။
Public Service Announcement
ဒါအပြင် မြေပြင်ကလည်း စစ်ကောင်စီတပ်ဖွဲ့ဝင်တွေနဲ့ အတူ BGF တွေပါ ထိုးစစ်ဆင်လာတဲ့အတွက် နှစ်ဖက် တိုက်ပွဲပြင်းထန်နေတာပါ။
ကရင်အမျိုးသားလွတ်မြောက်ရေးတပ်မတော် KNLA ဘက်ကတော့ KNDO နဲ့ PDF တွေပါ ဝင်ရောက်တိုက်ခိုက်နေတယ်လို့သိရပါတယ်။
KNU တပ်မဟာ ၆ ထိန်းချုပ်ရာ လေးကေကော်မြို့သစ်မှာ စစ်အာဏာသိမ်းတာကိုဆန့်ကျင်သူတွေနဲ့ PDF တွေ ခိုအောင်းနေတယ်ဆိုကာ စစ်ကောင်စီတပ်ဖွဲ့ဝင်တွေဝင်ရောက်ရှာဖွေဖမ်းဆီးရာကနေ နယ်မြေခံKNU တပ်တွေနဲ့ စစ်ရေးတင်းမာခဲ့တာပါ။
အဲဒီနောက် ဒီဇင်ဘာ ၁၅ ရက်ကနေ တိုက်ပွဲတွေစဖြစ်ခဲ့တာဖြစ်ကာ ထောင်နဲ့ချီတဲ့ ဒေသခံတွေဟာ နယ်စပ်မျည်းကိုဖြတ်ကျော်ကာ ထိုင်းနိုင်ငံဘက်ခြမ်းမှာ သွားရောက်တိမ်းရှောင်နေရပါတယ်။
စစ်ကောင်စီလက်နက်ကြီးကျည်ကြောင့် လေးကေကော်ဒေသ မဲထော်သလေးကျေးရွာက နေအိမ်တွေ ဒီနေ့တွေ့ရတာဖြစ်ပါတယ်။
